ਵੈਨਕੂਵਰ (ਸਮਾਜ ਵੀਕਲੀ) (ਮਲਕੀਤ ਸਿੰਘ)– ਕਨੇਡਾ ਦੇ ਬ੍ਰਿਟਿਸ਼ ਕੋਲੰਬੀਆ ਸੂਬੇ ‘ਚ ਪਿਛਲੇ ਦਿਨਾਂ ਤੋਂ ਗਰਮੀ ਦੇ ਪ੍ਰਕੋਪ ਨੇ ਆਪਣਾ ਅਸਰ ਦਿਖਾਉਣਾ ਸ਼ੁਰੂ ਕਰ ਦਿੱਤਾ ਹੈ। ਮੌਸਮ ਵਿਭਾਗ ਦੇ ਮਾਹਰਾਂ ਦੀ ਰਾਇ ਮੁਤਾਬਿਕ ਪਛੜ ਕੇ ਪੈ ਰਹੀ ਗਰਮੀ ਕਾਰਨ ਵੈਨਕੂਵਰ,ਸਰੀ ਅਤੇ ਆਸ-ਪਾਸ ਦੇ ਸ਼ਹਿਰਾਂ ‘ਚ ਬੁੱਧਵਾਰ ਵੱਧ ਤੋਂ ਵੱਧ ਤਾਪਮਾਨ 26 ਸੈਲਸੀਅਸ ਰਿਕਾਰਡ ਕੀਤਾ ਗਿਆ।ਮੌਸਮ ਵਿਭਾਗ ਵੱਲੋਂ ਆਮ ਲੋਕਾਂ ਨੂੰ ਮੌਸਮ ਦੇ ਅਚਾਨਕ ਬਦਲਦੇ ਮਿਜਾਜ ਦੇ ਮੱਦੇਨਜ਼ਰ ਚੁਕੰਨਿਆ ਰਹਿਣ ਦੀ ਸਲਾਹ ਦਿੱਤੀ ਗਈ ਹੈ| ਹੋਰ ਵੇਰਵਿਆਂ ਅਨੁਸਾਰ ਆਉਂਦੇ ਇਕ ਦੋ ਦਿਨਾਂ ਤੀਕ ਮੌਸਮ ਗਰਮ ਰਹਿਣ ਦੀ ਸੰਭਾਵਨਾ ਜਤਾਈ ਜਾ ਰਹੀ ਹੈ।ਜਦੋਂ ਕਿ ਅਗਲੇ ਹਫਤੇ ਨੂੰ ਬਦਲਵਾਈ ਹੋਣ ਕਾਰਨ ਤਪਦੇ ਮੌਸਮ ‘ਚ ਕੁਝ ਠੰਡਕ ਆਉਣ ਦੀ ਆਸ ਹੈ। ਦੂਸਰੇ ਪਾਸੇ ਗਰਮੀ ਦੇ ਸਤਾਏ ਬਹੁਗਿਣਤੀ ਲੋਕ ਠੰਡਕ ਦਾ ਆਨੰਦ ਲੈਣ ਲਈ ਵਾਈਟ ਰੌਕ,ਵਾਟਰ ਫਰੰਟ ਅਤੇ ਹੋਰਨਾਂ ਨੇੜਲੇ ਸਮੁੰਦਰੀ ਬੀਚਾ ਦੇ ਠੰਡੇ ਪਾਣੀਆਂ ‘ਚ ‘ਡੁੱਬਕੀਆਂ’ ਲਗਾਉਂਦੇ ਵੀ ਦਿਖਾਈ ਦਿੱਤੇ। ਵੈਨਕੂਵਰ ਦੇ ਡਾਉੂਨਡਾਉੂਨ ਏਰੀਆ ‘ਚ ਵੀ ਗਰਮੀ ਤੋਂ ਅੱਕੇ ਕੁਝ ‘ਪਿਆਕੜ’ ਠੰਡੀਆਂ ਬੀਅਰਾ ਨਾਲ ‘ਆਨੰਦ’ ਮਾਣਦੇ ਵੀ ਨਜ਼ਰੀ ਪਾਏ।
