ਲੈਸਟਰ (ਇੰਗਲੈਂਡ), (ਸਮਾਜ ਵੀਕਲੀ) (ਸੁਖਜਿੰਦਰ ਸਿੰਘ ਢੱਡੇ)– ਯੂਰਪੀ ਯੂਨੀਅਨ ਨੇ ਯੂਕਰੇਨ ਮਸਲੇ ‘ਤੇ ਬਰਤਾਨੀਆ ਦੇ ਪ੍ਰਧਾਨ ਮੰਤਰੀ ਕੀਅਰ ਸਟਾਰਮਰ ਦੀਆਂ ਯੋਜਨਾਵਾਂ ਨੂੰ ਤਵੱਜੋ ਨਾ ਦਿੰਦਿਆਂ ਰੂਸ ਦੇ ਖ਼ਿਲਾਫ਼ ਯੂਕਰੇਨ ਦੀ ਮਦਦ ਲਈ ਵੱਡਾ ਸਾਂਝਾ ਰੱਖਿਆ ਫੰਡ ਮਨਜ਼ੂਰ ਕਰ ਲਿਆ ਹੈ। ਬਰਸਲਜ਼ ਵਿੱਚ ਹੋਈ ਯੂਰਪੀ ਆਗੂਆਂ ਦੀ ਮੀਟਿੰਗ ਦੌਰਾਨ ਇਹ ਫੈਸਲਾ ਕੀਤਾ ਗਿਆ, ਜਿਸ ਵਿੱਚ ਬਰਤਾਨੀਆ ਦੀ ਭੂਮਿਕਾ ਨੂੰ ਕੇਂਦਰੀ ਤੌਰ ‘ਤੇ ਸ਼ਾਮਲ ਨਹੀਂ ਕੀਤਾ ਗਿਆ। ਯੂਰਪੀ ਯੂਨੀਅਨ ਦੇ ਆਗੂਆਂ ਨੇ ਕਿਹਾ ਕਿ ਯੂਕਰੇਨ ਦੀ ਸਹਾਇਤਾ ਲਈ ਯੂਰਪ ਆਪਣੀ ਸਾਂਝੀ ਨੀਤੀ ਅਧੀਨ ਅੱਗੇ ਵਧੇਗਾ ਅਤੇ ਰੂਸ ਖ਼ਿਲਾਫ਼ ਮੋਹਰੇ ‘ਤੇ ਯੂਰਪੀ ਦੇਸ਼ ਇਕਜੁੱਟ ਰਹਿਣਗੇ। ਮੀਟਿੰਗ ਦੌਰਾਨ ਬਰਤਾਨੀਆ ਵੱਲੋਂ ਦਿੱਤੇ ਗਏ ਸੁਝਾਵਾਂ ‘ਤੇ ਕੋਈ ਵਿਸ਼ੇਸ਼ ਸਹਿਮਤੀ ਨਹੀਂ ਬਣ ਸਕੀ।ਮਨਜ਼ੂਰ ਕੀਤੇ ਗਏ ਇਸ ਵੱਡੇ ਫੰਡ ਰਾਹੀਂ ਯੂਕਰੇਨ ਦੀ ਸੈਨਾ, ਹਥਿਆਰਾਂ ਦੀ ਸਪਲਾਈ ਅਤੇ ਰੱਖਿਆ ਢਾਂਚੇ ਨੂੰ ਮਜ਼ਬੂਤ ਕੀਤਾ ਜਾਵੇਗਾ। ਯੂਰਪੀ ਯੂਨੀਅਨ ਦਾ ਮੰਨਣਾ ਹੈ ਕਿ ਇਸ ਨਾਲ ਰੂਸ ‘ਤੇ ਦਬਾਅ ਬਣੇਗਾ ਅਤੇ ਯੂਕਰੇਨ ਨੂੰ ਲੰਬੇ ਸਮੇਂ ਤੱਕ ਸਹਾਰਾ ਮਿਲੇਗਾ। ਰਾਜਨੀਤਿਕ ਮਾਹਿਰਾਂ ਦਾ ਕਹਿਣਾ ਹੈ ਕਿ ਇਹ ਘਟਨਾਕ੍ਰਮ ਬ੍ਰੈਕਜ਼ਿਟ ਤੋਂ ਬਾਅਦ ਯੂਰਪ ਵਿੱਚ ਬਰਤਾਨੀਆ ਦੀ ਘਟਦੀ ਕੂਟਨੀਤਿਕ ਅਹਿਮੀਅਤ ਵੱਲ ਇਸ਼ਾਰਾ ਕਰਦਾ ਹੈ। ਉਨ੍ਹਾਂ ਅਨੁਸਾਰ ਯੂਰਪੀ ਫੈਸਲਾ ਪ੍ਰਕਿਰਿਆ ਵਿੱਚ ਬਰਤਾਨੀਆ ਦੀ ਸਿੱਧੀ ਭਾਗੀਦਾਰੀ ਨਾ ਹੋਣਾ ਕੀਅਰ ਸਟਾਰਮਰ ਸਰਕਾਰ ਲਈ ਚੁਣੌਤੀਪੂਰਨ ਸਥਿਤੀ ਬਣ ਸਕਦਾ ਹੈ।ਦੂਜੇ ਪਾਸੇ, ਯੂਰਪੀ ਯੂਨੀਅਨ ਨੇ ਇਹ ਸੰਕੇਤ ਵੀ ਦਿੱਤਾ ਹੈ ਕਿ ਯੂਕਰੇਨ ਮਾਮਲੇ ‘ਚ ਅੱਗੇ ਵੀ ਫੈਸਲੇ ਯੂਰਪੀ ਦੇਸ਼ਾਂ ਦੀ ਸਾਂਝੀ ਸਹਿਮਤੀ ਨਾਲ ਹੀ ਲਏ ਜਾਣਗੇ।
https://play.google.com/store/apps/details?id=in.yourhost.samajweekly
