ਮੁੰਬਈ— ਮਸ਼ਹੂਰ ਸਟੈਂਡਅੱਪ ਕਾਮੇਡੀਅਨ ਕੁਨਾਲ ਕਾਮਰਾ ਨੇ ਆਪਣੇ ਖਿਲਾਫ ਦਰਜ FIR ਨੂੰ ਰੱਦ ਕਰਵਾਉਣ ਲਈ ਬਾਂਬੇ ਹਾਈ ਕੋਰਟ ਦਾ ਦਰਵਾਜ਼ਾ ਖੜਕਾਇਆ ਹੈ। ਇਹ ਐਫਆਈਆਰ ਮੁੰਬਈ ਦੇ ਖਾਰ ਪੁਲਿਸ ਸਟੇਸ਼ਨ ਵਿੱਚ ਦਰਜ ਕੀਤੀ ਗਈ ਸੀ, ਜਿਸ ਵਿੱਚ ਕਾਮਰਾ ‘ਤੇ ਮਹਾਰਾਸ਼ਟਰ ਦੇ ਉਪ ਮੁੱਖ ਮੰਤਰੀ ਏਕਨਾਥ ਸ਼ਿੰਦੇ ਵਿਰੁੱਧ ਇਤਰਾਜ਼ਯੋਗ ਟਿੱਪਣੀ ਕਰਨ ਦਾ ਦੋਸ਼ ਹੈ। ਕਾਮਰਾ ਦੀ ਤਰਫੋਂ, ਇਹ ਪਟੀਸ਼ਨ ਸੀਨੀਅਰ ਵਕੀਲ ਨਵਰੋਜ਼ ਸੇਰਵਾਈ ਅਤੇ ਵਕੀਲ ਅਸ਼ਵਿਨ ਥੱਲ ਦੁਆਰਾ ਬੰਬੇ ਹਾਈ ਕੋਰਟ ਦੇ ਜਸਟਿਸ ਸਾਰੰਗ ਕੋਤਵਾਲ ਅਤੇ ਐਸਐਮ ਮੋਡਕ ਦੀ ਬੈਂਚ ਅੱਗੇ ਪੇਸ਼ ਕੀਤੀ ਜਾਵੇਗੀ।
ਵਿਵਾਦ ਪਿਛਲੇ ਮਹੀਨੇ ਉਦੋਂ ਸ਼ੁਰੂ ਹੋਇਆ ਸੀ ਜਦੋਂ ਕੁਨਾਲ ਕਾਮਰਾ ਨੇ ਆਪਣੇ ਇੱਕ ਸਟੈਂਡ-ਅੱਪ ਸ਼ੋਅ ਦੌਰਾਨ ਏਕਨਾਥ ਸ਼ਿੰਦੇ ਦੇ ਸਿਆਸੀ ਕਰੀਅਰ ‘ਤੇ ਵਿਅੰਗ ਕੀਤਾ ਸੀ। ਇੱਕ ਬਾਲੀਵੁੱਡ ਗੀਤ ਦੀ ਪੈਰੋਡੀ ਤਿਆਰ ਕਰਕੇ, ਉਸਨੇ 2022 ਵਿੱਚ ਸ਼ਿੰਦੇ ਵੱਲੋਂ ਊਧਵ ਠਾਕਰੇ ਵਿਰੁੱਧ ਬਗਾਵਤ ਕਰਨ ਅਤੇ ਮਹਾਂ ਵਿਕਾਸ ਅਗਾੜੀ ਸਰਕਾਰ ਨੂੰ ਡੇਗਣ ‘ਤੇ ਚੁਟਕੀ ਲਈ ਸੀ।
