ਵਿਸ਼ਾਖਾਪਟਨਮ: ਭਾਰਤ ਦਾ ਕਲਾਈ ਦਾ ਸਪਿੰਨਰ ਕੁਲਦੀਪ ਯਾਦਵ ਇੱਕ ਰੋਜ਼ਾ ਕੌਮਾਂਤਰੀ ਕ੍ਰਿਕਟ ਵਿੱਚ ਦੋ ਜਾਂ ਵੱਧ ਹੈਟ੍ਰਿਕ ਲੈਣ ਵਾਲਾ ਦੁਨੀਆਂ ਦਾ ਛੇਵਾਂ ਗੇਂਦਬਾਜ਼ ਬਣ ਗਿਆ। ਕੁਲਦੀਪ ਨੇ ਵੈਸਟ ਇੰਡੀਜ਼ ਖ਼ਿਲਾਫ਼ ਦੂਜੇ ਇੱਕ ਰੋਜ਼ਾ ਵਿੱਚ ਅੱਜ ਇੱਥੇ ਸ਼ਾਈ ਹੋਪ, ਜੇਸਨ ਹੋਲਡਰ ਅਤੇ ਅਲਜ਼ਾਰੀ ਜੋਸੇਫ਼ ਨੂੰ ਆਊਟ ਕਰਕੇ ਹੈਟ੍ਰਿਕ ਪੂਰੀ ਕੀਤੀ। ਇਸ ਤੋਂ ਪਹਿਲਾਂ ਉਸ ਨੇ 21 ਸਤੰਬਰ 2017 ਨੂੰ ਆਸਟਰੇਲੀਆ ਖ਼ਿਲਾਫ਼ ਕੋਲਕਾਤਾ ਵਿੱਚ ਹੈਟ੍ਰਿਕ ਬਣਾਈ ਸੀ। ਇਸ ਕਾਰਨਾਮੇ ਨਾਲ ਇਹ ਚਾਈਨਾਮੈਨ ਗੇਂਦਬਾਜ਼ ਦੋ ਜਾਂ ਵੱਧ ਹੈਟ੍ਰਿਕ ਲੈਣ ਵਾਲੇ ਗੇਂਦਬਾਜ਼ਾਂ ਦੇ ਇਲੀਟ ਕਲੱਬ ਵਿੱਚ ਵੀ ਸ਼ਾਮਲ ਹੋ ਗਿਆ। ਸ੍ਰੀਲੰਕਾ ਦਾ ਲਾਸਿਥ ਮਲਿੰਗਾ ਤਿੰਨ ਹੈਟ੍ਰਿਕ ਨਾਲ ਇਸ ਸੂਚੀ ਵਿੱਚ ਸਿਖਰ ’ਤੇ ਹੈ। ਪਾਕਿਸਤਾਨ ਦਾ ਵਸੀਮ ਅਕਰਮ ਅਤੇ ਸਕਲੈਨ ਮੁਸ਼ਤਾਕ, ਸ੍ਰੀਲੰਕਾ ਦਾ ਚਮਿੰਡਾ ਵਾਸ ਅਤੇ ਨਿਊਜ਼ੀਲੈਂਡ ਦਾ ਟ੍ਰੈਂਟ ਬੋਲਟ ਨੇ ਵੀ ਇੱਕ ਰੋਜ਼ਾ ਵਿੱਚ ਦੋ-ਦੋ ਹੈਟ੍ਰਿਕ ਲਈਆਂ ਹਨ। ਭਾਰਤ ਵੱਲੋਂ ਇੱਕ ਰੋਜ਼ਾ ਵਿੱਚ ਚੇਤਨ ਸ਼ਰਮਾ, ਕਪਿਲ ਦੇਵ, ਕੁਲਦੀਪ ਅਤੇ ਮੁਹੰਮਦ ਸ਼ਮੀ ਨੇ ਹੈਟ੍ਰਿਕ ਮਾਰੀ ਹੈ।
