(ਸਮਾਜ ਵੀਕਲੀ) ਅੱਜ ਦੇ ਵਿਗਿਆਨਕ ਯੁੱਗ ਵਿੱਚ ਜਦੋਂ ਮਨੁੱਖ ਹਰੇਕ ਰੋਗ ਦਾ ਇਲਾਜ ਦਵਾਈਆਂ ਅਤੇ ਮਸ਼ੀਨਾਂ ਵਿੱਚ ਲੱਭ ਰਿਹਾ ਹੈ, ਉਸ ਵੇਲੇ ਇੱਕ ਅਜਿਹੀ ਕੁਦਰਤੀ ਸ਼ਕਤੀ ਵੀ ਮੌਜੂਦ ਹੈ ਜੋ ਬਿਨਾਂ ਕਿਸੇ ਦਵਾਈ ਦੇ ਸਰੀਰਕ ਤੇ ਮਾਨਸਿਕ ਰੋਗਾਂ ਨੂੰ ਠੀਕ ਕਰਨ ਦੀ ਸਮਰਥਾ ਰੱਖਦੀ ਹੈ। ਇਹ ਹੈਰਾਨੀ ਦੀ ਗੱਲ ਹੈ ਪਰ ਸੱਚ ਹੈ, ਇਹ ਸ਼ਕਤੀ ਹੈ ‘ਰੇਕੀ’। ‘ਰੇਕੀ’ ਦਰਅਸਲ ਧਿਆਨ ਤੇ ਆਤਮਿਕ ਸ਼ਕਤੀ ਦਾ ਰੂਪ ਹੈ, ਜਿਸ ਨੂੰ ਪ੍ਰਾਪਤ ਕਰਨ ਲਈ ਸਿਰਫ਼ ਵਿਸ਼ਵਾਸ, ਧਿਆਨ ਤੇ ਸੱਚੀ ਲਗਨ ਦੀ ਲੋੜ ਹੈ। ਇਸ ਸ਼ਕਤੀ ਦੀ ਖੋਜ ਅਠਾਰਵੀਂ ਸਦੀ ‘ਚ ਜਾਪਾਨ ਦੇ ਡਾ. ਯਸੂਈ ਨੇ ਕੀਤੀ। ਯਸੂਈ ਇਸ ਗੱਲ ਨਾਲ ਪ੍ਰੇਰਿਤ ਸਨ ਕਿ ਪੁਰਾਤਨ ਕਾਲਾਂ ਵਿੱਚ ਲੋਕ ਬਿਨਾਂ ਦਵਾਈਆਂ ਦੇ ਹੀ ਆਪਣੇ ਰੋਗਾਂ ਦਾ ਇਲਾਜ ਕਰਦੇ ਸਨ, ਉਹ ਵੀ ਕੁਦਰਤੀ ਊਰਜਾ ਦੁਆਰਾ।ਉਨ੍ਹਾਂ ਨੇ ਕਈ ਸਾਲਾਂ ਤੱਕ ਇਸ ਦੀ ਖੋਜ ਜਾਰੀ ਰੱਖੀ ਅਤੇ ਅੰਤ ਵਿੱਚ ਇਹ ਗਿਆਨ ਉਨ੍ਹਾਂ ਨੂੰ ਮਹਾਤਮਾ ਬੁੱਧ ਦੀਆਂ ਲਿਖਤਾਂ ਵਿੱਚੋਂ ਪ੍ਰਾਪਤ ਹੋਇਆ। ਇਸ ਤਰ੍ਹਾਂ ਰੇਕੀ ਦਾ ਸਬੰਧ ਵੀ ਅਸਲ ਵਿੱਚ ਭਾਰਤ ਨਾਲ ਹੀ ਜੁੜਿਆ ਹੈ, ਕਿਉਂਕਿ ਮਹਾਤਮਾ ਬੁੱਧ ਭਾਰਤ ਦੀ ਧਰਤੀ ‘ਤੇ ਹੀ ਜਨਮੇ ਅਤੇ ਰਹੇ ਸਨ। ਰੇਕੀ ਬਾਰੇ ਹੋਰ ਜਾਣਕਾਰੀ ਲਈ ਪ੍ਰੇਮਗੜ੍ਹ (ਹੁਸ਼ਿਆਰਪੁਰ) ਦੇ ਰਹਿਣ ਵਾਲੇ ਬਲਬੀਰ ਸਿੰਘ, ਜੋ ਇਸ ਸ਼ਕਤੀ ਦੇ ਗ੍ਰੈਂਡ ਮਾਸਟਰ ਹਨ ਅਤੇ ਜਿਨ੍ਹਾਂ ਨੂੰ ਇੰਗਲੈਂਡ ਦੀ ਪ੍ਰਸਿੱਧ ਸੰਸਥਾ “ਪਿਲਗ੍ਰੀਮ ਹਿਲਰ ਗਰੁੱਪ ਯੂ ਕੇ” ਵੱਲੋਂ ਸਨਮਾਨਿਤ ਕੀਤਾ ਗਿਆ ਹੈ, ਨਾਲ ਗੱਲਬਾਤ ਕੀਤੀ ਗਈ। ਉਨ੍ਹਾਂ ਦੱਸਿਆ ਕਿ ਇਹ ਸ਼ਕਤੀ ਹਰ ਮਨੁੱਖ ਦੇ ਹੱਥਾਂ ਵਿੱਚ ਵਸਦੀ ਹੈ। ਜਿਸ ਤਰ੍ਹਾਂ ਜਾਨਵਰ ਆਪਣੀ ਜੀਭ ਨਾਲ ਜਖ਼ਮ ਠੀਕ ਕਰ ਲੈਂਦੇ ਹਨ, ਓਹੀ ਕੁਦਰਤੀ ਸ਼ਕਤੀ ਮਨੁੱਖ ਨੂੰ ਵੀ ਪ੍ਰਾਪਤ ਹੈ ਹੱਥਾਂ ਰਾਹੀਂ। ਉਨ੍ਹਾਂ ਨੇ ਇੱਕ ਸੁੰਦਰ ਉਦਾਹਰਨ ਦਿੱਤੀ ਜਦੋਂ ਇੱਕ ਮਾਂ ਆਪਣੇ ਰੌਂਦੇ ਬੱਚੇ ਨੂੰ ਗੋਦ ਵਿੱਚ ਚੁੱਕ ਕੇ ਕਹਿੰਦੀ ਹੈ “ਸੋਂ ਜਾ ਮੇਰੇ ਪੁੱਤ ਸੋਂ ਜਾ” ਤੇ ਉਸਦੇ ਸਿਰ ‘ਤੇ ਹੱਥ ਫੇਰਦੀ ਹੈ, ਕੁਝ ਹੀ ਪਲਾਂ ਵਿੱਚ ਬੱਚਾ ਚੈਨ ਨਾਲ ਸੌਂ ਜਾਂਦਾ ਹੈ। ਉਸ ਪਲ ਮਾਂ ਦੇ ਹੱਥਾਂ ਵਿਚੋਂ ਉਹੀ ਕੁਦਰਤੀ ਊਰਜਾ ਦੀਆਂ ਕਿਰਨਾਂ (ਰੇਕੀ ਊਰਜਾ) ਨਿਕਲਦੀਆਂ ਹਨ ਜੋ ਆਤਮਿਕ ਸ਼ਾਂਤੀ ਦਿੰਦੀਆਂ ਹਨ।
