ਰਾਈਟਮੂਵ ਦੇ ਨਕਸ਼ਿਆਂ ਨਾਲ ਘਰ ਚੁਣ ਕੇ ਕਰੋੜਾਂ ਦੀਆਂ ਚੋਰੀਆਂ ਕਰਨ ਵਾਲਾ ਗਿਰੋਹ ਕਾਬੂ

ਲੈਸਟਰ (ਇੰਗਲੈਂਡ),  (ਸਮਾਜ ਵੀਕਲੀ)   (ਸੁਖਜਿੰਦਰ ਸਿੰਘ ਢੱਡੇ)– ਬ੍ਰਿਟੇਨ ਵਿਚ ਘਰਾਂ ਦੇ ਨਕਸ਼ੇ ਆਨਲਾਈਨ ਦੇਖ ਕੇ ਚੋਰੀਆਂ ਕਰਨ ਵਾਲੇ ਇਕ ਅਲਬੇਨੀਆਈ ਗਿਰੋਹ ਨੂੰ ਅਦਾਲਤ ਵੱਲੋਂ ਕੜੀਆਂ ਸਜ਼ਾਵਾਂ ਸੁਣਾਈਆਂ ਗਈਆਂ ਹਨ। ਇਸ ਗਿਰੋਹ ਨੇ ਦੇਸ਼ ਭਰ ਵਿਚ 10 ਮਹੀਨਿਆਂ ਦੌਰਾਨ ਦਰਜਨਾਂ ਘਰਾਂ ਨੂੰ ਨਿਸ਼ਾਨਾ ਬਣਾਇਆ ਅਤੇ ਲੱਖਾਂ ਪੌਂਡ ਦੀ ਕੀਮਤ ਦੇ ਗਹਿਣੇ, ਘੜੀਆਂ ਅਤੇ ਮਹਿੰਗੇ ਬੈਗ ਲੁੱਟੇ। ਅਦਾਲਤ ਵਿਚ ਸੁਣਵਾਈ ਦੌਰਾਨ ਸਾਹਮਣੇ ਆਇਆ ਕਿ ਇਹ ਗਿਰੋਹ ਇੰਟਰਨੈੱਟ ਅਤੇ ਪ੍ਰਾਪਰਟੀ ਵੈੱਬਸਾਈਟਾਂ ‘ਤੇ ਘਰਾਂ ਦੇ ਨਕਸ਼ੇ ਅਤੇ ਬਣਤਰ ਦੇਖ ਕੇ ਪਹਿਲਾਂ ਹੀ ਯੋਜਨਾ ਬਣਾਉਂਦਾ ਸੀ। ਇਸ ਤੋਂ ਬਾਅਦ ਇਹ ਰਾਤ ਦੇ ਸਮੇਂ ਸੀੜ੍ਹੀਆਂ ਦੀ ਮਦਦ ਨਾਲ ਘਰਾਂ ਵਿਚ ਦਾਖ਼ਲ ਹੋ ਕੇ ਚੋਰੀਆਂ ਕਰਦਾ ਸੀ। ਗਿਰੋਹ ਨੇ ਕੁੱਲ 44 ਘਰਾਂ ‘ਚ ਵੱਡੀਆਂ ਵਾਰਦਾਤਾਂ ਕੀਤੀਆਂ। ਇਕ ਮਾਮਲੇ ਵਿਚ 2 ਲੱਖ ਪੌਂਡ ਤੋਂ ਵੱਧ ਦਾ ਸਮਾਨ ਚੋਰੀ ਕੀਤਾ ਗਿਆ, ਜਦਕਿ ਇਕ ਹੋਰ ਘਟਨਾ ਵਿਚ 30 ਤੋਂ ਵੱਧ ਮਹਿੰਗੀਆਂ ਘੜੀਆਂ ਲੈ ਜਾਈਆਂ ਗਈਆਂ। ਕਈ ਵਾਰ ਘਰਾਂ ਦੇ ਮਾਲਕ ਅੰਦਰ ਹੀ ਮੌਜੂਦ ਸਨ ਅਤੇ ਡਰ ਦੇ ਮਾਰੇ ਲੁਕਣ ਲਈ ਮਜਬੂਰ ਹੋਏ। ਅਦਾਲਤ ਨੇ ਦੱਸਿਆ ਕਿ ਚੋਰ ਕਮਰਿਆਂ ਨੂੰ ਉਲਟ-ਪੁਲਟ ਕਰਦੇ, ਬਿਸਤਰਾਂ ਦੀਆਂ ਚਾਦਰਾਂ ਵਿਚ ਸਮਾਨ ਬੰਨ੍ਹ ਕੇ ਲੈ ਜਾਂਦੇ ਅਤੇ ਕਈ ਵਾਰ ਤਿਜ਼ੋਰੀਆਂ ਤੱਕ ਚੁੱਕ ਕੇ ਲੈ ਗਏ। ਇਸ ਕਾਰਨ ਪੀੜਤ ਪਰਿਵਾਰਾਂ ਵਿਚ ਡਰ ਅਤੇ ਅਸੁਰੱਖਿਆ ਦਾ ਮਾਹੌਲ ਬਣ ਗਿਆ। ਪੁਲਿਸ ਨੇ ਡੀ.