(ਸਮਾਜ ਵੀਕਲੀ) ਨਿੱਕੇ ਹੁੰਦਿਆਂ ਨੂੰ ਰਿਸ਼ਤਿਆਂ ਅਤੇ ਉਹਨਾਂ ਦੇ ਨਾਵਾਂ ਦੀ ਬਹੁਤੀ ਸਮਝ ਨਹੀਂ ਸੀ । ਜਦੋਂ ਕਦੇ ਪਾਪਾ ਦੇ ਮਾਮੀ ਜੀ ਵਰਗੇ ਸਾਡੇ ਕੋਲ ਆਉਂਦੇ ਤਾਂ ਉਹ ਮੇਰੇ ਦਾਦੀ ਜੀ ਨੂੰ ਬੀਬੀ ਜੀ ਕਹਿੰਦੇ । ਅਸੀਂ ਵੀ ਆਪਣੇ ਦਾਦੀ ਨੂੰ ਸਾਰੇ ਬੀਬੀ ਕਹਿੰਦੇ ਸੀ । ਪਰ ਸਮਝ ਨਾ ਆਉਂਦੀ ਵੀ ਮਾਮੀ ਜੀ ਤਾਂ ਵੱਡੇ ਨੇ ਫਿਰ ਉਹ ਦਾਦੀ ਨੂੰ ਬੀਬੀ ਕਿਉਂ ਕਹਿੰਦੇ ਹਨ । ਹੌਲੀ- ਹੋਲੀ ਵੱਡੇ ਹੋਇਆ ਤੋਂ ਪਤਾ ਲੱਗਿਆ ਵੀ ਮਾਮੀ ਜੀ ਤੇ ਦਾਦੀ ਜੀ ਦਾ ਨਨਾਣ ਭਰਜਾਈ ਦਾ ਰਿਸ਼ਤਾ ਹੈ ਤੇ ਭਰਜਾਈ ਆਪਣੀ ਨਨਾਣ ਨੂੰ ਬੀਬੀ ਕਹਿੰਦੀ ਹੈ । ਮੇਰੇ ਮੰਮੀ ਮੇਰੇ ਭੂਆ ਜੀ ਨੂੰ ਭੈਣ ਜੀ ਕਹਿੰਦੇ । ਸ਼ਾਇਦ ਸਮਾਂ ਬਦਲਣ ਨਾਲ ਬੀਬੀ ਜੀ ਸ਼ਬਦ ਨੇ ਭੈਣ ਜੀ ਸ਼ਬਦ ਦਾ ਰੂਪ ਲੈ ਲਿਆ । ਮੇਰੀ ਭਰਜਾਈ ਮੈਨੂੰ ਦੀਦੀ ਕਹਿ ਬੁਲਾਉਂਦੀ ਹੈ । ਰਿਸ਼ਤਿਆਂ ਦੇ ਨਾਮ ਸਮੇਂ ਨਾਲ ਬਦਲ ਜਾਂਦੇ ਹਨ । ਪਰ ਨਾਮ ਚਾਹੇ ਬਦਲ ਜਾਣ ਪਰ ਰਿਸ਼ਤਿਆਂ ਵਿਚਲਾ ਮੋਹ – ਪਿਆਰ , ਸਨੇਹ ਤੇ ਆਪਣਾਪਨ ਕਦੇ ਵੀ ਨਹੀਂ ਬਦਲਣਾ ਚਾਹੀਦਾ
ਜਸਪ੍ਰੀਤ ਕੌਰ ਧਾਲੀਵਾਲ।
