ਹੁਣ ਜੱਦ ਵੀ ਤੂੰ ਮਿਲੀਂ
(ਸਮਾਜ ਵੀਕਲੀ)
ਹੁਣ ਜੱਦ ਵੀ ਤੂੰ ਮਿਲੀਂ
ਅੱਧਾ ਅਧੂਰਾ ਜਾਂ ਟੁਕੜਿਆਂ
ਵਿੱਚ ਨਾ ਮਿਲੀਂ
ਮਿਲਣਾ , ਵਿਛੱੜਣਾ
ਵਿੱਛੜਣਾ , ਮਿਲਣਾ
ਇਸ ਨਾਲ ਮੇਰੇ ਵਜੂਦ ਦੇ
ਟੁਕੜੇ ਟੁਕੜੇ ਹੋ ਜਾਂਦੇ ਹਨ
ਉਹਨਾਂ ਖਿਲਰੇ ਟੁਕੜਿਆਂ ਨੂੰ
ਇਕੱਠਾ ਕਰ ਜੋੜਨਾ ਮੇਰੇ
ਵੱਸ ਵਿੱਚ ਨਹੀਂ ਹੈ
ਸਾਰੀ ਦੀ ਸਾਰੀ ਫਿਰ ਮੈਂ
ਟੁੱਟ ਕੇ ਖਿਲਰ ਪੁਲਰ ਜਾਂਦੀ ਹਾਂ
ਹੁਣ ਜੱਦ ਵੀ ਤੂੰ ਮਿਲੀਂ
ਅੱਧਾ ਅਧੂਰਾ ਜਾਂ ਟੁਕੜਿਆਂ
ਵਿੱਚ ਨਾ ਮਿਲੀਂ
ਸਾਰੇ ਦਾ ਸਾਰਾ ਤੂੰ ਮੈਨੂੰ
ਸਿਰਫ਼ ਮੇਰਾ ਹੋ ਕੇ ਮਿਲੀਂ
ਸ਼ਾਇਦ ਟੁਕੜੇ ਟੁਕੜੇ ਹੋਏ
ਆਪਣੇ ਵਜੂਦ ਦੇ ਟੁਕੜਿਆਂ ਨੂੰ
ਮੁੜ ਜੋੜ ਸਕਾਂ
ਜੋ ਤੇਰੇ ਜਾਣ ਦੇ ਬਾਦ
ਅਜੇ ਤੱਕ ਟੁੱਟੇ ਹੋਏ ਨੇ
ਹਰ ਪੱਲ ਹਰ ਘੜੀ ਹਰ ਸਾਹ
ਉਸ ਪੱਲ ਦਾ ਇੰਤਜ਼ਾਰ
ਕਰ ਰਹੀ ਹਾਂ ਮੈਂ
ਹੁਣ ਜੱਦ ਵੀ ਤੂੰ ਮਿਲੀਂ
ਅੱਧਾ ਅਧੂਰਾ ਜਾਂ ਟੁਕੜਿਆਂ
ਵਿੱਚ ਨਾ ਮਿਲੀਂ
ਸਾਰੇ ਦਾ ਸਾਰਾ ਤੂੰ ਮੈਨੂੰ
ਸਿਰਫ਼ ਮੇਰਾ ਹੋ ਕੇ ਮਿਲੀਂ
ਹੁਣ ਜੱਦ ਵੀ ਤੂੰ ਮਿਲੀਂ ।
– ਰਮਿੰਦਰ ਰੰਮੀ
