(ਸਮਾਜ ਵੀਕਲੀ)
ਦਿੱਲੀ ਦੀ ਸਰਹੱਦਾਂ ਤੇ ਬੈਠੇ ਚਿਰ ਤੋਂ ਹਨ ਕਿਰਸਾਨ ।
ਧੰਨ ਹੈ ਜਿਗਰਾ ਹਾਲੇ ਤਾਈਂ ਡੋਲਿਆ ਨਾ ਈਮਾਨ ।
ਖੁੱਲੇ ਅਸਮਾਨਾਂ ਦੇ ਹੇਠਾਂ ਗਰਮੀ ਤੇ ਸਿਆਲ਼ ਬੀਤਿਆ,
ਬਰਸਾਤਾਂ ਦੇ ਵਿੱਚ ਡੁੱਬੇ ਨੇ ਬੱਚੇ , ਬੁੱਢੇ ਅਤੇ ਜਵਾਨ ।
ਹਾਕਮ ਦੇ ਕੰਨਾਂ ਦੇ ਉੱਤੇ ਜੂੰ ਅਜੇ ਤੱਕ ਸਰਕੀ ਨਹੀਂ ,
ਕਿੰਨੇ ਵੀਰ ਹੱਕਾਂ ਦੀ ਖਾਤਿਰ ਹੋ ਗਏ ਨੇ ਕੁਰਬਾਨ ।
ਆਪਣਾ ਹੀ ਹੱਕ ਮੰਗਣ ਉੱਤੇ ਮਿਲਦੇ ਲਾਠੀ ਡੰਡੇ ਨੇ ,
ਕਿਹੜੇ ਮੂੰਹ ਨਾਲ ਕਹੀਏ ਸਾਡਾ ਭਾਰਤ ਦੇਸ਼ ਮਹਾਨ ।
ਇਸ ਤੋਂ ਵੱਧ ਕਿਰਸਾਨਾਂ ਦੇ ਨਾਲ ਹੋਰ ਬੁਰਾ ਕੀ ਹੋਵੇਗਾ ,
ਚੁੱਲ੍ਹੇ ਅੱਗ ਬਲਦੀ ਰੱਖਣ ਲਈ ਜਾਣਾ ਪਿਆ ਸ਼ਮਸ਼ਾਨ।
ਕੈਸਾ ਨੇਤਾ ਚੁਣ ਕੇ ਘੱਲਿਆ ਸੰਸਦ ਦੇ ਵਿੱਚ ਲੋਕਾਂ ਨੇ ,
ਖਾਕੇ ਅੰਨ ਕਿਸਾਨ ਦਾ ਕੀਤਾ ਧਨੀਆਂ ਦਾ ਗੁਣਗਾਨ।
ਅੱਤਵਾਦੀ ,ਅੰਦੋਲਨਜੀਵੀ,ਮੱਵਾਲੀ ਜਿਹੇ ਨਾਂਅ ਬਖਸ਼ੇ,
ਕਰ ਕੇ ਜੁਮਲੇਬਾਜ਼ੀ ਨੇਤਾਵਾਂ ਹਰ ਹੀਲੇ ਕੀਤਾ ਪਰੇਸ਼ਾਨ ।
ਕਰਦੇ ਨਿੱਤ ਡਰਾਮੇਬਾਜ਼ੀ ਗੱਲ ਸਿਰੇ ਕੋਈ ਲਾਈ ਨਾ ,
ਭ੍ਰਿਸ਼ਟ ਸਰਕਾਰ ਦੇ ਵਜੀਰ ਵੀ ਨਿੱਕਲੇ ਕੈਸੇ ਬੇਈਮਾਨ ।
ਚੌਣਾਂ ਆਈਆਂ ਨੇੜੇ ਹੁਣ ਸਾਰੇ ਹੀ ਲਾਹਾ ਤੱਕਣਗੇ ,
ਲੋਕ ਲੁਭਾਊ ਵਾਅਦਿਆਂ ਦੇ ਫੋਕੇ ਹੋਣੇ ਨਿੱਤ ਐਲਾਨ ।
ਭੋਲੇ ਭਾਲੇ ਕਿਰਸਾਨਾਂ ਨੂੰ ਵਾਂਗ ਵੋਟ ਬੈਂਕ ਦੇ ਵਰਤਣਗੇ ,
ਸ਼ਬਦਾਂ ਵਿੱਚ ਫਸਾ ਲੈਣਗੇ ਇਹ ਗੱਲ ਜਾਣੇ ਕੁੱਲ ਜਹਾਨ।
ਮਿੱਠੀਆਂ ਗੱਲਾਂ ਨਾਲ ਵੇਖਿਓ ਓਹਨਾਂ ਦਾ ਪੱਖ ਪੂਰਨਗੇ ,
ਚੜ੍ਹ ਕੇ ਸਟੇਜਾਂ ਤੇ ਬੱਬੂ ਕਿਰਤੀ ਨੂੰ ਮੰਨਣਗੇ ਭਗਵਾਨ।
ਬਲਬੀਰ ਕੌਰ ਬੱਬੂ ਸੈਣੀ
‘ਸਮਾਜ ਵੀਕਲੀ’ ਐਪ ਡਾਊਨਲੋਡ ਕਰਨ ਲਈ ਹੇਠ ਦਿਤਾ ਲਿੰਕ ਕਲਿੱਕ ਕਰੋ
https://play.google.com/store/apps/details?id=in.yourhost.samajweekly
