ਜਲੰਧਰ (ਸਮਾਜ ਵੀਕਲੀ) (ਪਰਮਜੀਤ ਜੱਸਲ)-ਅੰਬੇਡਕਰੀ ਅਤੇ ਬੋਧੀ ਆਗੂ ਸ੍ਰੀ ਸੋਹਨ ਲਾਲ ਸਾਂਪਲਾ ਪ੍ਰਧਾਨ ਡਾਕਟਰ ਅੰਬੇਡਕਰ ਮਿਸ਼ਨ ਸੋਸਾਇਟੀ ਯੂਰਪ,ਜਰਮਨੀ ਨੇ ਇੱਕ ਸਾਦੇ ਸਮਾਗਮ ਵਿੱਚ ਬੁੱਧੀਜੀਵੀ ਡਾ. ਸੂਰਜ ਅਤੇ ਰਵੀ ਪਰਿਵਾਰ ਦਾ ਬਾਬਾ ਸਾਹਿਬ ਜੀ ਦੀਆਂ ਪੁਸਤਕਾਂ ਨਾਲ ਸਨਮਾਨ ਕੀਤਾ। ਇਸ ਮੌਕੇ ‘ਤੇ ਸ੍ਰੀ ਸਾਪਲਾ ਜੀ ਨੇ ਕਿਹਾ ਕਿ ਡਾ. ਭੀਮ ਰਾਓ ਅੰਬੇਡਕਰ ਨੇ ਭਾਰਤੀ ਨਾਰੀ ਦੀ ਜਾਗਰੂਕਤਾ ਲਈ, ਜੋ ਇਤਿਹਾਸਕ ਯੋਗਦਾਨ ਪਾਇਆ, ਉਹ ਦੁਰਲੱਭ ਹੈ। ਉਹਨਾਂ ਨੇ ਸਾਬਿਤ ਕੀਤਾ ਕਿ ਕਲਮ ਕਦੇ ਕਮਜ਼ੋਰ ਨਹੀਂ ਹੁੰਦੀ, ਜਦੋਂ ਉਹ ਹੱਕਾਂ ਲਈ ਲਿਖੀ ਜਾਵੇ। ਸਦੀਆਂ ਤੋਂ ਬੇੜੀਆਂ ਵਿੱਚ ਜਕੜੀਆਂ ਨਾਰੀਆਂ ਲਈ ਅੰਬੇਡਕਰ ਜੀ ਵੱਲੋਂ ਤਿਆਰ ਕੀਤਾ ਹਿੰਦੂ ਕੋਡ ਬਿੱਲ ਇਕ ਇਨਕਲਾਬੀ ਕਦਮ ਸੀ। ਇਸ ਬਿੱਲ ਨੇ ਧੀਆਂ ਨੂੰ ਵਾਰਿਸ ਹੱਕ, ਨਾਰੀ ਨੂੰ ਆਪਣੀ ਪਹਿਚਾਣ, ਅਧਿਕਾਰ ਅਤੇ ਸੰਵਿਧਾਨਕ ਸੁਰੱਖਿਆ ਦਿੱਤੀ। ਨਾਰੀ ਸਮਾਨਤਾ ਦੀ ਇਸ ਚਿੰਗਾਰੀ ਨੇ ਭਾਰਤੀ ਸਮਾਜ ਦੇ ਘਰਾਣਿਆਂ ’ਚ ਇੱਕ ਨਵੀਂ ਜਾਗਰੂਕਤਾ ਪੈਦਾ ਕੀਤੀ।
