ਆਰ ਸੀ ਐਫ ਵਿੱਚ ਸ਼ੈੱਲ ਕੋਚ ਡਿੱਗਣ ਤੋਂ ਬਾਅਦ ਕਰਮਚਾਰੀਆਂ ਦਾ ਜ਼ੋਰਦਾਰ ਰੋਸ ਪ੍ਰਦਰਸ਼ਨ

ਕਪੂਰਥਲਾ  (ਸਮਾਜ ਵੀਕਲੀ)  ( ਕੌੜਾ )– ਰੇਲ ਕੋਚ ਫੈਕਟਰੀ (ਆਰ ਸੀ ਐਫ) ਦੀ ਸ਼ੈੱਲ ਸ਼ਾਪ ਵਿੱਚ ਅੱਜ ਇੱਕ ਵੱਡਾ ਹਾਦਸਾ ਹੁੰਦਾ-ਹੁੰਦਾ ਟਲ ਗਿਆ।  ਜਿਸ ਨੇ ਕਰਮਚਾਰੀਆਂ ਵਿੱਚ ਰੋਸ ਭਰ ਦਿੱਤਾ। ਇੱਕ ਸ਼ੈੱਲ ਕੋਚ ਓਵਰਹੈੱਡ ਕ੍ਰੇਨ ਤੋਂ ਹੇਠਾਂ ਡਿੱਗ ਗਿਆ, ਜੋ ਜੇ ਕੁਝ ਸਕਿੰਟ ਪਹਿਲਾਂ ਡਿੱਗਦਾ ਤਾਂ 18-19 ਕਰਮਚਾਰੀਆਂ ਦੀ ਜਾਨ ਜਾ ਸਕਦੀ ਸੀ। ਇਸ ਭਿਆਨਕ ਘਟਨਾ ਤੋਂ ਤੁਰੰਤ ਬਾਅਦ, ਆਰ ਸੀ ਐੱਫ ਇੰਪਲਾਈਜ਼ ਯੂਨੀਅਨ ਸਮੇਤ ਸਾਰੀਆਂ ਕਰਮਚਾਰੀ ਸੰਸਥਾਵਾਂ ਨੇ ਸਾਂਝੇ ਤੌਰ ‘ਤੇ ਇੱਕ ਵਿਸ਼ਾਲ ਰੋਸ ਪ੍ਰਦਰਸ਼ਨ ਸ਼ੁਰੂ ਕਰ ਦਿੱਤਾ। ਕਰਮਚਾਰੀਆਂ ਨੇ “ਪ੍ਰਸ਼ਾਸਨ ਹੋਸ਼ ਵਿੱਚ ਆਓ”, “ਇਨਕਲਾਬ ਜ਼ਿੰਦਾਬਾਦ” ਅਤੇ “ਕਰਮਚਾਰੀ ਏਕਤਾ ਜ਼ਿੰਦਾਬਾਦ” ਦੇ ਨਾਅਰਿਆਂ ਨਾਲ ਆਪਣਾ ਗੁੱਸਾ ਜ਼ਾਹਰ ਕੀਤਾ। ਇਹ ਘਟਨਾ ਸਿਰਫ਼ ਇੱਕ ਹਾਦਸਾ ਨਹੀਂ, ਸਗੋਂ ਭਾਰਤ ਸਰਕਾਰ ਅਤੇ ਰੇਲਵੇ ਪ੍ਰਸ਼ਾਸਨ ਦੀਆਂ ਕਰਮਚਾਰੀ ਵਿਰੋਧੀ ਅਤੇ ਠੇਕੇਦਾਰੀ ਪੱਖੀ ਨੀਤੀਆਂ ਦਾ ਸਿੱਧਾ ਨਤੀਜਾ ਹੈ। ਇਨ੍ਹਾਂ ਨੀਤੀਆਂ ਕਾਰਨ ਹੀ ਪ੍ਰਸ਼ਾਸਨ ਦਾ ਪੂੰਜੀਵਾਦੀ ਚਿਹਰਾ ਬੇਨਕਾਬ ਹੋ ਰਿਹਾ ਹੈ, ਜਿਸ ਦੀ ਬਦੌਲਤ ਆਰ ਸੀ ਐਫ ਵਿੱਚ ਅੰਨ੍ਹੇਵਾਹ ਆਊਟਸੋਰਸਿੰਗ ਵਧਾਈ ਜਾ ਰਹੀ ਹੈ। ਠੇਕੇਦਾਰਾਂ ਨੂੰ ਮੁਨਾਫ਼ਾ ਪਹੁੰਚਾਉਣ ਲਈ ਘਟੀਆ ਕਿਸਮ ਦੀ ਸਮੱਗਰੀ ਦੀ ਵਰਤੋਂ ਕੀਤੀ ਜਾ ਰਹੀ ਹੈ, ਕਰਮਚਾਰੀਆਂ ਦੀਆਂ ਬੁਨਿਆਦੀ ਸਹੂਲਤਾਂ ਵਿੱਚ ਲਗਾਤਾਰ ਕਟੌਤੀ ਕੀਤੀ ਜਾ ਰਹੀ ਹੈ ਅਤੇ ਸੁਰੱਖਿਆ ਨਾਲ ਸ਼ਰੇਆਮ ਖਿਲਵਾੜ ਕੀਤਾ ਜਾ ਰਿਹਾ ਹੈ। ਆਰਸੀਐਫ ਇੰਪਲਾਈਜ਼ ਯੂਨੀਅਨ ਦੇ ਜਨਰਲ ਸਕੱਤਰ ਸਰਵਜੀਤ ਸਿੰਘ ਨੇ ਇਸ ਘਟਨਾ ‘ਤੇ ਤਿੱਖੀ ਪ੍ਰਤੀਕਿਰਿਆ ਦਿੰਦਿਆਂ ਕਿਹਾ ਕਿ, “ਇਸ ਖਿਲਵਾੜ ਦਾ ਖਮਿਆਜ਼ਾ ਸਿਰਫ਼ ਕਰਮਚਾਰੀ ਹੀ ਨਹੀਂ ਭੁਗਤ ਰਹੇ। ਜਦੋਂ ਸੁਰੱਖਿਆ ਨਿਯਮਾਂ ਦੀ ਇਸ ਤਰ੍ਹਾਂ ਉਲੰਘਣਾ ਕੀਤੀ ਜਾਂਦੀ ਹੈ, ਤਾਂ ਇਹ ਦੇਸ਼ ਦੇ ਆਮ ਲੋਕਾਂ ਦੀ ਜਾਨ-ਮਾਲ ਨਾਲ ਵੀ ਖਿਲਵਾੜ ਹੈ, ਜੋ ਸਭ ਤੋਂ ਸਸਤੀ ਰੇਲ ਸਵਾਰੀ ਵਿੱਚ ਸਫ਼ਰ ਕਰਦੇ ਹਨ। ਪ੍ਰਸ਼ਾਸਨ 3000 ਕੋਚਾਂ ਦੇ ਅਭਿਲਾਸ਼ੀ ਟੀਚੇ ਪਿੱਛੇ ਪਾਗਲ ਹੋਇਆ ਪਿਆ ਹੈ। ਇਸ ਟੀਚੇ ਨੂੰ ਪੂਰਾ ਕਰਨ ਲਈ ਨਾ ਤਾਂ ਰੇਲਵੇ ਕੋਲ ਲੋੜੀਂਦਾ ਬੁਨਿਆਦੀ ਢਾਂਚਾ ਹੈ, ਨਾ ਹੀ ਮੈਨ ਪਾਵਰ, ਨਾ ਹੀ ਕੋਚ ਰੱਖਣ ਲਈ ਜਗ੍ਹਾ ਅਤੇ ਨਾ ਹੀ ਜ਼ਰੂਰੀ ਮੈਟੀਰੀਅਲ ਮੁਹੱਈਆ ਕਰਵਾਇਆ ਜਾ ਰਿਹਾ ਹੈ। ਇਸ ਚੱਕਰ ਵਿੱਚ ਪ੍ਰਸ਼ਾਸਨ ਨੇ ਪੂਰੇ ਸਿਸਟਮ ਨੂੰ ਤਹਿਸ-ਨਹਿਸ ਕਰ ਰੱਖਿਆ ਹੈ। ਕਰਮਚਾਰੀਆਂ ਨੂੰ ਕੰਮ ਕਰਨ ਲਈ ਦਸਤਾਨੇ, ਡ੍ਰਿਲ ਮਸ਼ੀਨ, ਡ੍ਰਿਲ ਬਿੱਟ, ਬਿਹਤਰ ਵੈਲਡਿੰਗ ਬਿੱਟ ਵਰਗੇ ਬੁਨਿਆਦੀ ਸੰਦ ਤੱਕ ਮੁਹੱਈਆ ਨਹੀਂ ਕਰਵਾਏ ਜਾ ਰਹੇ ਹਨ। ਸ਼ਾਪ ਵਿੱਚ ਚਾਰ ਜਾਂ ਪੰਜ ਕੋਚ ਰੋਜ਼ਾਨਾ ਬਣਾਉਣ ਦੀ ਜਗ੍ਹਾ ਹੈ, ਜਦਕਿ 9 ਤੋਂ 10 ਕੋਚ ਰੋਜ਼ਾਨਾ ਜ਼ਬਰਦਸਤੀ ਬਣਵਾਉਣ ਦਾ ਦਬਾਅ ਪਾਇਆ ਜਾਂਦਾ ਹੈ। ਭਿਆਨਕ ਗਰਮੀ ਦੇ ਮੌਸਮ ਵਿੱਚ ਪੀਣ ਦਾ ਸਾਫ਼ ਪਾਣੀ, ਕੂਲਰ ਅਤੇ ਹਵਾਦਾਰੀ ਵਰਗੇ ਸਿਸਟਮ ਵੀ ਪੂਰੀ ਤਰ੍ਹਾਂ ਫੇਲ੍ਹ ਹੋ ਰਹੇ ਹਨ। ਪ੍ਰਸ਼ਾਸਨ ਨੂੰ ਸਿਰਫ਼ ਕੋਚ ਉਤਪਾਦਨ ਦਿਖ ਰਿਹਾ ਹੈ। ਉਸ ਨੂੰ ਨਾ ਤਾਂ ਕਰਮਚਾਰੀਆਂ ਦੀ ਸੁਰੱਖਿਆ ਨਾਲ ਕੋਈ ਲੈਣਾ-ਦੇਣਾ ਹੈ ਅਤੇ ਨਾ ਹੀ ਫੈਕਟਰੀ ਵਿੱਚ ਸਫ਼ਾਈ ਦੀ ਪਰਵਾਹ ਹੈ।”ਇਸ ਦੌਰਾਨ ਮਜ਼ਦੂਰ ਯੂਨੀਅਨ ਦੇ ਜਨਰਲ ਸਕੱਤਰ ਰਾਮ ਰਤਨ ਸਿੰਘ, ਐੱਸ ਸੀ ਐੱਸ ਟੀ ਯੂਨੀਅਨ ਦੇ ਜੀਤ ਸਿੰਘ,ਭਾਰਤ ਰਾਜ ਆਦਿ ਵੱਖ ਵੱਖ ਆਗੂਆਂ ਨੇ ਵੀ ਸੰਬੋਧਨ ਕੀਤਾ। ਰੋਸ ਦੇ ਦਬਾਅ ਹੇਠ, ਪ੍ਰਸ਼ਾਸਨ ਨੇ ਇੱਕ ਦਿਨ ਦਾ ਸਮਾਂ ਮੰਗਦਿਆਂ ਘਟਨਾ ਦੀ ਉੱਚ ਪੱਧਰੀ ਜਾਂਚ, ਦੋਸ਼ੀ ਅਧਿਕਾਰੀਆਂ ‘ਤੇ ਸਖ਼ਤ ਕਾਰਵਾਈ ਅਤੇ ਵਰਕਸ਼ਾਪ ਵਿੱਚ ਬਣੇ ਅਸੁਰੱਖਿਅਤ ਹਾਲਾਤ ਨੂੰ ਇੱਕ ਦਿਨ ਦੇ ਅੰਦਰ ਠੀਕ ਕਰਨ ਦਾ ਭਰੋਸਾ ਦਿੱਤਾ ਹੈ। ਹਾਲਾਂਕਿ, ਯੂਨੀਅਨ ਨੇ ਸਪੱਸ਼ਟ ਕੀਤਾ ਹੈ ਕਿ ਜਦੋਂ ਤੱਕ ਪ੍ਰਸ਼ਾਸਨ ਵੱਲੋਂ ਕੋਈ ਠੋਸ ਕਾਰਵਾਈ ਨਹੀਂ ਕੀਤੀ ਜਾਂਦੀ, ਉਦੋਂ ਤੱਕ ਉਨ੍ਹਾਂ ਦਾ ਸੰਘਰਸ਼ ਜਾਰੀ ਰਹੇਗਾ। ਇਹ ਘਟਨਾ ਦੇਸ਼ ਦੀਆਂ ਪ੍ਰਮੁੱਖ ਰੇਲਵੇ ਨਿਰਮਾਣ ਇਕਾਈਆਂ ਵਿੱਚੋਂ ਇੱਕ ਵਿੱਚ ਸੁਰੱਖਿਆ ਵਿਵਸਥਾ ਦੀ ਗੰਭੀਰ ਸਥਿਤੀ ਨੂੰ ਦਰਸਾਉਂਦੀ ਹੈ।