ਕਵਿਤਾਵਾਂ/ਮੂਲ ਚੰਦ ਸ਼ਰਮਾ

(ਸਮਾਜ ਵੀਕਲੀ)

ਹੜ੍ਹਾਂ ਦੀ ਰੋਕਥਾਮ
——————-
ਪਹਿਲਾਂ ਪੈੜਾਂ ਤੇ ਪਗਡੰਡੀ ਫ਼ਿਰ ਰਾਹ ਹੋ ਗਿਆ ਹੁੰਦਾ ਹੈ।
ਕੋਈ ਘਰਾਂ ਤੋਂ ਬੇ-ਘਰ ਤੇ ਕੋਈ ਸ਼ਾਹ ਹੋ ਗਿਆ ਹੁੰਦਾ ਹੈ।
ਸਾਡੇ ਹਾਕਮ ਅੱਗ ਲੱਗੀ ਤੋਂ ਮਸ਼ਕਾਂ ਦਾ ਭਾਅ ਪੁਛਦੇ ਨੇ ;
ਉਸ ਵੇਲ਼ੇ ਤੱਕ ਸਭ ਕੁੱਝ ਸੜ ਕੇ ਸੁਆਹ ਹੋ ਗਿਆ ਹੁੰਦਾ ਹੈ।

ਰੀਲ੍ਹਾਂ ਵਾਲ਼ੀਏ ਕੁੜੀਏ
————————
ਤੂੰ ਚੰਦ ਛਿੱਲੜਾਂ ‘ਤੇ ਵਿਰੀ ਲਗਦੀ ।
ਹੁੰਦੀ ਥਾਉਂ ਥਾਉਂ ਕਿਰਕਿਰੀ ਲਗਦੀ ।
ਤੂੰ ਸੀ ਤੋਰੀਆਂ ਦੀ ਵੇਲ ਵਰਗੀ ;
ਕੱਦੂ ਤੇ ਪੇਠਿਆਂ ‘ਚ ਘਿਰੀ ਲਗਦੀ ।

ਮੇਰਾ ਦਾਨੀ ਕਹਾਉਂਣ ਨੂੰ ਜੀਅ ਕਰਦੈ
—————————————-
ਕਿਸੇ ਘਰ ਵਿੱਚ ਪਾਣੀ ਖੜ੍ਹਾ ਹੋਵੇ ,
ਨਾਲ਼ ਉੱਛਲਿ਼ਆ ਨਾਲਾ਼ ਚਾਹੀਦੈ ।
ਬਾਕੀ ਸਾਰੇ ਪਾਸੇ ਹੋ ਜਾਇਓ ,
ਖਾਲੀ ਆਲ਼ਾ ਦੁਆਲਾ਼ ਚਾਹੀਦੈ ।
ਪੰਜ ਸੱਤ ਵੱਡਿਆਂ ਅਖ਼ਬਾਰਾਂ ਤੇ ,
ਚੈਨਲਾਂ ਦੇ ਪੱਤਰਕਾਰ ਵੀ ਹੋਣ ;
ਇੱਕ ਕੇਲਾ ਦਾਨ ਵਿੱਚ ਦੇਣਾ ਏਂ ,
ਇੱਕ ਕੈਮਰੇ ਵਾਲ਼ਾ ਚਾਹੀਦੈ ।

ਮੂਲ ਚੰਦ ਸ਼ਰਮਾ ਪ੍ਰਧਾਨ ,
ਪੰਜਾਬੀ ਸਾਹਿਤ ਸਭਾ ਧੂਰੀ ਜਿਲ੍ਹਾ ਸੰਗਰੂਰ ।
      9914836037