(ਸਮਾਜ ਵੀਕਲੀ)
ਵਿਆਹ ਵਰਗੇ ਗੰਭੀਰ ਮੁੱਦੇ ਤੇ ਵਿਚਾਰ ਹੋਣਾ ਬਹੁਤ ਲਾਜ਼ਮੀ ਹੋ ਗਿਆ ਅੱਜ…ਕਿਉਂਕਿ ਅਫ਼ਸੋਸ ਹੈ ਕਿ ਵਿਆਹ ਹੁਣ ਇੱਕ ਵਪਾਰਿਕ ਸਾਂਝ ਹੋ ਨਿਬੜਿਆ ਹੈ। ਚੰਗੇ ਜੀਵਨ ਸਾਥੀ ਦੀ ਤਲਾਸ਼ ਛੱਡ ਕੇ ਅਸੀਂ ਲਾਲਚ ਨੂੰ ਜ਼ਰੀਆ ਬਣਾ ਲਿਆ ਆਪਣੀ ਨਿਕੰਮੀ ਔਲਾਦ ਨੂੰ ਸੰਭਾਲਣ ਦਾ, ਹਾਲਾਂਕਿ ਮੀਆਂ-ਬੀਵੀ ਦਾ ਰਿਸ਼ਤਾ ਕੋਈ ਵਣਜ-ਵਪਾਰ ਨਹੀਂ ਹੁੰਦਾ। ਮੁੱਲ ਦਾ ਵਿਆਹ ਅੱਜ ਇੱਕ ਸਮਾਜਿਕ ਕੁਰੀਤੀ ਬਣ ਚੁੱਕਿਆ ਹੈ।
ਕਦੇ ਦਾਜ ਹੱਥੋਂ ਧੀਆਂ ਮਰਦੀਆਂ ਸੀ, ਅੱਜ ਸਾਡਾ ਲਾਲਚ ਸਾਡੇ ਪੁੱਤਾਂ ਨੂੰ ਮਾਰ ਰਿਹਾ ਹੈ! ਪਤਾ ਨਹੀਂ ਇਹ ਸਮਾਜਿਕ ਕਰਮਾਂ ਦੇ ਨਤੀਜੇ ਨੇ ਜਾਂ ਔਰਤ ਦੀ ਪ੍ਰਗਤੀ? ਸਾਨੂੰ ਇਸ ਤਰ੍ਹਾਂ ਦੇ ਨਾਜਾਇਜ਼ ਤਰੀਕੇ ਅਪਨਾਉਣ ਨਾਲੋਂ ਆਪਣੀ ਔਲਾਦ ਨੂੰ ਲਾਡ-ਪਿਆਰ ਦੇ ਨਾਲ ਮਿਹਨਤ, ਲਗਨ ਤੇ ਪੜ੍ਹਣ ਦੀ ਨਸੀਹਤ ਦੇਣੀ ਚਾਹੀਦੀ ਹੈ।
ਹੋ ਕੀ ਗਿਆ ਸਾਡੀ ਮੱਤ ਨੂੰ? ਸਾਡੇ ਸਮਾਜ ਦੀ ਤ੍ਰਾਸਦੀ ਦੇਖੋ, ਅਸੀਂ ਵਿਦੇਸ਼ ਜਾਣ ਲਈ ਕਿਸੇ ਵੀ ਤਰਾਂ ਦੇ ਜੋੜ-ਤੋੜ ਨੂੰ ਮਾਨਤਾ ਦੇਈ ਬੈਠੇ ਹਾਂ। ਸਾਡੇ ਕਮਜ਼ੋਰ ਮਾਨਸਿਕ ਪੱਧਰ ਨੇ *IELTS* ਨੂੰ ਬਹੁਤ ਵੱਡੀ ਯੋਗਤਾ ਦਾ ਦਰਜਾ ਦੇ ਦਿੱਤਾ ਹੈ। ਹਾਲਾਂਕਿ ਇਹ ਸਿਰਫ਼ ਇੱਕ ਭਾਸ਼ਾ ਦੇ ਗਿਆਨ ਦਾ ਪੈਮਾਨਾ ਹੈ, ਕੋਈ ਯੋਗਤਾ ਨਹੀਂ। ਜੇ ਸਾਡੇ 12 ਪੜ੍ਹੇ ਮੁੰਡੇ ਨੂੰ ਇਹ ਨਿੱਕੇ ਜਿਹੇ ਟੈਸਟ ਵਾਸਤੇ ਕੁੜੀ ਦਾ ਸਹਾਰਾ ਚਾਹੀਦਾ ਹੈ ਤਾਂ ਯਾਦ ਰੱਖਿਓ ਸਾਡਾ ਪੁੱਤ ਮਰਦ ਹੈ ਹੀ ਨਹੀਂ! ਮੈਂ ਹੈਰਾਨ ਹਾਂ, ਹੋ ਕੀ ਗਿਆ ਪੰਜਾਬ ਦੇ ਗੱਭਰੂਆਂ ਨੂੰ?
