ਗੀਤਾਂ ਦਾ ਸ਼ੇਅਰ ਬਾਜ਼ਾਰ

  (ਸਮਾਜ ਵੀਕਲੀ)   ਮੇਰਾ ਇੱਕ ਗਾਇਕ ਦੋਸਤ ਮੇਰੇ ਲਿਖੇ ਗੀਤ ਲੈ ਕੇ ਕਿਸੇ ਰਿਕਾਰਡਿੰਗ ਕੰਪਨੀ ਦੇ ਮਾਲਕਾਂ ਕੋਲ਼ ਗਿਆ । ਉਨ੍ਹਾਂ ਨੇ ਗੀਤਾਂ ਨੂੰ ਪੜ੍ਹਨ ਵਾਚਣ ਤੋਂ ਬਾਅਦ ਕਿਹਾ ਕਿ ” ਇਨ੍ਹਾਂ ਗੀਤਾਂ ਦਾ ਗੀਤਕਾਰ ਕੋਈ ਅਧਿਆਪਕ ਜਾਂ ਪ੍ਰੋਫੈਸਰ ਲਗਦੈ ? ” ” ਹਾਂ ਜੀ , ਸੇਵਾ ਮੁਕਤ ( ਰਿਟਾਇਰਡ ) ਅਧਿਆਪਕ ਹੈ ” । ਉਸ ਨੇ ਦੱਸਿਆ । ਉਹ ਕਹਿੰਦੇ , ” ਇਸ ਨੂੰ ਗੀਤਕਾਰੀ ਦੀ ਤਕਨੀਕ ਤਾਂ ਆਉਂਦੀ ਐ , ਪਰ ਸਮਾਜ ਸੇਵਾ ਦਾ ਭੂਤ ਸਵਾਰ ਹੈ । ਉਹਨੂੰ ਗੀਤਾਂ ਦੀ ਸ਼ੇਅਰ ਮਾਰਕੀਟ ਦਾ ‘ਨੀਂ ਪਤਾ । ਉਸ ਨੂੰ ਇਹ ਕਹੀਂ ਕਿ ਇਹ ਗੀਤ ਤਾਂ ਕਿਤਾਬਾਂ ‘ਚ ਛਾਪਣ ਵਾਸਤੇ ਰੱਖ ਲਵੇ , ਜੇਕਰ ਰਿਕਾਰਡ ਕਰਵਾਉਂਣੇ ਨੇ , ਸਾਡੇ ਨਾਲ਼ ਆ ਕੇ ਰਹੇ , ਅਸੀਂ ਦੱਸਾਂਗੇ ਬਈ ਕੀ ਲਿਖਣੈਂ ? ਇਹ ਤਾਂ ਉਹ ਜਾਣਦਾ ਈ ਐ ਬਈ ਕਿਵੇਂ ਲਿਖਣੈਂ । ਬੱਸ ਫ਼ਿਰ ਜਿੰਨੇਂ ਗੀਤ ਲਿਖੀਂ ਜਾਊ , ਓਨੇਂ ਹਜ਼ਾਰ ਰੁਪੱਈਏ , ਉਹ ਵੀ ਨਕਦੋ ਨਕਦੀ । ਖੱਬੇ ਹੱਥ ਨਾਲ਼ ਗੀਤ ਫੜਾਈਂ ਜਾਵੇ , ਸੱਜੇ ਨਾਲ਼ ਨੋਟ ਫੜੀਂ ਜਾਵੇ । ਏਹੋ ‘ਜੇ ਪ੍ਰੋੜ ਗੀਤਕਾਰ ਨੂੰ ਤਾਂ ਅਸੀਂ ਐਡਵਾਂਸ ਵੀ ਦੇਣ ਨੂੰ ਤਿਆਰ ਹਾਂ ।” ਮੈਂ ਉਸ ਨੂੰ ਕਿਹਾ , “ਭਰਾਵਾ ਮੇਰੀ ਲੋੜ ਜੋਗੇ ਨੋਟ ਤਾਂ ਮੈਨੂੰ ਸਰਕਾਰ ਆਏ ਮਹੀਨੇ ਦਿੰਦੀ ਰਹਿੰਦੀ ਐ , ਇਹ ਗੀਤ ਕਵਿਤਾਵਾਂ ਮੈਂ ਰਿਕਾਰਡਿੰਗ ਲਈ ਨਹੀਂ ਲਿਖਦਾ ਸਗੋਂ ਆਪਣੇ ਮਨ ਦੇ ਸਕੂਨ ਲਈ ਲਿਖਦਾ ਹਾਂ।