(ਸਮਾਜ ਵੀਕਲੀ)
ਆਹ ਦਿਨ ਨਾ ਵੇਖਣੇ ਪੈਂਦੇ
—————————-
ਜੇਕਰ ਅਪਣੇ ਵਰਕਰਾਂ ਨਾਲ਼ ਹੀ
ਇੰਜ ਵਿਗਾੜੀ ਨਾ ਹੁੰਦੀ ।
ਪਾਈ ਤਰ੍ਹਾਂ ਤਰ੍ਹਾਂ ਦੇ ਮਾਫ਼ੀਏ ਨਾਲ਼
ਜੇਕਰ ਆੜੀ ਨਾ ਹੁੰਦੀ ।
ਜੇ ਕੁੰਵਰ ਵਿਜੇ ਪ੍ਰਤਾਪ ਸਿੰਘ ਦੀਆਂ
ਗੱਲਾਂ ਨੂੰ ਹੀ ਸੁਣ ਲੈਂਦੇ ;
ਭਾਵੇਂ ਹਾਰ ਬੇਸ਼ੱਕ ਹੋ ਜਾਂਦੀ ਪਰ
ਐਨੀ ਮਾੜੀ ਨਾ ਹੁੰਦੀ ।
ਸੱਥਾਂ ਵਿੱਚ ਗੱਲਾਂ ਹੁੰਦੀਆਂ
—————————-
ਕਿਧਰੇ ਹੱਕ ਮੁਲਾਜ਼ਮ ਮੰਗਦੇ ਨੇ ,
ਕਿਧਰੇ ਧਰਨੇ ਲਾਏ ਕਿਸਾਨਾਂ ਨੇ ।
ਨਸ਼ਿਆਂ ਅਤੇ ਮਿਲਾਵਟ ਨੇ ਨਿੱਤ ਹੀ,
ਥਾਂ ਥਾਂ ਲਈਆਂ ਕੀਮਤੀ ਜਾਨਾਂ ਨੇ ।
ਜੈਤੋਂ ਹਲਕੇ ਦੇ ਪਿੰਡ ਚੰਦ ਭਾਨ ਵਿੱਚ,
ਦਲਿਤਾਂ ਨਾਲ਼ ਜੋ ਵੀ ਹੋਇਆ ਹੈ ;
ਵੀਹ ਸੌ ਬਾਈ ‘ਚ ਕੀਤੀ ਗ਼ਲਤੀ ਦਾ,
ਲੋਕੀਂ ਭੁਗਤ ਰਹੇ ਹਰਜ਼ਾਨਾ ਨੇ ।
ਭੇਡਾ ਚਾਲ ਦਾ ਨਤੀਜਾ
————————-
ਬਾਹਰੇ ਜਾ ਕੇ ਮਜ਼ਦੂਰੀ ਪੈ ‘ਗੀ ਕਰਨੀ
ਘਰੇਂ ਨਈਂ ਸੀ ਡੱਕਾ ਤੋੜਿਆ ।
ਆਖਾ ਮੰਨਿਆਂ ਨਹੀਂ ਸੀ ਕਦੇ ਮਾਂ ਦਾ
ਗੋਰੇ ਦਾ ਨਈਓਂ ਕਿਹਾ ਮੋੜਿਆ ।
ਸਾਡੇ ਬੱਚਿਆਂ ਨੂੰ ਮਾਰ ਲਿਆ ਰੀਸ ਨੇ
ਤੇ ਘਰ – ਬਾਰ ਪੈ ਗਏ ਵੇਚਣੇ ;
ਪੈ ‘ਗੇ ਸੱਪ ਦੀ ਸਿਰੀ ਤੋਂ ਪੌਂਡ ਚੱਕਣੇ
ਤੇ ਆਪਾ ਗਿਆ ਏ ਨਿਚੋੜਿਆ ।
ਮੂਲ ਚੰਦ ਸ਼ਰਮਾ ਪ੍ਰਧਾਨ ,
ਪੰਜਾਬੀ ਸਾਹਿਤ ਸਭਾ ਧੂਰੀ ਜਿਲ੍ਹਾ ਸੰਗਰੂਰ ।
9914836037
