ਲੈਸਟਰ (ਇੰਗਲੈਂਡ), (ਸਮਾਜ ਵੀਕਲੀ) (ਸੁਖਜਿੰਦਰ ਸਿੰਘ ਢੱਡੇ)– ਬਰਤਾਨੀਆ ਵਿਚ ਹੋ ਰਹੀਆਂ ਇੰਗਲੈਂਡ ਦੀਆਂ ਸਥਾਨਕ ਕੌਂਸਲ, ਸਕਾਟਲੈਂਡ ਸੰਸਦੀ ਅਤੇ ਵੇਲਜ਼ ਸੇਨੇਦ ਚੋਣਾਂ ਦੇ ਨਤੀਜਿਆਂ ਨੇ ਦੇਸ਼ ਦੀ ਸਿਆਸਤ ਵਿਚ ਵੱਡਾ ਭੂਚਾਲ ਲਿਆ ਦਿੱਤਾ ਹੈ। ਤਾਜ਼ਾ ਅੱਪਡੇਟ ਮੁਤਾਬਕ ਨਾਇਜਲ ਫਰਾਜ ਦੀ ਅਗਵਾਈ ਵਾਲੀ ਰਿਫਾਰਮ ਯੂ.ਕੇ. ਪਾਰਟੀ ਨੇ ਸਭ ਤੋਂ ਵੱਡਾ ਉਭਾਰ ਦਰਜ ਕਰਦਿਆਂ ਇੰਗਲੈਂਡ ਵਿਚ ਸੈਂਕੜਿਆਂ ਕੌਂਸਲਰ ਜਿੱਤ ਲਏ ਹਨ ਅਤੇ ਕਈ ਕੌਂਸਲਾਂ ’ਤੇ ਕਬਜ਼ਾ ਕਰ ਲਿਆ ਹੈ, ਜਦਕਿ ਪ੍ਰਧਾਨ ਮੰਤਰੀ ਕੀਰ ਸਟਾਰਮਰ ਦੀ ਲੇਬਰ ਪਾਰਟੀ ਅਤੇ ਕੰਜ਼ਰਵੇਟਿਵ ਪਾਰਟੀ ਦੋਵਾਂ ਨੂੰ ਭਾਰੀ ਝਟਕੇ ਲੱਗੇ ਹਨ। ਬਰਤਾਨਵੀ ਮੀਡੀਆ ਰਿਪੋਰਟਾਂ ਅਨੁਸਾਰ ਰਿਫਾਰਮ ਯੂ.ਕੇ. 600 ਤੋਂ ਵੱਧ ਕੌਂਸਲ ਸੀਟਾਂ ਜਿੱਤ ਚੁੱਕੀ ਹੈ ਅਤੇ ਕਈ ਪਰੰਪਰਾਗਤ ਲੇਬਰ ਅਤੇ ਟੋਰੀ ਗੜ੍ਹਾਂ ਵਿਚ ਵੱਡੀ ਸਫਲਤਾ ਹਾਸਲ ਕੀਤੀ ਹੈ। ਇੰਗਲੈਂਡ ਦੇ ਟੇਮਸਾਈਡ, ਹਾਰਟਲਪੂਲ, ਨਿਊਕੈਸਲ ਅੰਡਰ ਲਾਇਮ, ਸਫ਼ੋਕ, ਹਾਈਂਡਬਰਨ, ਕੈਨਕ ਚੇਜ਼, ਪ੍ਰੈਸਟਨ ਅਤੇ ਕੈਂਬ੍ਰਿਜ ਵਰਗੇ ਇਲਾਕਿਆਂ ਵਿਚ ਲੇਬਰ ਨੂੰ ਵੱਡਾ ਨੁਕਸਾਨ ਹੋਇਆ ਹੈ। ਕਈ ਥਾਵਾਂ ’ਤੇ ਲੇਬਰ ਆਪਣਾ ਦਹਾਕਿਆਂ ਪੁਰਾਣਾ ਬਹੁਮਤ ਵੀ ਗੁਆ ਬੈਠੀ ਹੈ। ਟੇਮਸਾਈਡ ਵਿਚ ਲੇਬਰ ਦੀ 47 ਸਾਲ ਪੁਰਾਣੀ ਪਕੜ ਖ਼ਤਮ ਹੋ ਗਈ ਹੈ ਅਤੇ ਰਿਫਾਰਮ ਯੂ.