ਦੋ ਪੁਲਾਂ ਦੇ ਵਾਂਗੂੰ…….

(ਸਮਾਜ ਵੀਕਲੀ)

ਦੋ ਪੁਲਾਂ ਦੇ ਵਾਂਗੂੰ ਸੱਜਣਾਂ,
ਨਾ ਮੇਲ ਹੋਇਆ ਨਾ ਵਿੱਛੜ ਸਕੇ।
ਪੌੜੀ ਵਿੱਚੋਂ ਟੁੱਟ ਗਏ ਪੌਡੇ,
ਨਾ ਉੱਤਰ ਹੋਇਆ ਨਾ ਸਿਖ਼ਰ ਚੜੇ।
ਦੋ ਪੁਲਾਂ ਦੇ……
ਉੱਗੇ ਸੀ ਭਾਵੇਂ ਕਲੀਆਂ ਬਣ ਕੇ,
ਪਰ ਫੁੱਲਾਂ ਵਾਂਗ ਖਿੜ ਨਾ ਸਕੇ।
ਘੁਮਿਆਰ ਦੇ ਚਾਕ ਵਿੱਚ ਪੱਕੇ ਨਾ,
ਤੇ ਕੱਚੇ ਘੜੇ ਵਾਂਗ ਤਿੜ ਨਾ ਸਕੇ।
ਨਾ ਹੀ ਵਰਖਾ ਬਣ ਕੇ ਵਰ੍ਹ ਹੋਇਆ,
ਤੇ ਨਾ ਮੌਸਮ ਵਾਂਗੂੰ ਨਿੱਖਰ ਸਕੇ।
ਦੋ ਪੁਲਾਂ ਦੇ….
ਦਿਲ ਦੇ ਵਿੱਚ ਹੀ ਦਰਦ ਲਕੋ ਲਏ,
ਛਮ ਛਮ ਪੈਂਦੇ ਮੀਂਹ ਵਿੱਚ ਰੋਏ।
ਕਿੱਦਾਂ ਪੁੱਟ ਕੇ ਸੁੱਟਾ ਬੀਅ ਜਿਹੜੇ,
ਕਰਮਾਂ ਵਾਲੀ ਨੀਂਹ ਵਿੱਚ ਬੋਏ।
ਸੜ ਗਏ ਬੂਟੇ ਛਾਂ ਬਹੁਤੀ ਵਿੱਚ,
ਖਿੜ ਗਏ ਜਿਹੜੇ ਤਿੱਖੜ ਤੜੇ।
ਦੋ ਪੁਲਾਂ ਦੇ ਵਾਂਗੂੰ ਸੱਜਣਾਂ,
ਨਾ ਮੇਲ਼ ਹੋਇਆ ਨਾ ਵਿੱਛੜ ਸਕੇ।

ਮਨਜੀਤ ਕੌਰ ਲੁਧਿਆਣਵੀ

ਸ਼ੇਰਪੁਰ, ਲੁਧਿਆਣਾ। ਸੰ:9464633059

‘ਸਮਾਜ ਵੀਕਲੀ’ ਐਪ ਡਾਊਨਲੋਡ ਕਰਨ ਲਈ ਹੇਠ ਦਿਤਾ ਲਿੰਕ ਕਲਿੱਕ ਕਰੋ
https://play.google.com/store/apps/details?id=in.yourhost.samajweekly