(ਸਮਾਜ ਵੀਕਲੀ)
ਉੱਚੀ – ਉੱਚੀ ਸ਼ੋਰ ਮਚਾ ਕੇ
ਜਗ੍ਹਾ ਜਗ੍ਹਾ ‘ਤੇ ਲੰਗਰ ਲਾ ਕੇ
ਰੱਜਿਆਂ ਨੂੰ ਹੀ ਹੋਰ ਰਜਾ ਕੇ
ਫਰਜ਼ ਨਿਭਾ ਕੇ ਆ ਗਏ ਹਾਂ
ਬਾਬਾ ਤੇਰਾ ਜਨਮ ਦਿਹਾੜਾ
ਅਸੀਂ ਮਨਾ ਕੇ ਆ ਗਏ ਹਾਂ……
ਸੜਕਾਂ ਉੱਤੇ ਜਾਮ ਲਗਾ ਕੇ
ਭਾਂਤ-ਭਾਂਤ ਦੇ ਲੰਗਰ ਲਾ ਕੇ
ਪਿਕਨਿਕ ਵਾਂਗੂੰ ਅਸੀਂ ਵੀ, ਪੀਜ਼ੇ-
ਬਰਗਰ ਖਾ ਕੇ ਆ ਗਏ ਹਾਂ
ਨਾਨਕ ਤੇਰਾ ਜਨਮ ਦਿਹਾੜਾ
ਅਸੀਂ ਮਨਾ ਕੇ ਆ ਗਏ ਹਾਂ……
ਮੜ੍ਹੀਂ – ਮਸਾਣੀ ਜਾ ਝੁਕੇ ਹਾਂ
ਕਿਰਤ ਕੀਤੀ ਨਾ ਵੰਡ ਛਕੇ ਹਾਂ
ਤੇਰੀਆਂ ਈ ਫੋਟੋਆਂ ਉੱਤੇ ਬਾਬਾ
ਧੂਫ਼ ਧੁਖਾ ਕੇ ਆ ਗਏ ਹਾਂ
ਬਾਬਾ ਤੇਰਾ ਜਨਮ ਦਿਹਾੜਾ
ਅਸੀਂ ਮਨਾ ਕੇ ਆ ਗਏ ਹਾਂ……
ਊਚ-ਨੀਚ ਦਾ ਫਰਕ ਸੀ ਵੱਢਿਆ
ਵਹਿਮ ਭਰਮ ‘ਚੋਂ ਵੀ ਸੀ ਕੱਢਿਆ
ਅਸੀਂ ਤਾਂ ਵਹਿਮਾਂ ਭਰਮਾਂ ਨੂੰ ਹੀ
ਜੀਵਨ ਵਿੱਚ ਵਸਾ ਗਏ ਹਾਂ
ਨਾਨਕ ਤੇਰਾ ਜਨਮ ਦਿਹਾੜਾ
ਅਸੀਂ ਮਨਾ ਕੇ ਆ ਗਏ ਹਾਂ……
ਦੋ ਦਿਨ ਤੇਰਾ ਨਾਮ ਧਿਆਇਆ
ਤੇਰਾ ਕਿਹਾ ਨਾ ਮਨ ਵਸਾਇਆ
“ਖੁਸ਼ੀ ਮੁਹੰਮਦਾ” ਲੋਕ ਵਿਖਾਵਾ
ਕਰਕੇ ਘਰ ਨੂੰ ਆ ਗਏ ਹਾਂ
ਬਾਬਾ ਤੇਰਾ ਜਨਮ ਦਿਹਾੜਾ
ਅਸੀਂ ਮਨਾ ਕੇ ਆ ਗਏ ਹਾਂ……
ਖੁਸ਼ੀ ਮੁਹੰਮਦ ਚੱਠਾ
