ਲੰਡਨ (ਰਾਜਵੀਰ ਸਮਰਾ)(ਸਮਾਜ ਵੀਕਲੀ) : ਬ੍ਰਿਟੇਨ ਦੇ ਪ੍ਰਧਾਨ ਮੰਤਰੀ ਬੋਰਿਸ ਜਾਨਸਨ ਨੇ ਕਿਹਾ ਹੈ ਕਿ ਆਕਸਫੋਰਡ-ਐਸਟਰਾਜੇਨੇਕਾ ਦੀ ਕੋਰੋਨਾ ਵਾਇਰਸ ਵੈਕਸੀਨ 65 ਸਾਲ ਤੋਂ ਜ਼ਿਆਦਾ ਉਮਰ ਵਾਲੇ ਲੋਕਾਂ ਉੱਤੇ ਵੀ ਪੂਰੀ ਤਰ੍ਹਾਂ ਨਾਲ ਕਾਰਗਰ ਹੈ। ਉਨ੍ਹਾਂ ਨੇ ਜਰਮਨੀ ਦੇ ਵੈਕਸੀਨ ਦੇ ਅੰਕੜੇ ਉੱਤੇ ਸਵਾਲ ਚੁੱਕਣ ਨੂੰ ਵੀ ਖਾਰਿਜ ਕਰ ਦਿੱਤਾ।
ਦਰਅਸਲ ਇਸ ਤੋਂ ਪਹਿਲਾਂ ਜਰਮਨੀ ਨੇ ਆਕਸਫੋਰਡ ਦੀ ਵੈਕਸੀਨ ਨੂੰ 65 ਸਾਲ ਜਾਂ ਉਸ ਤੋਂ ਘੱਟ ਲੋਕਾਂ ਨੂੰ ਹੀ ਲਗਾਉਣ ਦੀ ਸਿਫਾਰਿਸ਼ ਕੀਤੀ ਸੀ। ਜਰਮਨੀ ਨੇ ਕਿਹਾ ਸੀ ਕਿ 65 ਸਾਲ ਸਾਲ ਤੋਂ ਜ਼ਿਆਦਾ ਉਮਰ ਦੇ ਲੋਕਾਂ ਉੱਤੇ ਇਸ ਵੈਕਸੀਨ ਦੇ ਪ੍ਰਭਾਵ ਦਾ ਲੋੜੀਂਦੀ ਸੰਖਿਆ ਨਹੀਂ ਹੈ। ਬ੍ਰਿਟਿਸ਼ ਨਿਆਮਕ ਇਕ ਮੈਡੀਕਲ ਜਰਨਲ ਵਿਚ ਪ੍ਰਕਾਸ਼ਿਤ ਡਾਟਾ ਉੱਤੇ ਭਰੋਸਾ ਕਰ ਰਹੇ ਹਨ, ਜਿਸ ਵਿਚ ਟਰਾਇਲ ਦੌਰਾਨ ਬੁਜਰਗਾਂ ਵਿਚ 100 ਫੀਸਦੀ ਐਂਟੀਬਾਡੀ ਪਾਈ ਗਈ ਸੀ। ਜਰਮਨੀ ਨੇ ਇਹ ਕਦਮ ਅਜਿਹੇ ਸਮੇਂ ਉੱਤੇ ਚੁੱਕਿਆ ਹੈ ਜਦੋਂ ਯੂਰਪੀਅਨ ਯੂਨੀਅਨ ਅਤੇ ਐਸਟਰਾਜੇਨੇਕਾ ਵਿਚਾਲੇ ਵੈਕਸੀਨ ਦੀ ਸਪਲਾਈ ਨੂੰ ਲੈ ਕੇ ਵਿਵਾਦ ਚੱਲ ਰਿਹਾ ਹੈ। ਬ੍ਰਿਟੇਨ ਲੋਕਾਂ ਨੂੰ ਕੋਰੋਨਾ ਵੈਕਸੀਨ ਲਗਾਉਣ ਦੇ ਮਾਮਲੇ ਵਿਚ ਬਹੁਤ ਅੱਗੇ ਨਿਕਲਦਾ ਜਾ ਰਿਹਾ ਹੈ, ਉਥੇ ਹੀ ਯੂਰਪ ਦੇ ਹੋਰ ਦੇਸ਼ ਅਜੇ ਪਛੜੇ ਹੋਏ ਹਨ।
ਸਕਾਟਲੈਂਡ ਦੀ ਯਾਤਰਾ ਉੱਤੇ ਗਏ ਬੋਰਿਸ ਜਾਨਸਨ ਨੇ ਕਿਹਾ ਕਿ ਉਹ ਜਰਮਨੀ ਤੋਂ ਆਈ ਖਬਰ ਨੂੰ ਲੈ ਕੇ ਚਿੰਤਤ ਨਹੀਂ ਹਨ। ਉਨ੍ਹਾਂ ਨੇ ਕਿਹਾ ਕਿ ਦਵਾਈਆਂ ਦੀ ਨਿਆਮਕ ਏਜੰਸੀ ਨੇ ਇਹ ਸਪੱਸ਼ਟ ਕਰ ਦਿੱਤਾ ਹੈ ਕਿ ਉਹ ਸਮਝਦੇ ਹਨ ਕਿ ਆਕਸਫੋਰਡ ਦੀ ਕੋਰੋਨਾ ਵੈਕਸੀਨ ਸਿਰਫ ਇਕ ਡੋਜ਼ ਦੇਣ ਨਾਲ ਹੀ ਪ੍ਰਭਾਵੀ ਸੁਰੱਖਿਆ ਦਿੰਦੀ ਹੈ। ਇਹੀ ਨਹੀਂ ਦੂਜਾ ਡੋਜ਼ ਦੇਣ ਉੱਤੇ ਅਤੇ ਜ਼ਿਆਦਾ ਸੁਰੱਖਿਆ ਮਿਲਦੀ ਹੈ। ਉਨ੍ਹਾਂ ਨੇ ਕਿਹਾ ਕਿ ਸਿਹਤ ਨਿਆਮਕ ਨੇ ਸਿੱਟੇ ਦੇ ਤੌਰ ਉੱਤੇ ਪਾਇਆ ਹੈ ਕਿ ਇਹ ਹਰ ਉਮਰ ਦੇ ਲੋਕਾਂ ਲਈ ਕਾਰਗਰ ਹੈ। ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਉਹ ਜਰਮਨੀ ਦੇ ਸਿੱਟੇ ਨਾਲ ਸਹਿਮਤ ਨਹੀਂ ਹਨ।
