ਮੋਗਾ (ਸਮਾਜਵੀਕਲੀ) : ਇਥੇ ਸ਼ਹਿਰ ’ਚ ਭੀੜਭਾੜ ਵਾਲੇ ਨਿਊ ਟਾਊਨ ਬਜ਼ਾਰ ’ਚ ਬੀਤੀ ਸ਼ਾਮ ਕਰੀਬ 7 ਵਜੇ ਵੱਡੇ ਕਾਰੋਬਾਰੀ ਦੀ ਗੋਲੀਆਂ ਮਾਰ ਕੇ ਹੱਤਿਆ ਦੀ ਜ਼ਿੰਮੇਵਾਰੀ ਸੁੱਖਾ ਗਿੱਲ ਲੰਮੇ ਗਰੁੱਪ ਨੇ ਲਈ ਹੈ। ਦੁਕਾਨਦਾਰਾਂ ਨੇ ਇਸ ਘਟਨਾਂ ਦੇ ਰੋਸ ਵਜੋਂ ਅੱਜ ਮਾਰਕੀਟ ਬੰਦ ਰੱਖੀ। ਸਿਟੀ ਥਾਣੇ ਤੋਂ ਕਰੀਬ 100 ਗਜ਼ ਦੂਰੀ ਤੋਂ ਸ਼ਹਿਰ ਦੀ ਸੰਘਣੀ ਆਬਾਦੀ ਤੇ ਬਜ਼ਾਰ ’ਚ ਵਾਰਦਾਤ ਕਾਰਨ ਲੋਕਾਂ ’ਚ ਦਹਿਸ਼ਤ ਅਤੇ ਸਹਿਮ ਹੈ।
ਜ਼ਿਲ੍ਹਾ ਪੁਲੀਸ ਮੁਖੀ ਹਰਮਨਬੀਰ ਸਿੰਘ ਗਿੱਲ ਨੇ ਹੱਤਿਆ ਦੀ ਜ਼ਿੰਮੇਵਾਰੀ ਲੈਣ ਵਾਲੇ ਸੁੱਖਾ ਗਿੱਲ ਲੰਮੇ ਬਾਰੇ ਕਿਹਾ ਕਿ ਉਹ ਨਵਾਂ ਹੀ ਗੈਂਗਸਟਰ ਹੈ। ਹੱਤਿਆ ਦੀ ਜਾਂਚ ਅਤੇ ਮੁਲਜਮਾਂ ਦੀ ਗ੍ਰਿਫ਼ਤਾਰੀ ਲਈ ਟੀਮਾਂ ਬਣਾ ਦਿੱਤੀਆਂ ਹਨ। ਥਾਣਾ ਸਿਟੀ ਦੱਖਣੀ ਪੁਲੀਸ ਨੇ ਮ੍ਰਿਤਕ ਕਾਰੋਬਾਰੀ ਤੇਜਿੰਦਰ ਸਿੰਘ ਉਰਫ਼ ਪਿੰਕਾਂ ਦੇ ਭਰਾ ਧਰਮਿੰਦਰ ਸਿੰਘ ਦੇ ਬਿਆਨ ਉੱਤੇ ਅਣਪਛਾਤੇ ਮੁਲਜ਼ਮਾਂ ਖ਼ਿਲਾਫ਼ ਕੇਸ ਦਰਜ ਕੀਤਾ ਹੈ।
ਬੀਤੀ ਸ਼ਾਮ ਕਰੀਬ 7 ਵਜੇ ਸੁਪਰਸ਼ਾਈਨ ਜੀਨਜ਼ ਕਾਰੋਬਾਰੀ ਤੇਜਿੰਦਰ ਸਿੰਘ ਉਰਫ਼ ਪਿੰਕਾਂ ਦੀ ਸ਼ੋਅਰੂਮ ਅੰਦਰ ਗੋਲੀਆਂ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ ਸੀ। ਹਮਲਾਵਾਰ ਕਾਲੇ ਰੰਗ ਦੇ ਪਲਸਰ ਮੋਟਰ ਸਾਈਕਲ ਉੱਤੇ ਆਏ ਸਨ। ਦੂਜੇ ਪਾਸੇ ਸੁੱਖਾ ਗਿੱਲ ਲੰਮੇ ਨੇ ਹੱਤਿਆ ਦੇ ਕੁੱਝ ਚਿਰ ਮਗਰੋਂ ਹੀ ਆਪਣੀ ਫ਼ੇਸ ਬੁੱਕ ਉੱਤੇ ਪਾਈ ਪੋਸਟ ਵਿੱਚ ਇਹ ਜ਼ਿੰਮੇਵਾਰੀ ਲਈ ਹੈ।
