ਕਪੂਰਥਲਾ (ਸਮਾਜ ਵੀਕਲੀ) ( ਕੌੜਾ)- ਸ਼੍ਰੀ ਪ੍ਰਸ਼ਾਂਤ ਕੁਮਾਰ ਮਿਸ਼ਰਾ, ਜਨਰਲ ਮੈਨੇਜਰ, ਨੇ ਅੱਜ ਰੇਲ ਕੋਚ ਫੈਕਟਰੀ , ਕਪੂਰਥਲਾ ਦਾ ਦੌਰਾ ਕੀਤਾ। ਇਸ ਸਮੇਂ ਉਹ ਮਾਡਰਨ ਰੇਲ ਕੋਚ ਫੈਕਟਰੀ, ਰਾਏਬਰੇਲੀ ਦੇ ਜਨਰਲ ਮੈਨੇਜਰ ਹਨ ਅਤੇ ਉਨ੍ਹਾਂ ਨੂੰ ਆਰ ਸੀ ਐੱਫ ਦੇ ਜਨਰਲ ਮੈਨੇਜਰ ਦਾ ਵਾਧੂ ਚਾਰਜ ਦਿੱਤਾ ਗਿਆ ਹੈ।1986 ਬੈਚ ਦੇ ਇੰਡੀਅਨ ਰੇਲਵੇ ਸਰਵਿਸ ਆਫ਼ ਮਕੈਨੀਕਲ ਇੰਜੀਨੀਅਰਜ਼ ਅਧਿਕਾਰੀ, ਸ਼੍ਰੀ ਮਿਸ਼ਰਾ ਨੇ ਤਿੰਨ ਦਹਾਕਿਆਂ ਤੋਂ ਵੱਧ ਸਮੇਂ ਤੋਂ ਭਾਰਤੀ ਰੇਲ ਵਿੱਚ ਸੇਵਾ ਨਿਭਾਈ ਹੈ। ਉਨ੍ਹਾਂ ਨੇ ਆਸਨਸੋਲ, ਮਾਲਦਾ ਅਤੇ ਅਲੀਪੁਰਦੁਆਰ ਡਿਵੀਜ਼ਨਾਂ ਦੇ ਡਿਵੀਜ਼ਨਲ ਰੇਲਵੇ ਮੈਨੇਜਰ ਅਤੇ ਦੱਖਣੀ ਪੱਛਮੀ ਰੇਲਵੇ ਦੇ ਸਹਾਇਕ ਜਨਰਲ ਮੈਨੇਜਰ ਵਰਗੇ ਅਹੁਦਿਆਂ ‘ਤੇ ਸੇਵਾ ਨਿਭਾਈ ਹੈ।ਉਨ੍ਹਾਂ ਦੀ ਅਗਵਾਈ ਹੇਠ, ਆਸਨਸੋਲ ਡਿਵੀਜ਼ਨ ਨੂੰ ਰਿਕਾਰਡ ਲੋਡਿੰਗ, ਮਾਲੀਆ ਅਤੇ ਸਮੁੱਚੇ ਸੁਧਾਰ ਲਈ ਲਗਾਤਾਰ ਦੋ ਵਾਰ ਸਰਵੋਤਮ ਡਿਵੀਜ਼ਨ ਪੁਰਸਕਾਰ ਮਿਲਿਆ।ਸ਼੍ਰੀ ਮਿਸ਼ਰਾ ਨੇ ਵਾਤਾਵਰਣ , ਰੇਲ ਵਿਰਾਸਤ ਅਤੇ ਸੱਭਿਆਚਾਰਕ ਵਿਕਾਸ ਲਈ ਵਿਸ਼ੇਸ਼ ਯਤਨ ਕੀਤੇ ਹਨ। ਉਨ੍ਹਾਂ ਦੇ ਕਾਰਜਕਾਲ ਦੌਰਾਨ, ਮਾਲਦਾ ਡਿਵੀਜ਼ਨ ਅਤੇ ਆਸਨਸੋਲ ਡਿਵੀਜ਼ਨਾਂ ਨੇ ਬੇਮਿਸਾਲ ਵਿਕਾਸ ਕੀਤਾ ਅਤੇ ਵਾਤਾਵਰਣ ਅਤੇ ਵਿਰਾਸਤ ਦੇ ਖੇਤਰ ਵਿੱਚ ਇੱਕ ਨਵੀਂ ਪਛਾਣ ਸਥਾਪਤ ਕੀਤੀ। ਉਨ੍ਹਾਂ ਨੇ ਰੇਲ ਵਿਰਾਸਤ ‘ਤੇ ਵਿਆਪਕ ਖੋਜ ਕੀਤੀ ਹੈ ਅਤੇ ਰੇਲ ਵਿਰਾਸਤ, ਲੀਡਰਸ਼ਿਪ ਪ੍ਰਬੰਧਨ, ਅਤੇ ਡੀਜ਼ਲ ਲੋਕੋਮੋਟਿਵ ਰੱਖ-ਰਖਾਅ ਵਰਗੇ ਤਕਨੀਕੀ ਵਿਸ਼ਿਆਂ ‘ਤੇ ਲੇਖ ਲਿਖੇ ਹਨ। ਉਨ੍ਹਾਂ ਨੇ ਭਾਰਤੀ ਰੇਲ ਵਿਰਾਸਤ ‘ਤੇ ਕਈ ਕਿਤਾਬਾਂ ਵੀ ਲਿਖੀਆਂ ਹਨ। ਆਰ ਸੀ ਐੱਫ ਪਹੁੰਚਣ ‘ਤੇ, ਸ਼੍ਰੀ ਮਿਸ਼ਰਾ ਦਾ ਸੀਨੀਅਰ ਅਧਿਕਾਰੀਆਂ ਦੁਆਰਾ ਭਰਵਾਂ ਸਵਾਗਤ ਕੀਤਾ ਗਿਆ। ਬਾਅਦ ਵਿੱਚ, ਉਨ੍ਹਾਂ ਨੇ ਕੋਚ ਉਤਪਾਦਨ ਅਤੇ ਨਵੇਂ ਰੇਲ ਡਿੱਬਿਆਂ ਦੇ ਵਿਕਾਸ ਨਾਲ ਸਬੰਧਤ ਵੱਖ ਵੱਖ ਮੁੱਦਿਆਂ ‘ਤੇ ਸੀਨੀਅਰ ਅਧਿਕਾਰੀਆਂ ਨਾਲ ਇੱਕ ਵਿਸਤ੍ਰਿਤ ਮੀਟਿੰਗ ਕੀਤੀ। ਉਨ੍ਹਾਂ ਨੇ ਆਰ ਸੀ ਐੱਫ ਵਰਕਸ਼ਾਪ ਦਾ ਦੌਰਾ ਕੀਤਾ, ਜਿੱਥੇ ਉਨ੍ਹਾਂ ਨੇ ਕੋਚ ਨਿਰਮਾਣ ਦਾ ਨਿਰੀਖਣ ਕੀਤਾ ਅਤੇ ਆਪਣੇ ਕੀਮਤੀ ਸੁਝਾਅ ਦਿੱਤੇ। ਇਸ ਮੌਕੇ ਜਨਰਲ ਮੈਨੇਜਰ ਸ੍ਰੀ ਮਿਸ਼ਰਾ ਨੇ ਸਵੱਛ ਭਾਰਤ ਅਭਿਆਨ ਤਹਿਤ ਹੋਰ ਅਧਿਕਾਰੀਆਂ ਦੇ ਨਾਲ ਮਿਲ ਕੇ ਰੁੱਖ ਵੀ ਲਗਾਏ ।ਭਾਰਤੀ ਰੇਲ ਵਿੱਚ ਆਪਣੇ ਪ੍ਰਬੰਧਕੀ ਹੁਨਰ ਲਈ ਮਸ਼ਹੂਰ ਸ਼੍ਰੀ ਪੀ.ਕੇ. ਮਿਸ਼ਰਾ ਦੀ ਇਹ ਨਵੀਂ ਨਿਯੁਕਤੀ, ਆਰ ਸੀ ਐੱਫ ਨਿਰਮਿਤ ਰੇਲ ਡਿੱਬਿਆਂ ਦੇ ਉਤਪਾਦਨ ਨੂੰ ਨਵੀਨਤਾ ਦੇਣ ਅਤੇ ਕੋਚ ਉਤਪਾਦਨ ਵਧਾਉਣ ਲਈ ਰੇਲ ਕੋਚ ਫੈਕਟਰੀ, ਕਪੂਰਥਲਾ ਦੀਆਂ ਉਮੀਦਾਂ ਅਤੇ ਯੋਜਨਾਵਾਂ ਨੂੰ ਇੱਕ ਨਵੀਂ ਦਿਸ਼ਾ ਪ੍ਰਦਾਨ ਕਰੇਗੀ।
ਸਮਾਜ ਵੀਕਲੀ’ ਐਪ ਡਾਊਨਲੋਡ ਕਰਨ ਲਈ ਹੇਠ ਦਿਤਾ ਲਿੰਕ ਕਲਿੱਕ ਕਰੋ
https://play.google.com/store/apps/details?id=in.yourhost.samaj
