ਨੇਕੀ ਦਾ ਪ੍ਰਚਾਰ ਬਿਲਕੁਲ ਝੂਠਾ
ਜਲੰਧਰ (ਸਮਾਜ ਵੀਕਲੀ) : ਆਲ ਇੰਡੀਆ ਸਮਤਾ ਸੈਨਿਕ ਦਲ (ਰਜਿ.) ਪੰਜਾਬ ਇਕਾਈ ਦੇ ਸੂਬਾ ਪ੍ਰਧਾਨ ਜਸਵਿੰਦਰ ਵਰਿਆਣਾ ਨੇ ਪ੍ਰੈਸ ਬਿਆਨ ਜਾਰੀ ਕਰਦਿਆਂ ਕਿਹਾ ਕਿ ਕੁਝ ਦਿਨ ਪਹਿਲਾਂ ਨਿਊਜ਼ੀਲੈਂਡ ਤੋਂ ਰੇਡੀਓ ਚੈਨਲ ਚਲਾਉਣ ਵਾਲੇ ਹਰਨੇਕ ਨੇਕੀ ਨੇ ਬਾਬਾ ਸਾਹਿਬ ਡਾ.ਬੀ.ਆਰ.ਅੰਬੇਡਕਰ ਦਾ ਸੰਵਿਧਾਨ ਬਣਾਉਣ ਦਾ ਮੁੱਦਾ ਲੈ ਕੇ ਉਨ੍ਹਾਂ ਨੂੰ ਅਪਮਾਨਜਨਕ ਸ਼ਬਦ ਕਹੇ ਜੋ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਰਹੇ ਹਨ। ਨੇਕੀ ਨੇ ਬਾਬਾ ਸਾਹਿਬ ਬਾਰੇ ਕਾਲਪਨਿਕ ਗੱਲਾਂ ਕਹੀਆਂ ਹਨ। ਵਰਿਆਣਾ ਨੇ ਕਿਹਾ ਕਿ ਬਾਬਾ ਸਾਹਿਬ ਨੇ ਸੰਵਿਧਾਨਕ ਬਹਿਸ ਦੇ ਹਰ ਨੁਕਤੇ ‘ਤੇ ਆਪਣੇ ਵਿਵੇਕ ਨਾਲ ਸੰਵਿਧਾਨ ਸਭਾ ਨੂੰ ਸੰਤੁਸ਼ਟ ਕੀਤਾ। 5 ਨਵੰਬਰ 1948 ਨੂੰ ਸੰਵਿਧਾਨ ਸਭਾ ਨੂੰ ਦਿੱਤੇ ਆਪਣੇ ਭਾਸ਼ਣ ਵਿੱਚ ਖਰੜਾ ਕਮੇਟੀ ਦੇ ਮੈਂਬਰ ਸ਼੍ਰੀ ਟੀ.ਟੀ ਕ੍ਰਿਸ਼ਨਾਮਾਚਾਰੀ ਨੇ ਬਾਬਾ ਸਾਹਿਬ ਦੁਆਰਾ ਕੀਤੀ ਸਖ਼ਤ ਮਿਹਨਤ ਦੀ ਪ੍ਰਸ਼ੰਸਾ ਕਰਦਿਆਂ ਕਿਹਾ: “ਸ਼ਾਇਦ ਸਦਨ ਜਾਣਦਾ ਹੈ ਕਿ ਸੰਵਿਧਾਨ ਦਾ ਖਰੜਾ ਤਿਆਰ ਕਰਨ ਵਾਲੇ ਸੱਤ ਮੈਂਬਰ ਨਿਯੁਕਤ ਕੀਤੇ ਸਨ।
ਉਨ੍ਹਾਂ ਵਿੱਚੋਂ ਇੱਕ ਦੀ ਮੌਤ ਹੋ ਗਈ, ਅਤੇ ਉਸਦੀ ਥਾਂ ‘ਤੇ ਇਕ ਹੋਰ ਮੈਂਬਰ ਨਿਯੁਕਤ ਕੀਤਾ ਗਿਆ। ਇੱਕ ਹੋਰ ਦੀ ਮੌਤ ਹੋ ਗਈ ਪਰ ਉਸਦੀ ਜਗ੍ਹਾ ਨਹੀਂ ਭਰੀ ਗਈ। ਇਕ ਮੈਂਬਰ ਅਮਰੀਕਾ ਵਿਚ ਰਹਿ ਗਿਆ। ਉਨ੍ਹਾਂ ਦਾ ਅਹੁਦਾ ਵੀ ਖਾਲੀ ਰਿਹਾ। ਇੱਕ ਹੋਰ ਮੈਂਬਰ ਨੇ ਆਪਣੇ ਪ੍ਰਸ਼ਾਸਨ ਦੀਆਂ ਮੁਸ਼ਕਲਾਂ ਤੋਂ ਸੰਨਿਆਸ ਨਹੀਂ ਲਿਆ। ਉਸਦੀ ਵੀ ਘਾਟ ਸੀ। ਇਕ-ਦੋ ਮੈਂਬਰ ਦਿੱਲੀ ਤੋਂ ਕਾਫੀ ਦੂਰ ਰਹੇ ਅਤੇ ਸ਼ਾਇਦ ਸਿਹਤ ਖਰਾਬ ਹੋਣ ਕਾਰਨ ਇਸ ਕੰਮ ਵਿਚ ਹਿੱਸਾ ਨਾ ਲੈ ਸਕੇ। ਇਸ ਤਰ੍ਹਾਂ ਕਾਨੂੰਨ ਦਾ ਖਰੜਾ ਤਿਆਰ ਕਰਨ ਦਾ ਕੰਮ ਆਖਰਕਾਰ ਡਾ. ਅੰਬੇਡਕਰ ਦੇ ਮੋਢਿਆਂ ‘ਤੇ ਆ ਗਿਆ। ਮੈਂ ਉਨ੍ਹਾਂ ਦਾ ਬਹੁਤ ਧੰਨਵਾਦੀ ਹਾਂ ਕਿ ਉਨ੍ਹਾਂ ਨੇ ਇਹ ਕੰਮ ਕਿੰਨਾ ਸ਼ਲਾਘਾਯੋਗ ਕੀਤਾ ਹੈ।” ਜਵਾਹਰ ਲਾਲ ਨਹਿਰੂ ਨੇ 6 ਦਸੰਬਰ 1956 ਨੂੰ ਲੋਕ ਸਭਾ ਵਿਚ ਆਪਣੇ ਭਾਸ਼ਣ ਵਿਚ ਕਿਹਾ, ”ਡਾ. ਭੀਮ ਰਾਓ ਅੰਬੇਡਕਰ ਭਾਰਤੀ ਸੰਵਿਧਾਨ ਦੇ ਮੁੱਖ ਆਰਕੀਟੈਕਟ ਸਨ।”
ਨੋਬਲ ਪੁਰਸਕਾਰ ਜੇਤੂ ਅਮਰਤਿਆਸੇਨ ਨੇ ਡਾ.ਅੰਬੇਡਕਰ ਬਾਰੇ ਕਿਹਾ- “ਡਾ. ਅੰਬੇਡਕਰ ਅਰਥ ਸ਼ਾਸਤਰ ਵਿੱਚ ਮੇਰੇ ਪਿਤਾ ਹਨ। ਉਹ ਦੱਬੇ-ਕੁਚਲੇ ਲੋਕਾਂ ਦਾ ਅਸਲੀ ਨਾਮਵਰ ਚੈਂਪੀਅਨ ਹਨ। ਉਨ੍ਹਾਂ ਨੇ ਅੱਜ ਜੋ ਕੁਝ ਪ੍ਰਾਪਤ ਕੀਤਾ ਹੈ ਉਸ ਤੋਂ ਵੱਧ ਉਹ ਹੱਕਦਾਰ ਹਨ। ਵਰਿਆਣਾ ਨੇ ਅੱਗੇ ਕਿਹਾ ਕਿ ਜੇਕਰ ਨੇਕੀ ਨੇ ਉਸ ਸਮੇਂ ਦੇ ਕੌਮੀ ਆਗੂਆਂ ਦੇ ਵਿਚਾਰ ਸੁਣੇ ਹੁੰਦੇ ਅਤੇ ਸੰਵਿਧਾਨ ‘ਤੇ ਬਹਿਸ ਪੜ੍ਹੀ ਹੁੰਦੀ ਤਾਂ ਉਹ ਪੂਰੀ ਤਰ੍ਹਾਂ ਜਾਣੂ ਹੁੰਦਾ। ਉਹ ਬਾਬਾ ਸਾਹਿਬ ਡਾ.ਅੰਬੇਡਕਰ ਬਾਰੇ ਗਲਤ ਗੱਲਾਂ ਕਹਿ ਕੇ ਕੂੜ ਪ੍ਰਚਾਰ ਕਰ ਰਿਹਾ ਹੈ। ਵਰਿਆਣਾ ਨੇ ਕਿਹਾ ਕਿ ਆਲ ਇੰਡੀਆ ਸਮਤਾ ਸੈਨਿਕ ਦਲ ਨੇਕੀ ਵੱਲੋਂ ਬਾਬਾ ਸਾਹਿਬ ਬਾਰੇ ਕੀਤੇ ਜਾ ਰਹੇ ਕੂੜ ਪ੍ਰਚਾਰ ਦੀ ਨਿਖੇਧੀ ਕਰਦਾ ਹੈ।
ਜਸਵਿੰਦਰ ਵਰਿਆਣਾ
ਸੂਬਾ ਪ੍ਰਧਾਨ
ਆਲ ਇੰਡੀਆ ਸਮਤਾ ਸੈਨਿਕ ਦਲ (ਰਜਿ.) ਪੰਜਾਬ ਇਕਾਈ
ਮੋਬਾਈਲ : 7508080709
‘ਸਮਾਜਵੀਕਲੀ’ ਐਪ ਡਾਊਨਲੋਡ ਕਰਨ ਲਈ ਹੇਠ ਦਿਤਾ ਲਿੰਕ ਕਲਿੱਕ ਕਰੋ
https://play.google.com/store/apps/details?id=in.yourhost.samajweekly
