(ਸਮਾਜ ਵੀਕਲੀ) ਪ੍ਰਿਤਪਾਲ ਸਿੰਘ ਬੜੇ ਪ੍ਰਬੁੱਧ ਤੇ ਪ੍ਰਬੀਨ ਹਾਸਰਸ ਸਾਹਿਤਕਾਰ ਹਨ ਜਿਨ੍ਹਾਂ ਨੂੰ ਅੱਜ ਦੀ ਦੌੜ-ਭੱਜ ਵਾਲੀ ਰੋਜ਼-ਮਰ੍ਹਾ ਦੀ ਜ਼ਿੰਦਗੀ ਵਿੱਚੋਂ ਵੀ ਚੁਟਕਲੇ,ਚਹੇਡਾਂ,ਹਾਸ-ਰਸ ਟੋਟਕੇ, ਮਸਖ਼ਰੀਆਂ ਤੇ ਹੋਰ ਹਲ਼ਕਾ-ਫੁਲ਼ਕਾ ਹਾਸ-ਵਿਅੰਗ ਕੱਢ ਲੈਣ ਦੀ ਮੁਹਾਰਤ ਹਾਸਿਲ ਹੈ। ਉਨ੍ਹਾਂ ਨੇ ਹੁਣ ਤੱਕ ਪੰਜ ਹਾਸ-ਰਸ ਪੁਸਤਕਾਂ ਮਾਂ-ਬੋਲੀ ਪੰਜਾਬੀ ਦੀ ਝੋਲੀ ਪਾਈਆਂ ਹਨ ਜਿਨ੍ਹਾਂ ਵਿੱਚ ‘ਆਓ ਹੱਸੀਏ’, ‘ਹੱਸਣਾ ਤੇ ਹਸਾਉਣਾ,’ਦੱਬ ਕੇ ਹੱਸੋ’, ‘ਹੱਸੋ ਤੇ ਹਸਾਓ’, ‘ ਕੁਤਕਤਾਰੀਆਂ’ ਸ਼ਾਮਿਲ ਹਨ। ਹਥਲੀ ਪੁਸਤਕ ‘ਹਾਸਾ ਨਿਰ੍ਹਾ ਪਤਾਸਾ’ ਹਾਸ-ਵਿਅੰਗ ਦੀ ਉਨ੍ਹਾਂ ਦੀ ਛੇਵੀਂ ਪੁਸਤਕ ਹੈ ਜਿਸ ਵਿੱਚ ਪੇਸ਼ ਹਾਸ-ਰਸ ਖਾਦ-ਪਦਾਰਥ ਉਦਾਸੇ ਜਾਂ ਡਿਪਰੈੱਸਿਡ ਲੋਕ-ਮਨਾਂ ਨੂੰ ਤਰੋ-ਤਾਜ਼ਾ ਕਰਨ ਲਈ ਬੜਾ ਲਾਹੇਵੰਦ ਤੇ ਕਿਸੇ ਕੀਮਤੀ ਔਸ਼ਦੀ ਜਾਂ ਜੜੀ-ਬੂਟੀ ਵਾਂਗ ਹੈ। ਦੋ ਸੌ ਸੌਲਾਂ ਪੰਨਿਆਂ ਦੀ ਇਸ ਪੁਸਤਕ ਵਿੱਚ ਉਨ੍ਹਾਂ ਦੇ ਮੌਲਿਕ ਵਿਅੰਗਮਈ ਬੰਦ ਸ਼ਾਮਿਲ ਹਨ ਜੋ ਘੁੱਗੂ-ਵੱਟੇ ਚਿਹਰੇ ‘ਤੇ ਵੀ ਮੁਸਕਾਨ ਲਿਆਉਣ ਲਈ ਪਾਠਕ ਨੂੰ ਮਜ਼ਬੂਰ ਕਰਦੇ ਹਨ। ਇਸ ਪੁਸਤਕ ਵਿੱਚ ਸਵਾ ਤਿੰਨ ਸੌ ਦੇ ਕਰੀਬ ਚੁਟਕਲੇ, ਚਹੇਡਾਂ,ਮਸਖ਼ਰੀਆਂ ਤੇ ਹਲ਼ਕੇ-ਫੁਲ਼ਕੇ ਹਾਸ-ਰਸ ਟੋਟਕੇ ਸ਼ਾਮਿਲ ਹਨ ਜਿਨ੍ਹਾਂ ਵਿੱਚ ਕਈ ਇੱਕ-ਦੋ ਵਾਕਾਂ ਤੱਕ ਸੀਮਤ ਹਨ ਅਤੇ ਕਈ ਇੱਕ-ਡੇਢ ਪੰਨੇ ਤੱਕ ਵੀ ਫੈਲੇ ਹੋਏ ਹਨ। ਸਭ ਇੱਕ-ਦੂਜੇ ਤੋਂ ਚੜ੍ਹਦੇ ਹੀ ਹਨ ਜੋ ਪਾਠਕ ਨੂੰ ਆਪਣੇ ਨਾਲ਼ ਜੋੜਣ ਲਈ ਤਹੱਈਆ ਕਰਦੇ ਹਨ। ਇਹ ਪੁਸਤਕ M/s 21st century publisher, patiala ਤੋਂ ਪ੍ਰਾਪਤ ਕੀਤੀ ਜਾ ਸਕਦੀ ਹੈ। ਪਬਲਿਸ਼ਰ ਦਾ ਸੰਪਰਕ ਨੰਬਰ 99153-98354 ਹੈ। ਪਰ ਜੇਕਰ ਇੱਕ ਹਾਸ-ਰਸ ਸਾਹਿਤਕਾਰ ਦੀ ਜ਼ਿੰਦਗੀ ਬਾਰੇ ਕੁੱਝ ਚਾਨਣਾ ਪਾਉਣ ਦੀ ਕੋਸ਼ਿਸ਼ ਕਰੀਏ ਤਾਂ ਮੈਂ ਆਪਣੇ ਨਿਜੀ ਤਜ਼ੁਰਬਿਆਂ ਵਿੱਚੋਂ ਆਖ ਸਕਦਾ ਹਾਂ ਕਿ ਇਨ੍ਹਾਂ ਸਾਹਿਤਕਾਰਾਂ ਦੀ ਜ਼ਿੰਦਗੀ ਵਿੱਚ ਵੀ ਆਮ ਵਿਅਕਤੀ ਵਾਂਗ ਦੁੱਖ-ਤਕਲੀਫ਼ਾਂ ਦੇ ਗਰੇ ਲੱਗੇ ਹੁੰਦੇ ਹਨ ਕਿਉਂਕਿ ਇਹ ਵੀ ਇੱਕ ਮਨੁੱਖੀ ਜੀਵ ਹਨ। ਮੈਂ ਕੋਈ ਹੋਰ ਮਿਸਾਲ ਲੈਣ ਦੀ ਬਜਾਏ ਹਥਲੀ ਪੁਸਤਕ ਦੇ ਲੇਖਕ ਪ੍ਰਿਤਪਾਲ ਸਿੰਘ ਦੇ ਨਿਜੀ-ਜੀਵਨ ਬਾਰੇ ਹੀ ਗੱਲ ਕਰਾਂ ਤਾਂ ਆਖ ਸਕਦਾ ਹਾਂ ਕਿ ਇਨ੍ਹਾਂ ਦਾ ਇੱਕ ਛੋਟਾ ਜਿਹਾ ਪਰਿਵਾਰ ਹੈ ਜਿਸ ਵਿੱਚ ਸੁਪਤਨੀ ਸੇਵਾ ਮੁਕਤ ਅਧਿਆਪਕਾ ਰਣਜੀਤ ਕੌਰ, ਬੇਟੀ ਮਨਪ੍ਰੀਤ ਕੌਰ ਅਤੇ ਬੇਟਾ ਸੰਦੀਪ ਸਿੰਘ ਸ਼ਾਮਿਲ ਹਨ। ਬੇਟੀ ਵਿਆਹੀ-ਵਰੀ ਆਪਣੇ ਘਰ ਹੱਸਦੀ-ਵੱਸਦੀ ਹੈ। ਬੇਟਾ ਬੈੰਕ ਮੁਲਾਜ਼ਮ ਹੈ। ਅੱਗੋਂ ਪ੍ਰਿਤਪਾਲ ਦੇ ਇੱਕ-ਇੱਕ ਪੋਤਾ-ਪੋਤੀ ਤੇ ਇੱਕ-ਇੱਕ ਹੀ ਦੋਹਤਾ ਦੋਹਤੀ ਹਨ ਜੋ ਉਸਦੇ ਪਰਿਵਾਰ ਦੀ ਵੇਲ ਵਧਾ ਰਹੇ ਹਨ। ਪਰ ਦੁੱਖ ਦੀ ਗੱਲ ਇਹ ਹੈ ਕਿ ਫ਼ਰਵਰੀ,2025 ਵਿੱਚ ਉਨ੍ਹਾਂ ਦਾ ਇੱਕਲੌਤਾ ਪੁੱਤਰ ਸੰਦੀਪ ਸਿੰਘ ਇੱਕ ਸੜਕ ਦੁਰਘਟਨਾ ਦਾ ਸ਼ਿਕਾਰ ਹੋ ਗਿਆ ਜੋ ਅੱਜ ਮੇਰੇ ਇਸ ਪੁਸਤਕ ‘ਤੇ ਚੰਦ ਸਤਰਾਂ ਲਿਖੇ ਜਾਣ ਤੱਕ ਵੀ ਮੰਜੇ ‘ਤੇ ਹੀ ਪਿਆ ਹੈ ਪਰ ਸਿਹਤ ਵਿੱਚ ਅੱਗੇ ਨਾਲ਼ੋਂ ਸੁਧਾਰ ਹੈ। ਸਮੁੱਚੇ ਪਰਿਵਾਰ ਅਤੇ ਡਾਕਟਰਾਂ ਦੀਆਂ ਕੋਸ਼ਿਸ਼ਾਂ ਦੇ ਬਲਬੂਤੇ ਛੇਤੀ ਹੀ ਤੰਦਰੁਸਤ ਹੋ ਜਾਵੇਗਾ। ਇਸ ਸਮੇਂ ਇਤਫ਼ਾਕ ਦੀ ਗੱਲ ਇਹ ਹੈ ਕਿ ਜੋ ਇਹ ਹਥਲੀ ਪੁਸਤਕ ਪ੍ਰਕਾਸ਼ਿਤ ਹੋਈ ਉਹ ਇਨ੍ਹਾਂ ਦੇ ਪੁੱਤਰ ਦੇ ਦੁਰਘਟਨਾਗ੍ਰਸਤ ਹੋਣ ਤੋਂ ਬਾਅਦ ਹੀ ਪਬਲਿਸ਼ ਹੋਈ ਹੈ। ਪ੍ਰਿਤਪਾਲ ਹੋਰਾਂ ਦੇ ਘਰ ਗਮਗੀਨ ਮਹੌਲ ਹੈ ਪਰ ਉਹ ਸਾਡੇ ਸਭ ਦੇ ਚਿਹਰਿਆਂ ‘ਤੇ ਰੌਣਕ ਲਿਆਉਣ ਲਈ ਅੱਜ ਵੀ ਤੱਤਪਰ ਹਨ। ਇਸ ਸਮੇਂ ਅਜਿਹੇ ਇੱਕ ਹਾਸ ਵਿਅੰਗ ਲਿਖਾਰੀ ਨੂੰ ਆਪ-ਮੁਹਾਰੇ ਦਿਲੋਂ ਸਲਾਮ ਨਿਕਲਦਾ ਹੈ।ਅੱਜ ਫਿਰ ਵੀ ਉਹ ਪਲ਼-ਪਲ਼ ਛਿਣ-ਛਿਣ ਹੋ ਕੇ ਲੰਘ ਰਹੇ ਵਕਤ ਵਿੱਚੋਂ ਹਾਸ-ਰਸ ਟੋਟਕੇ ਲੱਭ ਰਹੇ ਹਨ। ਇਹ ਉਨ੍ਹਾਂ ਦੀ ਜ਼ਿੰਦਾ-ਦਿਲੀ ਦੀ ਉਦਾਹਰਣ ਹੈ ਜੋ ਹਮੇਸ਼ਾਂ ਜ਼ਿੰਦਗੀ ਜ਼ਿੰਦਾਬਾਦ ਕਹਿਣ ਵਿੱਚ ਵਿਸ਼ਵਾਸ ਰੱਖਦੇ ਹਨ। ਇੱਕ ਥਾਂ ਚਾਰਲੀ ਚੈਪਲਿਨ ਨੇ ਲਿਖਿਆ ਹੈ, ” ਇਸ ਸੰਸਾਰ ਵਿੱਚ ਕੁੱਝ ਵੀ ਸਥਾਈ ਨਹੀਂ ਹੈ… ਸਾਡੀਆਂ ਮੁਸ਼ਕਿਲਾਂ/ਪੀੜਾਂ ਵੀ।” ਇੱਕ ਥਾਂ ਚੈਪਲਿਨ ਹੋਰ ਲਿਖਦਾ ਹੈ,” ਮੇਰੀ ਜ਼ਿੰਦਗੀ ਵਿੱਚ ਬਹੁਤ ਮੁਸੀਬਤਾਂ ਹਨ ਪਰ ਮੇਰੇ ਬੁੱਲ੍ਹ ਉਨ੍ਹਾਂ ਬਾਰੇ ਰਤਾ ਵੀ ਗੰਭੀਰ ਨਹੀਂ ਹਨ… ਉਹ ਹਮੇਸ਼ਾਂ ਮੁਸਕਰਾਉੰਦੇ ਰਹਿੰਦੇ ਹਨ।”