ਐਨ.ਏ., ਮੋਬਾਈਲ ਫੋਨ ਡਾਟਾ ਅਤੇ ਗੱਡੀਆਂ ਦੇ ਨੰਬਰਾਂ ਦੀ ਮਦਦ ਨਾਲ ਇਸ ਗਿਰੋਹ ਨੂੰ ਕਾਬੂ ਕੀਤਾ। ਛਾਪਿਆਂ ਦੌਰਾਨ ਕਈ ਮਹਿੰਗੀਆਂ ਚੀਜ਼ਾਂ ਬਰਾਮਦ ਕੀਤੀਆਂ ਗਈਆਂ, ਹਾਲਾਂਕਿ ਕਾਫ਼ੀ ਸਮਾਨ ਪਹਿਲਾਂ ਹੀ ਵੇਚਿਆ ਜਾਂ ਪਿਘਲਾਇਆ ਜਾ ਚੁੱਕਾ ਸੀ। ਅਦਾਲਤ ਨੇ ਗਿਰੋਹ ਦੇ ਮੈਂਬਰਾਂ ਨੂੰ 9 ਤੋਂ 10 ਸਾਲ ਤੱਕ ਦੀ ਕੈਦ ਦੀ ਸਜ਼ਾ ਸੁਣਾਈ ਹੈ। ਜੱਜ ਨੇ ਕਿਹਾ ਕਿ ਉਨ੍ਹਾਂ ਨੇ ਲੋਕਾਂ ਦੇ ਘਰਾਂ ਦੀ ਸੁਰੱਖਿਆ ਦਾ ਅਹਿਸਾਸ ਖਤਮ ਕਰ ਦਿੱਤਾ ਅਤੇ ਉਨ੍ਹਾਂ ਨੂੰ ਡਰ ਵਿਚ ਜੀਣ ਲਈ ਮਜਬੂਰ ਕੀਤਾ। ਇਸ ਮਾਮਲੇ ਵਿਚ ਇਕ ਬ੍ਰਿਟਿਸ਼ ਮਹਿਲਾ ਵੀ ਗਿਰੋਹ ਨਾਲ ਜੁੜੀ ਹੋਈ ਮਿਲੀ, ਜਿਸ ਨੇ ਗੱਡੀਆਂ ਕਿਰਾਏ ‘ਤੇ ਲੈ ਕੇ ਚੋਰਾਂ ਦੀ ਮਦਦ ਕੀਤੀ। ਅਦਾਲਤ ਨੇ ਉਸ ਨੂੰ ਜੇਲ੍ਹ ਦੀ ਬਜਾਏ ਮੁਅੱਤਲ ਸਜ਼ਾ ਦੇ ਕੇ ਸਮਾਜਿਕ ਸੇਵਾ ਕਰਨ ਦੇ ਹੁਕਮ ਦਿੱਤੇ ਹਨ। ਇਸ ਘਟਨਾ ਨੇ ਘਰਾਂ ਦੀ ਸੁਰੱਖਿਆ ਅਤੇ ਆਨਲਾਈਨ ਜਾਣਕਾਰੀ ਦੇ ਗਲਤ ਇਸਤੇਮਾਲ ਬਾਰੇ ਨਵੀਆਂ ਚਿੰਤਾਵਾਂ ਖੜ੍ਹੀਆਂ ਕਰ ਦਿੱਤੀਆਂ ਹਨ।

‘ਸਮਾਜਵੀਕਲੀ’ ਐਪਡਾਊਨਲੋਡਕਰਨਲਈਹੇਠਦਿਤਾਲਿੰਕਕਲਿੱਕਕਰੋ
https://play.google.com/store/apps/details?id=in.yourhost.samajweekly