(ਸਮਾਜ ਵੀਕਲੀ)
ਹੱਕ ਮੰਗਣਾ ਹੈ ਗੁਨਾਹ ਇਸ ਦੌਰ ਅੰਦਰ,
ਸੱਚ ਬੋਲਣਾ ਵੀ ਹੋਇਆ ਖ਼ਤਰਾ ਇਸ ਦੌਰ ਅੰਦਰ।
ਇਨਸਾਫ਼ ਦੀ ਰਾਹ ਉੱਤੇ ਜੋ ਵੀ ਤੁਰ ਪੈਂਦਾ ਏ,
ਉਸ ਨੂੰ ਹੀ ਮਿਲਦਾ ਹਰਜ਼ਾਨਾ ਇਸ ਦੌਰ ਅੰਦਰ।
ਰੋਟੀ, ਰੁਜ਼ਗਾਰ, ਹੱਕ ਦੀ ਗੱਲ ਕਰ ਬੈਠੋ ਜੇ,
ਬਣ ਜਾਂਦਾ ਹੈ ਵੱਡਾ ਫ਼ਸਾਨਾ ਇਸ ਦੌਰ ਅੰਦਰ।
ਲਾਠੀਆਂ ਦੇ ਸਾਏ ਹੇਠ ਸਵਾਲ ਖੜ੍ਹੇ ਰਹਿੰਦੇ,
ਕੌਣ ਸੁਣੇ ਦਿਲ ਦਾ ਅਫ਼ਸਾਨਾ ਇਸ ਦੌਰ ਅੰਦਰ।
ਫਿਰ ਵੀ ਉਮੀਦਾਂ ਜਿਉਂਦੀਆਂ ਨੇ ਲੋਕਾਂ ਦੇ ਦਿਲ ਵਿੱਚ,
ਬਦਲੇਗਾ ਇੱਕ ਦਿਨ ਜ਼ਮਾਨਾ ਇਸ ਦੌਰ ਅੰਦਰ।
ਹਰ ਪਾਸੇ ਚੁੱਪੀਆਂ ਦਾ ਪਹਿਰਾ ਜਿਹਾ ਲੱਗਦਾ ਏ,
ਕਿੰਨਾ ਔਖਾ ਹੋ ਗਿਆ ਤਰਾਨਾ ਇਸ ਦੌਰ ਅੰਦਰ।
ਝੂਠ ਦੇ ਮੇਲੇ ਲੱਗਦੇ ਨੇ ਚੌਰਾਹਿਆਂ ਉੱਤੇ,
ਸੱਚ ਰਹਿੰਦਾ ਫਿਰਦਾ ਨਿਮਾਣਾ ਇਸ ਦੌਰ ਅੰਦਰ।
ਜਿਨ੍ਹਾਂ ਨੇ ਦਰਦਾਂ ਨਾਲ ਹੀ ਯਾਰੀ ਪਾਈ ਹੋਵੇ,
ਉਹਨਾਂ ਲਈ ਕੀ ਹੈ ਗੁਆਣਾ ਇਸ ਦੌਰ ਅੰਦਰ।
ਕੱਲ੍ਹ ਦੇ ਸੁਪਨੇ ਵੇਚ ਕੇ ਜੋ ਅੱਜ ਸਵਾਰ ਰਹੇ,
ਉਹਨਾਂ ਦਾ ਹੈ ਰੋਜ਼ ਨਿਸ਼ਾਨਾ ਇਸ ਦੌਰ ਅੰਦਰ।
ਦੀਵੇ ਤਾਂ ਬਹੁਤੇ ਬੁਝਾਏ ਨੇ ਹਨੇਰਿਆਂ ਨੇ ਪਰ,
ਰੌਸ਼ਨੀ ਨੇ ਨਹੀਂ ਸਿਰ ਝੁਕਾਣਾ ਇਸ ਦੌਰ ਅੰਦਰ।
ਲਿਖਣ ਵਾਲੇ ਕਲਮਾਂ ਨਾਲ ਜੰਗਾਂ ਲੜਦੇ ਨੇ,
ਸ਼ਬਦਾਂ ਨੇ ਬਣ ਜਾਣਾ ਪਰਵਾਨਾ ਇਸ ਦੌਰ ਅੰਦਰ।
ਜਿੰਨੇ ਮਰਜ਼ੀ ਰੋਕ ਲਵੋ ਸੱਚ ਦੀਆਂ ਆਵਾਜ਼ਾਂ,
ਸੱਚ ਨੇ ਇੱਕ ਦਿਨ ਜਿੱਤ ਕੇ ਆਣਾ ਇਸ ਦੌਰ ਅੰਦਰ।
ਡਾ ਬਲਜਿੰਦਰ ਕੁਮਾਰ ਕੰਬੋਜ
ਲੁਧਿਆਣਾ।
