(ਸਮਾਜ ਵੀਕਲੀ)
ਉਹ ਜੋ ਅਹੁਦਾ ਪਾ ਬੈਠਾ ਹੈ ।
ਮੂੰਹ ਨੂੰ ਛਿਕਲੀ ਲਾ ਬੈਠਾ ਹੈ ।
ਗੱਲ ਕਰੇ ਨਾ ਲੋਕਾਂ ਦੀ ਹੁਣ,
ਜੋ ਰਾਜੇ ਦਰ ਜਾ ਬੈਠਾ ਹੈ ।
ਧਨ ਤੇ ਦੌਲਤ ਉਸ ਨੇ ਪਾਈ,
ਪਰ ਉਹ ਹੋਂਦ ਗੁਆ ਬੈਠਾ ਹੈ ।
ਝੂਠੇ ਦੀ ਉਹ ਉਸਤਤ ਕਰਦਾ ,
ਸੱਚ ਨੂੰ ਜੋ ਠੁਕਰਾ ਬੈਠਾ ਹੈ ।
ਉੱਚਿਆਂ ਨਾਲ ਯਰਾਨਾ ਲਾ ਉਹ,
ਨੀਵੇਂ ਭੁੱਲ – ਭੁਲਾ ਬੈਠਾ ਹੈ ।
ਚੋਰ ਚੁਰਾ ਕੇ ਲਿਖਤ ਕਿਸੇ ਦੀ,
ਆਪਣਾ ਨਾਂ ਚਮਕਾ ਬੈਠਾ ਹੈ ।
ਖ਼ੌਰੇ ਕਿਸ- ਕਿਸ ਥਾਂ ‘ਤੇ ਉੱਲੂ,
ਬੁੱਧੀਮਾਨ ਕਹਾ ਬੈਠਾ ਹੈ ।
ਸੱਚ ਉਜ਼ਾਗਰ ਹੁੰਦੇ ਪਲ ਹੀ,
ਕਪਟੀ ਨੱਕ ਵਢਾ ਬੈਠਾ ਹੈ ।
ਸੱਚ ਸਦਾ ਚੁਭ ਜਾਂਦਾ,ਫਿਰ ਵੀ,
ਸੱਚ ਨਿਸ਼ਾਨ ਸੁਣਾ ਬੈਠਾ ਹੈ ।
ਨਿਸ਼ਾਨ ਸਿੰਘ
ਪਿੰਡ ਤੇ ਡਾਕ : ਜੌੜਾ ਸਿੰਘਾ
ਜ਼ਿਲ੍ਹਾ: ਗੁਰਦਾਸਪੁਰ
ਫੋਨ 9646540249
