(ਸਮਾਜ ਵੀਕਲੀ)
ਕਾਹੀਆਂ ਦੇ ਚਿੱਟੇ ਬੰਬੂ ਵਿਚ ਉੱਡਦੇ ਫਿਰਨ ਹਵਾਵਾਂ ਦੇ
ਲਾਉਣ ਉਡਾਰੀ ਅੰਬਰ ਦੇ ਵਿਚ ਪਾਲ਼ੇ ਬੱਚੇ ਕਾਵਾਂ ਦੇ
ਕੋਇਲਾਂ ਦੇ ਨਿੱਕੇ ਬੋਟਾਂ ਨੂੰ ਉਡਣਾ ਕਾਂ ਸਿਖਾਉਂਦਾ ਏ
ਦੋ ਰੁੱਤਾਂ ਦਾ ਆਪਸ ਦੇ ਵਿਚ ਅੱਸੂ ਮੇਲ ਕਰਾਉਂਦਾ ਏ
ਪੱਕੀਆਂ ਫ਼ਸਲਾਂ ਉੱਤੇ ਆ ਆ ਅੱਸੂ ਵਲੀਆ ਘੋਰੇਗਾ
ਭੁੰਨਕੇ ਛੱਲੀ ਖਾਣ ਵਾਲ਼ਾ ਮੱਕੀ ਦੇ ਗੁੱਲੇ ਭੋਰੇਗਾ
ਮਿੱਠੇ ਮਿੱਠੇ ਦਾਣਿਆਂ ਦਾ ਅਨੰਦ ਜੀਭ ਨੂੰ ਆਉਂਦਾ ਏ
ਦੋ ਰੁੱਤਾਂ ਦਾ ਆਪਸ ਦੇ ਵਿੱਚ ਅੱਸੂ ਮੇਲ ਕਰਾਉਂਦਾ ਏ
ਹਰੇ ਭਰੇ ਰੁੱਖਾਂ ਦੇ ਉੱਤੇ ਵੇਲਾਂ ਵਧ ਦੀਆਂ ਜਾਵਣ ਜੀ
ਫੁੱਲਾਂ ਤੇ ਕੀਟਾਂ ਦੀਆਂ ਡਾਰਾਂ ਮੁੜ ਮੁੜ ਗੇੜੇ ਲਾਵਣ ਜੀ
ਬੱਚਾ ਕਾਟੋ ਦਾ ਪਿੱਪਲ ਤੇ ਵਲ ਪੂਛਲ ਦਾ ਪਾਉਂਦਾ ਏ
ਦੋ ਰੁੱਤਾਂ ਦਾ ਆਪਸ ਦੇ ਵਿੱਚ ਅੱਸੂ ਮੇਲ ਕਰਾਉਂਦਾ ਏ
ਬਿੱਲੀ ਦੇ ਬਲੂੰਗੜਿਆਂ ਨੇ ਮਿਆਉਂ ਮਿਆਉਂ ਲਾਈ ਐ
ਤਾਰ ਤੇ ਬੈਠੀ ਘੁੱਗੀ ਅਪਣੇ ਜਾਂਦੀ ਖੰਭ ਸੁਕਾਈ ਐ
ਚੱਕੀਰਾਹਾ ਉੱਡ ਉੱਡਕੇ ਜੀ ਗੇੜੇ ਫਿਰਦਾ ਲਾਉਂਦਾ ਏ
ਦੋ ਰੁੱਤਾਂ ਦਾ ਆਪਸ ਦੇ ਵਿੱਚ ਅੱਸੂ ਮੇਲ ਕਰਾਉਂਦਾ ਏ
ਦਿਨ ਚ ਲਗਦੀ ਗਰਮੀ ਰਾਤੀ ਲਗਦਾ ਅਕਸਰ ਪਾਲ਼ਾ ਹੈ
ਘੱਗਰ ਦੇ ਵਿਚ ਪਾਣੀ ਆਇਆ ਧੰਨਿਆਂ ਧਾਲੀਵਾਲ਼ਾ ਹੈ
ਪੌਣ ਦਾ ਬੁੱਲਾ ਸੀਨੇ ਦੇ ਨਾਲ਼ ਮੁੜ ਮੁੜਕੇ ਟਕਰਾਉਂਦਾ ਏ
ਦੋ ਰੁੱਤਾਂ ਦਾ ਆਪਸ ਦੇ ਵਿੱਚ ਅੱਸੂ ਮੇਲ ਕਰਾਉਂਦਾ ਏ
ਧੰਨਾ ਧਾਲੀਵਾਲ:-9878235714
