(ਸਮਾਜ ਵੀਕਲੀ)
ਪਿੰਡ-ਪਿੰਡ, ਘਰ-ਘਰ ਜਾ ਰਹੇ ਆ ਨੇਤਾ ਜੀ
ਝੂਠਾ-ਸੱਚਾ ਕਰਕੇ ਸੌਂਹਾਂ ਖਾ ਰਹੇ ਆ ਨੇਤਾ ਜੀ
ਉਹ ਹੋਰ ਹੋਣਗੇ ਝੂਠੀ ਸੌਂਹ ਮੈਂ ਖਾਂਦਾ ਹੀ ਨਹੀਂ
ਘਰ ਰੱਬ ਦੇ ਮੁਕਰੀ ਜਾ ਰਹੇ ਆ ਨੇਤਾ ਜੀ
ਪਿਛਲੀ ਪਾਰਟੀ ਕਹਿੰਦੇ ਸਾਨੂੰ ਰਾਸ ਨਹੀਂ
ਨਿੱਤ ਨਵੀਂ ਦੇ ਸੋਹਲੇ ਗਾ ਰਹੇ ਆ ਨੇਤਾ ਜੀ
ਖੁੱਲ੍ਹਾ ਰਾਸ਼ਨ, ਬਿਜਲੀ ਚੁੱਕੋ ਸਭ ਕੁਝ ਫ਼ਰੀ
ਬਿਨਾਂ ਨੌਕਰੀ ਪੈਨਸ਼ਨ ਲਾ ਰਹੇ ਆ ਨੇਤਾ ਜੀ
ਛੱਤ ਚੋਂਦੀ ਜਾਂ ਛੱਤ ਨਹੀਂ ਤੁਸੀਂ ਫ਼ਿਕਰ ਛੱਡੋ
ਚਾੜ੍ਹ ਚੰਦ ਤੇ ਲੈਂਟਰ ਪਾ ਰਹੇ ਆ ਨੇਤਾ ਜੀ
ਘਰ ਘਰ ਦੇ ਵਿਚ ਗੱਡ ਕੇ ਝੰਡਾ ਨਫ਼ਰਤ ਦਾ
ਪਿੰਡ ਸ਼ਾਂਤੀ ਭਵਨ ਬਣਾ ਰਹੇ ਆ ਨੇਤਾ ਜੀ
ਹਾਈਕਮਾਂਡ ਵਿਚ ਐਤਕਾਂ ਹੱਥ ਪੂਰਾ ਪੂਰਾ
ਸਭ ਸੰਕਟ ਹੱਲ ਕਰਵਾ ਰਹੇ ਆ ਨੇਤਾ ਜੀ
ਪੂਰੇ ਕਰਨੇ ਵਾਅਦੇ ਕਹਿਣ ਅਗਲੇ ਪਿਛਲੇ
ਮੁੜ ਲੋਲੀਪੋਪ ਛਕਾ ਰਹੇ ਆ ਨੇਤਾ ਜੀ
ਅਖ਼ੇ ਦੇਸ਼ ਨੂੰ ਖਤਰਾ ਅੰਦਰੋਂ ਬਾਹਰੋਂ ਸਭ ਪਾਸੋਂ
ਪਰ, ਆਪਣਾ ਨਾਮ ਲੁਕਾ ਰਹੇ ਆ ਨੇਤਾ ਜੀ
ਅਕਲੋਂ ਅੰਨ੍ਹੇ, ਬੜੇ ਗੈਰਤਮੰਦ ਸੀ ਬਣੇ ਫਿਰਦੇ
ਤੈਨੂੰ ਵੇਚ ਕੇ ਨਾਹਰਾ ਲਾ ਰਹੇ ਆ ਨੇਤਾ ਜੀ
ਦੀਪ ਸੰਧੂ
+61 459 966 392
ਸਮਾਜ ਵੀਕਲੀ’ ਐਪ ਡਾਊਨਲੋਡ ਕਰਨ ਲਈ ਹੇਠ ਦਿਤਾ ਲਿੰਕ ਕਲਿੱਕ ਕਰੋ
https://play.google.com/store/apps/details?id=in.yourhost.samajweekly
