ਉੱਡਦਾ ਪੰਛੀ

 ਅਚਾਨਕ ਤੱਕਿਆ ਉਸ
ਇਕ ਉੱਡਦਾ ਪੰਛੀ
ਵਿਹੜੇ ਵਿਚ ਉਸਦੇ ਆ ਬੈਠਾ
ਖ਼ੂਬਸੂਰਤ ਰੰਗਾਂ ਵਾਲਾ ਪੰਛੀ
ਬਹੁਤ ਪਿਆਰਾ ਲੱਗ ਰਿਹਾ ਸੀ
ਦੂਰੋਂ ਬੈਠੀ ਇੱਕ ਟੱਕ ਉਸਨੂੰ
ਬੜੇ ਪਿਆਰ ਨਾਲ ਨਿਹਾਰਦੀ ਰਹੀ
ਨੇੜੇ ਜਾ ਉਸਨੂੰ ਬੁਲਾਉਣਾ ਚਾਹਿਆ
ਪਰ ਫੁਰਰ ਕਰ ਉੱਡ ਗਿਆ ਉਹ
ਅਗਲੇ ਦਿਨ ਬਾਹਰ ਚੋਗਾ ਰੱਖ
ਉਡੀਕ ਕਰਨ ਲੱਗੀ
ਪੰਛੀ ਆਇਆ ਚੋਗਾ ਚੁਗਣ ਲੱਗਾ
ਹਿੰਮਤ ਨਹੀਂ ਹੋਈ ਨੇੜੇ ਜਾ
ਉਸਨੂੰ ਫੜਣ ਦੀ
ਚੋਗਾ ਚੁੱਗ ਫਿਰ ਉੱਡ ਗਿਆ
ਰੋਜ਼ ਹੀ ਇਸੇ ਤਰਾਂ ਚੱਲਦਾ ਰਿਹਾ
ਹਿੰਮਤ ਕਰ ਉਸਨੂੰ ਪੁਚਕਾਰਨਾ ਸ਼ੁਰੂ ਕੀਤਾ
ਉਹ ਵੀ ਬਹੁਤ  ਘੁਲ ਮਿਲ ਗਿਆ
ਚੋਗਾ ਚੁਗਦਾ ਰਹਿੰਦਾ ਉਹ
ਮੈਂ ਉਸ ਕੋਲ ਬੈਠੀ ਢੇਰ ਸਾਰੀਆਂ
ਗੱਲਾਂ ਕਰਦੀ ਉਸ ਨਾਲ
ਅਛੋਪਲੇ ਜਿਹੇ ਪਕੜ ਇਕ ਦਿਨ
ਅੰਦਰ ਲੈ ਆਈ
ਡਰਦਾ ਨਹੀਂ ਸੀ ਹੁਣ ਉਹ
ਸਾਰੇ ਘਰ ਵਿਚ ਇਧਰ ਉਧਰ
ਘੁੰਮਦਾ ਰਹਿੰਦਾ , ਚੋਗਾ ਚੁੱਗਦਾ
ਪਾਣੀ ਪੀ ਸੌਂ ਜਾਂਦਾ
ਮੈਂ ਪਿਆਰ ਨਾਲ ਉਸਨੂੰ
ਨਿਹਾਰਦੀ ਰਹਿੰਦੀ
ਹੁਣ ਮੇਰੀ ਜਾਣ ਵੱਸਦੀ ਸੀ
ਉਸ ਪਿਆਰੇ ਪੰਛੀ ਵਿਚ
ਬੂਹਾ ਖੁੱਲ੍ਹਾ ਦੇਖ ਇਕ ਦਿਨ

  ਉੱਡ ਗਿਆ ਉਹ ਪੰਛੀ