ਸੰਤੁਸ਼ਟ ਰਹਿਣਾ ਸਿਖੀਏ ਤਾਂ ਕਿ ਖੁਸ਼ ਰਹਿ ਸਕੀਏ   

 (ਸਮਾਜ ਵੀਕਲੀ)  – ਜ਼ਿੰਦਗੀ ਬਹੁਤ ਕੁੱਝ ਵਿਖਾਉਂਦੀ ਹੈ ਅਤੇ ਬਹੁਤ ਕੁੱਝ ਸਿਖਾਉਂਦੀ ਵੀ ਹੈ।ਕੁਦਰਤ ਨੇ ਸਾਨੂੰ ਹਰ ਤਰ੍ਹਾਂ ਦੇ ਹਾਲਾਤਾਂ ਬਾਰੇ ਸੋਚਣ ਅਤੇ ਸਮਝਣ ਦੀ ਸੋਝੀ ਦਿੱਤੀ ਹੈ।ਸਿਆਣੇ ਹਮੇਸ਼ਾਂ ਸਬਰ ਸੰਤੋਖ ਦੀ ਗੱਲ ਕਰਦੇ ਹਨ।ਸੰਤੁਸ਼ਟ ਰਹਿਣ ਦੀ ਸਿਖਿਆ ਦਿੰਦੇ ਹਨ।ਆਪਣੀ ਚਾਦਰ ਵੇਖਕੇ ਪੈਰ ਪਸਾਰਣ ਦੀ ਗੱਲ ਵੀ ਅਕਸਰ ਹੀ ਕਰਦੇ ਹਨ।ਇਸਦੇ ਨਾਲ ਹੀ ਮਿਹਨਤ ਅਤੇ ਕਿਰਤ ਕਰਨ ਦੀ ਗੱਲ ਕਰਨੀ ਵੀ ਨਹੀਂ ਭੁੱਲਦੇ।ਸਾਦਾ ਖਾਣ ਅਤੇ ਸਾਦਾ ਜ਼ਿੰਦਗੀ ਜਿਊਣ ਲਈ ਸਲਾਹ ਦਿੰਦੇ ਹਨ।ਪਰ ਇਸ ਪਦਾਰਥਵਾਦੀ ਯੁੱਗ ਤੇ ਸੋਚ ਨੇ ਸਿਆਣਿਆਂ ਦੀਆਂ ਗੱਲਾਂ ਫਾਲਤੂ ਲੱਗਣ ਲਗਾ ਦਿੱਤੀਆਂ।ਉਸਨੂੰ ਅਸੀਂ ਭੁਗਤ ਵੀ ਰਹੇ ਹਾਂ।ਹਕੀਕਤ ਇਹ ਹੈ ਕਿ ਹਰ ਚੀਜ਼ ਦਾ ਅਤੇ ਬਦਲਾਅ ਦਾ ਸਮਾਜ ਦੇ ਹਰ ਵਰਗ ਤੇ ਅਸਰ ਪੈਂਦਾ ਹੈ।   ਸੱਚ ਇਹ ਹੈ ਕਿ ਜਿਸਨੇ ਸੰਤੁਸ਼ਟ ਹੋਣਾ ਹੈ,ਉਹ ਹਰ ਹਾਲ ਵਿੱਚ ਸੰਤੁਸ਼ਟ ਰਹਿੰਦਾ ਹੈ।ਜਦੋਂ ਸੋਹਣੀ ਘਰ ਵਿੱਚ ਦੋ ਵੇਲੇ ਰੋਟੀ ਪੱਕਦੀ ਹੈ ਤਾਂ ਉਹ ਖੁਸ਼ ਨਸੀਬ ਹੈ।ਪੇਟ ਭਰਕੇ ਰੋਟੀ ਖਾਧੀ ਅਤੇ ਰੋਟੀ ਹਜ਼ਮ ਹੋ ਰਹੀ ਹੈ,ਇਸ ਤੋਂ ਵੱਧ ਹੋਰ ਕੀ ਚਾਹੀਦਾ ਹੈ।ਜਿੰਨ੍ਹਾਂ ਨੇ ਸੰਤੁਸ਼ਟ ਨਹੀਂ ਹੋਣਾ ਉਹ ਕਈ ਤਰ੍ਹਾਂ ਦੇ ਪਕਵਾਨ ਵੇਖਕੇ ਅਤੇ ਖਾ ਕੇ ਵੀ ਸੰਤੁਸ਼ਟ ਨਹੀਂ ਹੋਏਗਾ।ਉਹ ਹਰ ਖਾਣ ਵਾਲੀ ਚੀਜ਼ ਵਿੱਚ ਨੁਕਸ ਕੱਢੇਗਾ।ਹਰ ਵੇਲਾ ਚਿੜਚਿੜ ਕਰੇਗਾ।ਅਜਿਹੇ ਲੋਕ ਨਾ ਸੰਤੁਸ਼ਟ ਹੁੰਦੇ ਹਨ ਅਤੇ ਨਾ ਮਾਹੌਲ ਸੁਖਾਵਾਂ ਰਹਿਣ ਦਿੰਦੇ ਹਨ।ਅਜਿਹੇ ਲੋਕ ਮਾਨਸਿਕ ਤੌਰ ਤੇ ਠੀਕ ਨਹੀਂ ਹੁੰਦੇ।ਜਦੋਂ ਹਰ ਵੇਲੇ ਦਿਮਾਗ਼ ਪ੍ਰੇਸ਼ਾਨ ਰਹੇਗਾ ਤਾਂ ਖੁਸ਼ੀ ਨੇੜੇ ਤੇੜੇ ਵੀ ਨਹੀਂ ਆਏਗੀ।ਬਹੁਤ ਵਾਰ ਅਜਿਹੇ ਲੋਕ ਆਪਣੀ ਪ੍ਰੇਸ਼ਾਨੀ ਦਾ ਭਾਂਡਾ ਦੂਸਰਿਆਂ ਦੇ ਸਿਰ ਤੋੜਦੇ ਹਨ।ਜਿਹੜੇ ਲੋਕ ਰੋਟੀ ਦੀ ਕਦਰ ਨਹੀਂ ਕਰਦੇ,ਉਹ ਕਦੇ ਸੰਤੁਸ਼ਟ ਅਤੇ ਖੁਸ਼ ਨਹੀਂ ਰਹਿ ਸਕਦੇ।ਸਿਆਣਿਆਂ ਨੇ ਠੀਕ ਹੀ ਕਿਹਾ ਹੈ,”ਜੈਸਾ ਅੰਨ ਵੈਸੇ ਮੰਨ”।ਹਮੇਸ਼ਾਂ ਸ਼ੁਕਰ ਕਰੋ ਕਿ ਸਾਨੂੰ ਪੇਟ ਭਰ ਰੋਟੀ ਮਿਲ ਰਹੀ ਹੈ।ਖਿਝਕੇ ਖਾਧਾ ਖਾਣਾ ਉਵੇਂ ਦਾ ਹੀ ਸਰੀਰ ਤੇ ਅਸਰ ਪਾਉਂਦਾ ਹੈ।