(ਸਮਾਜ ਵੀਕਲੀ)
ਉਸ ਪੁੱਛਿਆ
ਸੌਂਵੇਗੀ ਮੇਰੇ ਨਾਲ
ਪਰ ਮੈਂ ਕੋਈ ਵਾਅਦਾ ਨਹੀਂ ਕਰਾਂਗਾ
ਤੇਰਾ ਸਾਥ ਦੇਣ ਦਾ
ਹਾਂ !! ਤੈਨੂੰ
ਪਿਆਰ ਵੀ ਨਹੀਂ ਕਰਦਾ
ਮੈਂ ਪੁੱਛਿਆ
ਮੈਂ ਪਿਆਰ ਵਿੱਚ
ਸਭ ਕੁਝ ਸਾਂਝਾ ਕਰ ਸਕਦੀ
ਪਰ ਤੂੰ
ਪਿਆਰ ਤੋਂ ਇਨਕਾਰੀ ਹੈ
ਉਸ ਕਿਹਾ
ਜਿਸਮਾਂ ਦੀ ਸਾਂਝ
ਪਿਆਰ ਹੀ ਤਾਂ ਹੁੰਦੀ
ਆਪਾਂ
ਬੇਗਰਜ਼ ਪਿਆਰ ਕਰਾਂਗੇ
ਮੈਂ ਪੁੱਛਿਆ
ਸੌਦਾ ਹੈ
ਪਿਆਰ ਕਿੱਥੇ ਇਸ ਵਿੱਚ
ਉਸ ਕਿਹਾ
ਪਿਆਰ ਪਿਊਰ ਕੁਝ ਨਹੀਂ ਹੁੰਦਾ
ਸਭ ਫੋਕੇ ਫ਼ਲਸਫ਼ੇ ਨੇ
ਜਿਸਮ ਦੀ ਸਾਂਝ
ਬਸ ਇਹੀ ਹੈ ਸਭ ਕੁਝ
ਮੈਂ ਕਿਹਾ
ਹੁੰਦਾ ਹੈ ਪਿਆਰ
ਰੂਹਾਂ ਦਾ ਮੇਲ
ਜਿਸਮਾਂ ਤੋਂ ਪਰ੍ਹੇ
ਤੂੰ ਨਹੀਂ ਸਮਝੇਗਾ
ਉਸ ਕਿਹਾ
ਤੂੰ ਚੰਗੀ ਹੈਂ
ਪਤਾ ਨਹੀਂ ਕਿਹੜੇ ਯੁੱਗ ਦੀ
ਭਟਕਦੀ ਆਤਮਾ
ਮੈਂ ਕਿਹਾ
ਤੂੰ ਵੀ ਭਟਕ ਹੀ ਰਿਹਾਂ
ਜਿਸਮ ਦਰ ਜਿਸਮ
ਕਦੀ ਮਿਲੀਂ ਕਿਸੇ ਰੂਹ ਨੂੰ
ਮੁੱਕ ਜਾਵੇਗੀ
ਤੇਰੀ ਭਟਕਣਾ
ਹਰਪ੍ਰੀਤ ਕੌਰ ਸੰਧੂ