ਕਾਮਰਾ ਨੇ ਇਸ ਸ਼ੋਅ ਦੀ ਵੀਡੀਓ 23 ਮਾਰਚ 2025 ਨੂੰ ਆਪਣੇ ਯੂਟਿਊਬ ਚੈਨਲ ਅਤੇ ਸੋਸ਼ਲ ਮੀਡੀਆ ਪਲੇਟਫਾਰਮਾਂ ‘ਤੇ ਪੋਸਟ ਕੀਤੀ ਸੀ, ਜੋ ਕੁਝ ਹੀ ਸਮੇਂ ‘ਚ ਵਾਇਰਲ ਹੋ ਗਈ ਸੀ। ਅਗਲੇ ਹੀ ਦਿਨ, ਯਾਨੀ 24 ਮਾਰਚ ਨੂੰ, ਸ਼ਿੰਦੇ ਧੜੇ ਦੇ ਸ਼ਿਵ ਸੈਨਿਕਾਂ ਨੇ ਖਾਰ ਖੇਤਰ ਵਿੱਚ ਸਥਿਤ ਹੈਬੀਟੇਟ ਕਾਮੇਡੀ ਕਲੱਬ ਅਤੇ ਹੋਟਲ ਯੂਨੀਕੌਂਟੀਨੈਂਟਲ ਵਿੱਚ ਭੰਨਤੋੜ ਕੀਤੀ, ਜਿੱਥੇ ਇਹ ਸ਼ੋਅ ਰਿਕਾਰਡ ਕੀਤਾ ਗਿਆ ਸੀ।
ਸ਼ਿਵ ਸੈਨਾ ਵਰਕਰਾਂ ਨੇ ਦੋਸ਼ ਲਾਇਆ ਕਿ ਕਾਮਰਾ ਨੇ ਏਕਨਾਥ ਸ਼ਿੰਦੇ ਦਾ ਅਪਮਾਨ ਕੀਤਾ ਹੈ ਅਤੇ ਉਸ ਦੀ ਗ੍ਰਿਫਤਾਰੀ ਦੀ ਮੰਗ ਕੀਤੀ ਹੈ। ਇਸ ਮਾਮਲੇ ਵਿੱਚ ਆਈਪੀਸੀ ਦੀ ਧਾਰਾ 356 (2) (ਮਾਨਹਾਨੀ) ਦੇ ਤਹਿਤ ਖਾਰ ਥਾਣੇ ਵਿੱਚ ਕੇਸ ਦਰਜ ਕੀਤਾ ਗਿਆ ਸੀ ਅਤੇ ਕੁਨਾਲ ਕਾਮਰਾ ਨੂੰ ਤਿੰਨ ਵਾਰ ਸੰਮਨ ਜਾਰੀ ਕੀਤੇ ਗਏ ਸਨ। ਹਾਲਾਂਕਿ, ਕਾਮਰਾ 5 ਅਪ੍ਰੈਲ ਨੂੰ ਪੁੱਛਗਿੱਛ ਲਈ ਹਾਜ਼ਰ ਨਹੀਂ ਹੋਏ। ਇਸ ਮਾਮਲੇ ‘ਚ ਨਾ ਸਿਰਫ ਮੁੰਬਈ ਸਗੋਂ ਜਲਗਾਓਂ ਦੇ ਮੇਅਰ, ਨਾਸਿਕ ਦੇ ਇਕ ਹੋਟਲ ਮਾਲਕ ਅਤੇ ਇਕ ਕਾਰੋਬਾਰੀ ਨੇ ਵੀ ਕਾਮਰਾ ਖਿਲਾਫ ਵੱਖ-ਵੱਖ ਸ਼ਿਕਾਇਤਾਂ ਦਰਜ ਕਰਵਾਈਆਂ ਹਨ।
ਸਮਾਜ ਵੀਕਲੀ’ ਐਪ ਡਾਊਨਲੋਡ ਕਰਨ ਲਈ ਹੇਠ ਦਿਤਾ ਲਿੰਕ ਕਲਿੱਕ ਕਰੋ
https://play.google.com/store/apps/details?id=in.yourhost.samajweekly
