ਬੰਗਾ (ਸਮਾਜ ਵੀਕਲੀ) (ਚਰਨਜੀਤ ਸੱਲ੍ਹਾਂ ) ਪਿੰਡ ਗੁਣਾਚੌਰ ਵਿਖੇ ਮੀਂਹ ਨਾਲ ਨੁਕਸਾਨੇ ਘਰਾਂ ਲਈ ਅੱਜ ਨਗਦ ਰੂਪ ਵਿੱਚ ਸਹਿਯੋਗ ਰਾਸ਼ੀ ਵੰਡੀ ਗਈ। ਇਹ ਕਾਰਜ ਦੀਵਾਨ ਟੋਡਰ ਮੱਲ ਵਿਰਾਸਤੀ ਫਾਊਂਡੇਸ਼ਨ ਪੰਜਾਬ ਵਲੋਂ ਕੀਤਾ ਗਿਆ। ਪਿੰਡ ਵਿਖੇ ਸਥਾਪਿਤ ਕਿਲ੍ਹੇ ਦੇ ਵਿਹਡ਼ੇ ਇਕੱਤਰ ਹੋਏ ਲਾਭਪਾਤਰੀਆਂ ਨੂੰ ਫਾਊਂਡੇਸ਼ਨ ਦੇ ਸੀਨੀਅਰ ਮੀਤ ਪ੍ਰਧਾਨ ਕਿਰਪਾਲ ਸਿੰਘ ਬਲਾਕੀਪੁਰ ਦੀ ਅਗਵਾਈ ਵਿੱਚ ਸਹਾਇਤਾ ਪ੍ਰਦਾਨ ਕੀਤੀ ਗਈ। ਇਹਨਾਂ ਲਾਭਪਾਤਰੀਆਂ ਵਿੱਚ ਚਮਨ ਦੀਪ, ਬਲਵਿੰਦਰ ਕੁਮਾਰ, ਬਿਮਲਾ ਦੇਵੀ, ਰਾਣੀ, ਮਨਜੋਤ ਕੌਰ ਆਦਿ ਸ਼ਾਮਲ ਸਨ। ਸਮਾਜ ਸੇਵੀ ਕਿਰਪਾਲ ਸਿੰਘ ਬਲਾਕੀਪੁਰ ਨੇ ਕਿਹਾ ਕਿ ਲੋਡ਼ ਸਮੇਂ ਮੱਦਦ ਕਰਨਾ ਵੱਡੇ ਪੁੰਨ ਦਾ ਕਾਰਜ ਹੁੰਦਾ ਹੈ ਸੋ ਸਾਨੂੰ ਇਸ ਮਿਸ਼ਨ ਦੀ ਪੂਰਤੀ ਲਈ ਅੱਜ ਮੀਂਹ ਦੀ ਮਾਰ ਨਾਲ ਹੋਏ ਨੁਕਸਾਨ ਦੀ ਭਰਪਾਈ ਲਈ ਆਪਣੀ ਵਿੱਤ ਮੁਤਾਬਿਕ ਅੱਗੇ ਆਉਣ ਦੀ ਲੋਡ਼ ਹੈ। ਉਹਨਾਂ ਦੀਵਾਨ ਟੋਡਰ ਮੱਲ ਵਿਰਾਸਤੀ ਫਾਊਂਡੇਸ਼ਨ ਪੰਜਾਬ ਵਲੋਂ ਕੁਦਰਤੀ ਆਫ਼ਤ ਨਾਲ ਨੁਕਸਾਨੇ ਗਏ ਨੌਂ ਪਿੰਡਾਂ ਨੂੰ ਗੋਦ ਲੈਣ ਦੀ ਜਾਣਕਾਰੀ ਵੀ ਸਾਂਝੀ ਕੀਤੀ। ਪਿੰਡ ਗੁਣਾਚੌਰ ਦੇ ਸਰਪੰਚ ਤਲਵਿੰਦਰ ਸ਼ੇਰਗਿੱਲ ਅਤੇ ਸਮਾਜਿਕ ਸਮੀਖਿਆ ਸੁਰਜੀਤ ਮਜਾਰੀ ਨੇ ਉਕਤ ਕਾਰਜ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਫਾਊਂਡੇਸ਼ਨ ਵਲੋਂ ਜਮੀਨੀ ਪੱਧਰ ’ਤੇ ਕੀਤੇ ਜਾ ਰਹੀ ਰਾਹਤ ਕਾਰਜ ਸ਼ਲਾਘਾਯੋਗ ਹਨ ਅਤੇ ਸਾਨੂੰ ਕਿਸੇ ਕਿਸਮ ਦੇ ਦਿਖਾਵੇ ਦੀ ਬਜਾਏ ਦੂਜਿਆਂ ਦੇ ਸਹਿਯੋਗ ਲਈ ਹਿੱਸਾ ਪਾਉਣ ਦੀ ਲੋਡ਼ ਹੈ। ਇਸ ਮੌਕੇ ਪਿੰਡ ਗੁਣਾਚੌਰ ਦੇ ਸਾਬਕਾ ਸਰਪੰਚ ਪਰਮਜੀਤ ਸਿੰਘ, ਪਿੰਡ ਬਲਾਕੀਪੁਰ ਦੇ ਸਰਪੰਚ ਮਨਜੀਤ ਸਿੰਘ, ਐਨ ਆਰ ਆਈ ਜਸਵਿੰਦਰ ਸਿੰਘ ਅਟਵਾਲ, ਠੇਕੇਦਾਰ ਸਤਨਾਮ ਸਿੰਘ ਢੰਡਾ ਆਦ ਵੀ ਸ਼ਾਮਲ ਸਨ।
