ਨਸ਼ਿਆ ਦਾ ਤਿਆਗ ਜਿੰਦਗ਼ੀ ਜਿੰਦਾਬਾਦ (ਨਸ਼ਿਆਂ ਤੋਂ ਦੂਰ, ਸਿਹਤਮੰਦ ਜੀਵਨ ਦੀ ਓਰ)

     (ਸਮਾਜ ਵੀਕਲੀ)   ਜ਼ਿੰਦਗੀ ਕੁਦਰਤ ਦਾ ਦਿੱਤਾ ਹੋਇਆ ਇੱਕ ਅਨਮੋਲ ਤੋਹਫਾ ਹੈ ਜੋ ਸਾਨੂੰ ਸਿਰਫ ਇੱਕ ਵਾਰ ਮਿਲਦਾ ਹੈ। ਇਹ ਸਾਡੇ ਤੇ ਨਿਰਭਰ ਕਰਦਾ ਹੈ ਕਿ ਅਸੀਂ ਇਸ ਦਾ ਆਨੰਦ ਮਾਨਣਾ ਹੈ ਜਾਂ ਫਿਰ ਇਸ ਨੂੰ ਮਾੜੀਆਂ ਆਦਤਾਂ ਨਾਲ ਨਸ਼ਟ ਕਰਨਾ ਹੈ। ਕੁੱਝ ਵਿਅਕਤੀ ਇਸ ਤਰ੍ਹਾਂ ਦੀ ਸੋਹਣੀ ਜ਼ਿੰਦਗੀ ਜਿਊਂਦੇ ਹਨ ਕਿ ਉਹ ਦੂਜਿਆਂ ਦੀ ਵੀ ਲੋੜ ਪੈਣ ਤੇ ਮਦਦ ਕਰਦੇ ਹਨ। ਪਰ ਕੁੱਝ ਵਿਅਕਤੀ ਆਪਣੀਆਂ ਮਾੜੀਆਂ ਆਦਤਾਂ ਕਰਕੇ ਜਿੰਦਗੀ ਨੂੰ ਨਰਕ ਬਣਾ ਲੈਂਦੇ ਹਨ ਅਤੇ ਦੂਜਿਆਂ ਦਾ ਵੀ ਨੁਕਸਾਨ ਹੀ ਕਰਦੇ ਹਨ। ਅੱਜ ਮੈਂ ਇਸ ਲੇਖ ਵਿੱਚ ਅਜਿਹੀ ਹੀ ਇਕ ਮਾੜੀ ਆਦਤ ਦੀ ਗੱਲ ਕਰਾਂਗਾ ਜਿਸ ਨਾਲ ਸਿਰਫ ਆਪ ਨੂੰ ਹੀ ਨਹੀਂ ਸਗੋ ਸਮਾਜ ਨੂੰ ਵੀ ਨੁਕਸਾਨ ਹੁੰਦਾ ਹੈ। ਇਹ ਮਾੜੀ ਆਦਤ ਹੈ “ਨਸ਼ੇ ਕਰਨ ਦੀ ਆਦਤ”। ਨਸ਼ੇ ਦੇ ਆਦੀ ਕਈ ਤਰ੍ਹਾਂ ਦੇ ਨਸ਼ੇ ਵਰਤਦੇ ਹਨ, ਜਿਵੇਂ ਕਿ ਸ਼ਰਾਬ, ਸਿਗਰਟ, ਭੰਗ, ਅਫੀਮ, ਹੈਰੋਇਨ ਆਦਿ।

ਨਸ਼ਾ ਕਰਨਾ ਇੱਕ ਅਜਿਹੀ ਆਦਤ ਹੈ ਜੋ ਸਾਡੀ ਜ਼ਿੰਦਗੀ ਨੂੰ ਬਰਬਾਦ ਕਰ ਸਕਦੀ ਹੈ। ਨਸ਼ਾ ਨਾ ਸਿਰਫ਼ ਸਾਡੀ ਸਰੀਰਕ ਸਿਹਤ ਨੂੰ ਨੁਕਸਾਨ ਪਹੁੰਚਾਉਂਦਾ ਹੈ, ਸਗੋਂ ਸਾਡੀ ਮਾਨਸਿਕ ਸਿਹਤ ਅਤੇ ਸਮਾਜਿਕ ਜੀਵਨ ਨੂੰ ਵੀ ਪ੍ਰਭਾਵਿਤ ਕਰਦਾ ਹੈ। ਨਸ਼ੇ ਦੀ ਆਦਤ ਦੇ ਕੁੱਝ ਨੁਕਸਾਨ:-

1. ਸਰੀਰਕ ਨੁਕਸਾਨ:- ਨਸ਼ੇ ਦੀ ਆਦਤ ਦਾ ਸਾਡੇ ਸਰੀਰ ਤੇ ਬਹੁਤ ਮਾੜਾ ਅਸਰ ਹੁੰਦਾ ਹੈ ਜਿਵੇਂ ਕਿ ਦਿਲ ਦੀਆਂ ਸਮੱਸਿਆਵਾਂ, ਦਿਮਾਗ ਦੀਆਂ ਸਮੱਸਿਆਵਾਂ, ਲੀਵਰ ਦੀ ਸਮੱਸਿਆਵਾਂ, ਗੁਰਦਿਆਂ ਦੀਆਂ ਸਮੱਸਿਆਵਾਂ ਆਦਿ।

2. ਮਾਨਸਿਕ ਨੁਕਸਾਨ:- ਨਸ਼ੇ ਦੀ ਆਦਤ ਦਾ ਮਾਨਸਿਕ ਸਿਹਤ ਤੇ ਵੀ ਮਾੜੇ ਪ੍ਰਭਾਵ ਪੈਂਦੇ ਹਨ ਜਿਵੇਂ ਕਿ ਉਦਾਸੀ, ਚਿੰਤਾ, ਯਾਦਾਸਤ ਦਾ ਘਟਣਾ, ਨੀਂਦ ਨਾ ਆਉਣਾ, ਡਿਪਰੈੱਸ਼ਨ ਆਦਿ।

3. ਸਮਾਜਿਕ ਨੁਕਸਾਨ:- ਨਸ਼ੇ ਦੀ ਆਦਤ ਸਮਾਜਿਕ ਜੀਵਨ ਨੂੰ ਵੀ ਪ੍ਰਭਾਵਿਤ ਕਰ ਸਕਦੀ ਹੈ, ਜਿਵੇਂ ਕਿ ਰਿਸ਼ਤਿਆਂ ਵਿੱਚ ਦਰਾਰ ਅਤੇ ਸਮਾਜਿਕ ਮਿਲਾਪ ਘੱਟ ਜਾਣਾ ਆਦਿ। ਅੱਜ ਤਲਾਕ ਦੇ ਕੇਸ ਵੱਧ ਰਹੇ ਹਨ ਜਿਸਦਾ ਮੁੱਖ ਕਾਰਨ ਨਸ਼ੇ ਕਰਨ ਦੀ ਆਦਤ ਹੀ ਹੈ। ਨਸ਼ੇ ਵਿੱਚ ਦਿਮਾਗ ਦੇ ਕੰਟਰੋਲ ਨਹੀਂ ਰਹਿੰਦਾ ਅਤੇ ਵਿਅਕਤੀ ਅਕਸਰ ਦੂਜੇ ਨਾਲ ਲੜਾਈ ਝਗੜੇ ਕਰਨਾ ਸ਼ੁਰੂ ਕਰ ਦਿੰਦਾ ਹੈ।

4. ਆਰਥਿਕ ਨੁਕਸਾਨ:- ਨਸ਼ੇ ਦੀ ਆਦਤ ‘ਤੇ ਖਰਚ ਕਰਨ ਨਾਲ ਆਰਥਿਕ ਸਮੱਸਿਆਵਾਂ ਪੈਦਾ ਹੋ ਸਕਦੀਆਂ ਹਨ। ਨਸ਼ਿਆ ਦੀ ਆਦਤ ਵਾਲੇ ਵਿਅਕਤੀ ਆਪਣੀ ਆਮਦਨ ਦਾ ਜਿਆਦਾ ਹਿੱਸਾ ਤਾਂ ਨਸ਼ਿਆਂ ਵਿੱਚ ਹੀ ਉਜਾੜ ਦਿੰਦਾ ਹੈ। ਇਕ ਵਿਅਕਤੀ ਦੇ ਨਸ਼ੇ ਕਰਨ ਦੀ ਆਦਤ ਪੂਰੇ ਪਰਿਵਾਰ ਲਈ ਆਰਥਿਕ ਸੰਕਟ ਲਿਆਉਂਦੀ ਹੈ।

