ਮਹਿਲ ਕਲਾਂ ਦੀ 13 ਸਾਲਾ ਰਾਧਿਕਾ ਜਿੰਦਲ ਦਾ ਦਿਲ ਦਾ ਦੌਰਾ ਪੈਣ ਨਾਲ ਅਚਾਨਕ ਦੇਹਾਂਤ, ਖੇਤਰ ਵਿੱਚ ਮਾਤਮ
ਮਹਿਲ ਕਲਾਂ (ਸਮਾਜ ਵੀਕਲੀ) ਗੁਰਭਿੰਦਰ ਸਿੰਘ ਗੁਰੀ: ਅੱਜ ਸਵੇਰੇ ਸਾਰੇ ਖੇਤਰ ਨੂੰ ਹਿਲਾ ਦੇਣ ਵਾਲੀ ਦੁੱਖਦਾਈ ਖ਼ਬਰ ਆਈ ਕਿ ਜਿੰਦਲ ਪਰਿਵਾਰ ਦੀ ਲਾਡਲੀ ਬੇਟੀ ਰਾਧਿਕਾ ਜਿੰਦਲ (ਉਮਰ 13 ਸਾਲ) ਦਾ ਬੀਤੀ ਰਾਤ ਦਿਲ ਦਾ ਦੌਰਾ ਪੈਣ ਨਾਲ ਦੇਹਾਂਤ ਹੋ ਗਿਆ। ਰਾਧਿਕਾ ਮਰਹੂਮ ਆਗੂ ਵਜੀਰ ਚੰਦ ਵਜੀਦਕੇ ਦੀ ਪੋਤਰੀ, ਜਿੰਦਲ ਇੰਟਰਪ੍ਰਾਈਜ ਮਹਿਲ ਕਲਾਂ ਦੇ ਮਾਲਕ ਰਜਿੰਦਰ ਕੁਮਾਰ ਜਿੰਦਲ ਦੀ ਹੋਣਹਾਰ ਬੇਟੀ ਅਤੇ ਪ੍ਰਸਿੱਧ ਕਾਰੋਬਾਰੀ ਹਰਵਿੰਦਰ ਕੁਮਾਰ ਜਿੰਦਲ ਦੀ ਪਿਆਰੀ ਭਤੀਜੀ ਸੀ।ਨੌਜਵਾਨ ਉਮਰ ਵਿੱਚ ਇਸ ਅਚਾਨਕ ਘਟਨਾ ਨੇ ਨਾ ਸਿਰਫ਼ ਪਰਿਵਾਰ ਨੂੰ, ਸਗੋਂ ਸਾਰੇ ਇਲਾਕੇ ਨੂੰ ਗਮ ਵਿੱਚ ਡੁੱਬੋ ਦਿੱਤਾ ਹੈ। ਸਾਰੀ ਰਾਤ ਤੋਂ ਜਿੰਦਲ ਪਰਿਵਾਰ ਦੇ ਘਰ ਲੋਕਾਂ ਦੀ ਭੀੜ ਲੱਗੀ ਰਹੀ, ਜਿੱਥੇ ਹਰ ਕੋਈ ਦੁੱਖ-ਸਹਾਨਭੂਤੀ ਪ੍ਰਗਟ ਕਰਦਾ ਨਜ਼ਰ ਆਇਆ। ਪਰਿਵਾਰਕ ਸਰੋਤਾਂ ਮੁਤਾਬਕ ਰਾਧਿਕਾ ਕੁਝ ਸਮਾਂ ਪਹਿਲਾਂ ਤੱਕ ਬਿਲਕੁਲ ਸਿਹਤਮੰਦ ਸੀ, ਪਰ ਅਚਾਨਕ ਤਬੀਅਤ ਬਿਗੜਣ ‘ਤੇ ਉਸ ਨੂੰ ਹਸਪਤਾਲ ਲਿਆਂਦਾ ਗਿਆ, ਜਿੱਥੇ ਡਾਕਟਰੀ ਟੀਮ ਉਸ ਨੂੰ ਬਚਾ ਨਾ ਸਕੀ। ਇਲਾਕੇ ਦੀਆਂ ਸਮਾਜਿਕ, ਰਾਜਨੀਤਕ ਅਤੇ ਵਪਾਰਕ ਹਸਤੀਆਂ ਨੇ ਜਿੰਦਲ ਪਰਿਵਾਰ ਲਈ ਦਿਲੀ ਸੰਵੇਦਨਾਵਾਂ ਭੇਜੀਆਂ ਹਨ। ਲੋਕਾਂ ਨੇ ਪਰਮਾਤਮਾ ਅੱਗੇ ਅਰਦਾਸ ਕੀਤੀ ਕਿ ਉਹ ਵਿਛੜੀ ਹੋਈ ਆਤਮਾ ਨੂੰ ਆਪਣੇ ਚਰਨਾਂ ਵਿੱਚ ਸਦਾ ਲਈ ਨਿਵਾਸ ਦੇਵੇ ਅਤੇ ਪਰਿਵਾਰ ਨੂੰ ਹੌਸਲਾ ਬਖ਼ਸ਼ੇ।
