ਕਿਉਂ ਗਿਣਤੀ ਵਿੱਚ ਨਾ ਆਇਆ ਏ ?

 (ਸਮਾਜ ਵੀਕਲੀ) 

ਜਿਸ ਕੋਠੀ ਦੇ ਵਿੱਚ ਰਹਿੰਦੇ ਹਾਂ।
ਸੋਫ਼ੇ, ਕੁਰਸੀ ‘ਤੇ ਬਹਿੰਦੇ ਹਾਂ।
ਬੈੱਡਾਂ, ਮੰਜਿਆ ‘ਤੇ ਪੈਂਦੇ ਹਾਂ।
ਇਹ ਸਭ ਕੁੱਝ ਜੀਹਨੇ ਬਣਾਇਆ ਏ।
ਕਦੇ ਗਿਣਤੀ ਵਿੱਚ ਵੀ ਆਇਆ ਏ ?

ਇਹ ਸੜਕਾਂ ਦਾ ਜੋ ਜਾਲ਼ ਦਿੱਸੇ
ਤੇ ਪੁਲ਼ਾਂ ਵਾਲ਼ਾ ਵੀ ਨਾਲ਼ ਦਿੱਸੇ।
ਲੁੱਕ, ਬਜਰੀ ਰਲ਼ਿਆ ਮਾਲ ਦਿੱਸੇ।
ਪਰ ਮੁੜਕਾ ਜਿਸ ਵਿੱਚ ਪਾਇਆ ਏ।
ਕਦੇ ਗਿਣਤੀ ਵਿੱਚ ਵੀ ਆਇਆ ਏ ?

ਇਹ ਭੱਜਦੀਆਂ ਗੱਡੀਆਂ, ਕਾਰਾਂ ਜੋ
ਤੇ ਭਰਨ ਜਹਾਜ਼ ਉਡਾਰਾਂ ਜੋ।
ਰੇਲਾਂ ਦੀਆਂ ਲੱਗੀਆਂ ਲਾਰਾਂ ਜੋ।
ਜਿਸ ਲੋਹਾ ਇਹ ਪਿਘਲਾਇਆ ਏ ?
ਕਦੇ ਗਿਣਤੀ ਵਿੱਚ ਵੀ ਆਇਆ ਏ ?

ਪਾਣੀ, ਸਪਰੇਹਾਂ ਲਾਉਣ ਵਾਲ਼ਾ।
ਅੰਨ, ਦਾਲਾਂ ਆਦਿ ਉਗਾਉਣ ਵਾਲ਼ਾ।
ਕੱਢਣ, ਲੱਦਣ ਤੇ ਲਾਹੁਣ ਵਾਲ਼ਾ।
ਜਿਸ ਖੁਦ ਨੂੰ ਹਰਦਮ ਵਾਹਿਆ ਏ।
ਕਦੇ ਗਿਣਤੀ ਵਿੱਚ ਵੀ ਆਇਆ ਏ ?

ਜੋ ਲੋੜਾਂ ਲਈ ਮਜ਼ਬੂਰ ਸਦਾ।
ਥੋੜਾਂ ਵਿੱਚ ਹੀ ਭਰਪੂਰ ਸਦਾ।
ਰੋਮੀਆਂ ਮਜੇ ਤੋਂ ਦੂਰ ਸਦਾ।
ਕਦੇ ਧਿਆਨ ਘੜਾਮੇਂ ਲਾਇਆ ਏ।
ਕਿਉਂ ਗਿਣਤੀ ਵਿੱਚ ਨਾ ਆਇਆ ਏ ?
ਰੋਮੀ ਘੜਾਮਾਂ।
7717380107