5. ਕਾਨੂੰਨੀ ਸਮੱਸਿਆਵਾਂ:- ਨਸ਼ੇ ਦੀ ਆਦਤ ਅਤੇ ਤਸਕਰੀ ਨਾਲ ਜੁੜੀਆਂ ਕਾਨੂੰਨੀ ਸਮੱਸਿਆਵਾਂ ਵੀ ਹੋ ਸਕਦੀਆਂ ਹਨ। ਨਸ਼ਾ ਕਰਨਾ ਹੀ ਗਲਤ ਨਹੀਂ ਹੈ ਨਸ਼ਿਆਂ ਦਾ ਵਪਾਰ ਕਰਨ ਤਾਂ ਹੋਰ ਵੀ ਜਿਆਦਾ ਘਾਤਕ ਹੈ। ਨਸ਼ਿਆਂ ਦੀ ਆਦਤ ਵਿਚ ਫਸੇ ਕੁੱਝ ਵਿਅਕਤੀ ਨਸ਼ੇ ਵੇਚਣ ਦਾ ਕੰਮ ਵੀ ਕਰਨਾ ਸ਼ੁਰੂ ਕਰ ਦਿੰਦੇ ਹਨ ਜੋ ਕਿ ਉਹਨਾਂ ਲਈ ਬਾਅਦ ਵਿੱਚ ਬਹੁਤ ਵੱਡੀ ਸਮੱਸਿਆ ਬਣਦਾ ਹੈ।

ਸਿੱਟਾ:-ਨਸ਼ੇ ਦੀ ਆਦਤ ਅਤੇ ਇਸਦੇ ਨੁਕਸਾਨ ਤੋਂ ਬਚਣ ਲਈ ਜਾਗਰੂਕਤਾ ਅਤੇ ਸਿੱਖਿਆ ਜ਼ਰੂਰੀ ਹੈ। ਜ਼ਿੰਦਗੀ ਨੂੰ ਬਿਹਤਰ ਬਣਾਉਣ ਲਈ ਨਸ਼ਾ ਛੱਡਣਾ ਜ਼ਰੂਰੀ ਹੈ। ਇਨਸਾਨ ਨੂੰ ਨਸ਼ੇ ਵਰਗੀਆਂ ਬੁਰੀਆਂ ਆਦਤਾਂ ਤੋਂ ਬਚਣਾ ਚਾਹੀਦਾ ਹੈ ਅਤੇ ਆਪਣੇ ਟੀਚਿਆਂ ਅਤੇ ਸੁਪਨਿਆਂ ‘ਤੇ ਧਿਆਨ ਕੇਂਦਰਿਤ ਕਰਨਾ ਚਾਹੀਦਾ ਹੈ। ਨਸ਼ੇ ਤੋਂ ਛੁਟਕਾਰਾ ਪਾਉਣ ਲਈ ਵਿਅਕਤੀ ਨੂੰ ਆਪਣੇ ਪਰਿਵਾਰ ਅਤੇ ਦੋਸਤਾਂ ਦਾ ਸਮਰਥਨ ਲੈਣਾ ਚਾਹੀਦਾ ਹੈ ਅਤੇ ਨਸ਼ਾ ਛੁਡਾਊ ਕੇਂਦਰਾਂ ਤੋਂ ਮਦਦ ਲੈਣੀ ਚਾਹੀਦੀ ਹੈ। ਨਸ਼ਾ ਛੱਡ ਕੇ, ਅਸੀਂ ਆਪਣੀ ਜ਼ਿੰਦਗੀ ਨੂੰ ਬਿਹਤਰ ਬਣਾ ਸਕਦੇ ਹਾਂ। ਸਭ ਤੋਂ ਜਰੂਰੀ ਹੈ ਸਿਹਤ ਦਾ ਧਿਆਨ ਰੱਖਣਾ, ਸਿਹਤਮੰਦ ਰਹਿਣ ਲਈ ਚੰਗਾ ਭੋਜਨ ਖਾਣਾ ਚਾਹੀਦਾ ਹੈ। ਸਾਨੂੰ ਆਪਣੇ ਮਨ ਨੂੰ ਸ਼ਾਂਤ ਅਤੇ ਸਕਾਰਾਤਮਕ ਰੱਖਣਾ ਚਾਹੀਦਾ ਹੈ ਅਤੇ ਜ਼ਿੰਦਗੀ ਦੀਆਂ ਚੁਣੌਤੀਆਂ ਦਾ ਸਾਹਮਣਾ ਕਰਨ ਲਈ ਤਿਆਰ ਰਹਿਣਾ ਚਾਹੀਦਾ ਹੈ।

“ਨਸ਼ਿਆ ਦਾ ਤਿਆਗ, ਜਿੰਦਗ਼ੀ ਜਿੰਦਾਬਾਦ”

ਸਮਾਜਵੀਕਲੀ’ ਐਪਡਾਊਨਲੋਡਕਰਨਲਈਹੇਠਦਿਤਾਲਿੰਕਕਲਿੱਕਕਰੋ
https://play.google.com/store/apps/details?id=in.yourhost.samajweekly