ਨਾਲੇ ਅਸੀਂ 25-30 ਲੱਖ ਖਰਚਦੇ ਹਾਂ, ਨਾਲੇ ਮਗਰੋਂ ਪਿੱਟਦੇ ਹਾਂ। ਪੁੱਤਰੋ ਇਹ ਟੁੱਚ ਜਿਹਾ ਟੈਸਟ ਆਪ ਪਾਸ ਕਰੋ, ਕਿਹੜੀ ਵੱਡੀ ਗੱਲ ਹੈ, ਖੁਦ ਮਿਹਨਤ ਕਰੋ, ਕੁੜੀਆਂ ਦਾ ਸਹਾਰਾ ਭਾਲਣ ਦੀ ਥਾਂ ਪੰਜਾਬ ਦੀਆਂ ਧੀਆਂ-ਭੈਣਾਂ ਦੀ ਪੱਤ ਨੂੰ ਸੰਭਾਲੋ ਯਰ, ਇਹ ਸਾਡਾ ਗੌਰਵਮਈ ਇਤਿਹਾਸ ਵੀ ਹੈ। ਕਦੇ ਕਦੇ ਪੜ੍ਹਿਆ ਕਰੋ ਸਾਡੇ ਸੂਰਮਿਆਂ ਦੀਆਂ ਗਾਥਾਵਾਂ ਨੂੰ, ਜਰੂਰ ਜੋਸ਼ ਆਊਗਾ, ਦੇਖਿਓ ਸਭ ਰੁਕਾਵਟਾਂ ਤੁਸੀਂ ਖੁਦ ਹੀ ਪਾਰ ਕਰ ਜਾਣੀਆਂ ਨੇ।
ਆਓ ਵਿਆਹ ਵਰਗਾ ਸੰਵੇਦਨਸ਼ੀਲ ਰਿਸ਼ਤਾ ਲਾਲਚ ਕਰਕੇ ਜੋੜਣ ਤੋਂ ਪ੍ਰਹੇਜ਼ ਕਰੀਏ, ਮੁੰਡੇ-ਕੁੜੀ ਦੇ ਜੋੜ ਨੂੰ ਪਹਿਲ ਦੇਈਏ, ਦੋ ਪਵਿੱਤਰ ਰੂਹਾਂ ਦਾ ਮੇਲ ਕਰਾਈਏ, ਜਿੱਥੇ ਦਿਲ ਮਿਲ ਜਾਣ ਓੱਥੇ ਦੁਨਿਆਵੀ ਚੀਜ਼ਾਂ ਨੂੰ ਪਿੱਛੇ ਛੱਡ ਦੇਣਾ ਚਾਹੀਦਾ ਹੈ ਕਿਉਂਕਿ ਜੀਵਨ ਤੇ ਪੈਸਾ-ਧੇਲਾ ਨਹੀਂ ਸਿਆਣਪ ਰਾਜ ਕਰਦੀ ਹੈ।
ਪਵਿੱਤਰ ਸਥਾਨਾਂ ਤੇ ਖੁਦ ਪਵਿੱਤਰ ਹੋ ਕੇ ਜਾਈਏ ਤਾਂ ਗੱਲ ਬਣਦੀ ਹੈ। ਜਦੋਂ ਕੁਝ ਗ਼ਲਤ ਹੋ ਜਾਂਦਾ ਹੈ ਫਿਰ ਸਾਡੇ ਮਨਸੂਬੇ ਸਿਰੇ ਨਹੀਂ ਚੜਦੇ, ਫਿਰ ਸਾਡੇ ਵੱਲੋਂ ਹਰ ਤਰਾਂ ਦੀ ਬੇਲਗਾਮ ਤੇ ਘਟੀਆ ਇਲਜ਼ਾਮ ਬਾਜ਼ੀ ਸ਼ੁਰੂ ਹੋ ਜਾਂਦੀ ਹੈ। ਇਸ ਤੋਂ ਬਚਣ ਲਈ ਸਾਨੂੰ ਵਪਾਰਿਕ ਰਿਸ਼ਤਿਆਂ ਤੋਂ ਗੁਰੇਜ਼ ਕਰਨਾ ਹੀ ਪਵੇਗਾ। ਲੜਕਾ-ਲੜਕੀ ਨੂੰ ਅਪਣਾਓ, ਉਨ੍ਹਾਂ ਦੇ ਸੁਪਨਿਆਂ ਨੂੰ ਨਾ ਖ਼ਰੀਦੋ, ਵਿਆਹ ਨੂੰ ਆਪਾਂ ਪ੍ਰੇਮ ਬੰਧਨ ਹੀ ਰਹਿਣ ਦੇਈਏ, ਵਪਾਰ ਨਾ ਬਣਾਈਏ ਕਿਉਂਕਿ ਵਪਾਰ ਨਫ਼ੇ-ਨੁਕਸਾਨ ਦੀ ਖੇਡ ਹੈ! ਜ਼ਿੰਦਗੀਆਂ ਨੂੰ ਦਾਅ ਲੱਗਣੋ ਬਚਾਈਏ, ਇੱਕ-ਦੂਜੇ ਦੇ ਮਨੋ ਕੰਮ ਆਈਏ।
ਹਰਫੂਲ ਭੁੱਲਰ
ਮੰਡੀ ਕਲਾਂ 9876870157
‘ਸਮਾਜ ਵੀਕਲੀ’ ਐਪ ਡਾਊਨਲੋਡ ਕਰਨ ਲਈ ਹੇਠ ਦਿਤਾ ਲਿੰਕ ਕਲਿੱਕ ਕਰੋ
https://play.google.com/store/apps/details?id=in.yourhost.samajweekly
