“ਹੱਕ-ਸੱਚ ਦੀ ਲੜਾਈ”

ਹੱਕ-ਸੱਚ ਦੀ ਲੜਾਈ ਏ ਵੀਰੋ
ਹਾਕਮਾਂ ਤੱਕ
ਆਪਣੀ ਅਵਾਜ਼ ਪਹੁੰਚਾਉਣੀ ਪੈਂਦੀ ਏ

ਭੇਡਾਂ ਬਣ ਤੁਰਿਆ ਨਹੀਂ ਜਾਂਦਾ
ਸ਼ੇਰਾਂ ਵਾਂਗ ਦਹਾੜ ਲਗਾਉਣੀ ਪੈਂਦੀ ਏ

ਕਿਸਾਣੀ ਬਚਾਉਣ ਦੀ ਖਾਤਿਰ
ਇੱਕ ਜੁੱਟ ਹੋ ਕੇ
ਅਵਾਜ਼ ਬੁਲੰਦ ਕਰਵਾਉਣੀ ਪੈਂਦੀ ਏ

ਉਏ ਜਿਮੀਂਦਾਰ ਤਾਂ
ਵੱਟਾਂ ਪਿੱਛੇ ਲੜਾਈਆਂ ਮੁੱਲ ਲੈਂਦਾਂ ਏ
ਜਮੀਨਾਂ ਪਿੱਛੇ ਤਾਂ ਜਾਣ ਲੈਣੀ ਪੈਂਦੀ ਏ

ਦਲੇਰੀ ਤਾਂ ਮੁੱਢ ਕਦੀਮੀ ਲਿਖੀ ਏ
ਪੰਜਾਬ ਦੇ ਇਤਿਹਾਸ ਵਿੱਚ
ਸਾਨੂੰ ਪਤਾ ਏ
ਕੁਰਬਾਨੀ ਤਾਂ ਦੇਣੀ ਪੈਂਦੀ ਏ

ਪਹਿਲੇ ਗੁਰੂ ਨੇ
ਹਲ ਚਲਾਉਣਾ ਸਿਖਾ ਦਿੱਤਾ ਸਿੰਘਾਂ ਨੂੰ
ਦੱਸਿਆ ਕਿੱਦਾਂ ਕਿਰਤ ਕਰ ਖਾਣੀ ਪੈਂਦੀ ਏ

ਦਸਵੇਂ ਗੁਰੂ ਨੇ
ਤੇਗ ਚਲਾਉਣੀ ਸਿਖਾ ਦਿੱਤੀ ਸਿੰਘਾਂ ਨੂੰ
ਦੱਸਿਆ ਕਿੱਦਾਂ
ਕੀਤੀ ਕਿਰਤ ਬਚਾਉਣੀ ਪੈਂਦੀ ਏ