ਕੇ. ਸਭ ਤੋਂ ਵੱਡੀ ਵਿਰੋਧੀ ਪਾਰਟੀ ਵਜੋਂ ਉਭਰੀ ਹੈ। ਸਫ਼ੋਕ ਕੌਂਸਲ ’ਤੇ ਰਿਫਾਰਮ ਨੇ ਬਹੁਮਤ ਹਾਸਲ ਕਰ ਲਿਆ ਹੈ, ਜਦਕਿ ਕੰਜ਼ਰਵੇਟਿਵਾਂ ਦੀਆਂ ਦਰਜਨਾਂ ਸੀਟਾਂ ਖਿਸਕ ਗਈਆਂ ਹਨ। ਲੇਬਰ ਨੂੰ ਸਭ ਤੋਂ ਵੱਡਾ ਝਟਕਾ ਵੇਲਜ਼ ਵਿਚ ਲੱਗਦਾ ਦਿਖ ਰਿਹਾ ਹੈ, ਜਿੱਥੇ ਪਾਰਟੀ ਨੇ ਲਗਭਗ 27 ਸਾਲਾਂ ਤੋਂ ਸੱਤਾ ਸੰਭਾਲੀ ਹੋਈ ਸੀ। ਸੂਤਰਾਂ ਅਨੁਸਾਰ ਵੇਲਜ਼ ਦੀ ਫਸਟ ਮਿਨਿਸਟਰ ਐਲੂਨੇਡ ਮੋਰਗਨ ਆਪਣੀ ਸੀਟ ਹਾਰ ਸਕਦੀ ਹੈ ਅਤੇ ਲੇਬਰ ਨੂੰ ਸੇਨੇਦ ਵਿਚ ਸਿਰਫ਼ ਕਰੀਬ 10 ਸੀਟਾਂ ਮਿਲਣ ਦੀ ਸੰਭਾਵਨਾ ਜਤਾਈ ਜਾ ਰਹੀ ਹੈ, ਜਦਕਿ ਪਹਿਲਾਂ ਪਾਰਟੀ ਕੋਲ 30 ਮੈਂਬਰ ਸਨ। ਵੇਲਜ਼ ਵਿਚ ਪਲੇਡ ਕਮਰੀ ਅਤੇ ਰਿਫਾਰਮ ਯੂ.ਕੇ. ਵਿਚ ਸਖ਼ਤ ਟੱਕਰ ਦੇਖਣ ਨੂੰ ਮਿਲ ਰਹੀ ਹੈ ਅਤੇ ਕਈ ਇਲਾਕਿਆਂ ਵਿਚ ਦੋਵਾਂ ਪਾਰਟੀਆਂ ਨੇ ਵੱਡੀ ਬੜਤ ਬਣਾਈ ਹੈ। ਉੱਥੇ ਸਕਾਟਲੈਂਡ ਵਿਚ SNP ਨੇ ਮਜ਼ਬੂਤ ਪ੍ਰਦਰਸ਼ਨ ਕੀਤਾ ਹੈ ਅਤੇ ਪਾਰਟੀ ਆਗੂ ਜੌਨ ਸਵਿਨੀ ਨੇ ਦਾਅਵਾ ਕੀਤਾ ਹੈ ਕਿ SNP ਮੁੜ ਸਭ ਤੋਂ ਵੱਡੀ ਪਾਰਟੀ ਬਣੇਗੀ ਅਤੇ ਪੰਜਵੀਂ ਵਾਰ ਸਰਕਾਰ ਬਣਾਉਣ ਵੱਲ ਵਧ ਰਹੀ ਹੈ। SNP ਦੇ ਵੈਸਟਮਿੰਸਟਰ ਆਗੂ ਸਟੀਫਨ ਫਲਿਨ ਵੀ ਆਪਣੀ ਸੀਟ ਜਿੱਤ ਗਏ ਹਨ, ਹਾਲਾਂਕਿ ਕੁਝ ਥਾਵਾਂ ’ਤੇ ਲੇਬਰ ਨੇ SNP ਤੋਂ ਸੀਟਾਂ ਵੀ ਖੋਹੀਆਂ ਹਨ। ਚੋਣ ਨਤੀਜਿਆਂ ਨੇ ਪ੍ਰਧਾਨ ਮੰਤਰੀ ਕੀਰ ਸਟਾਰਮਰ ਦੀ ਅਗਵਾਈ ’ਤੇ ਵੀ ਵੱਡੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ। ਲੇਬਰ ਦੇ ਕਈ ਸੰਸਦ ਮੈਂਬਰਾਂ ਨੇ ਮੀਡੀਆ ਨਾਲ ਗੱਲਬਾਤ ਦੌਰਾਨ ਕਿਹਾ ਕਿ ਲੋਕ ਲੇਬਰ ਨਾਲੋਂ ਵੱਧ ਸਟਾਰਮਰ ਨਾਲ ਨਾਰਾਜ਼ ਹਨ। ਕੁਝ ਲੇਬਰ ਸੰਸਦ ਮੈਂਬਰਾਂ ਨੇ ਤਾਂ ਇਹ ਤੱਕ ਕਿਹਾ ਕਿ “ਕੀਰ ਲਈ ਹੁਣ ਪਰਦਾ ਡਿੱਗਣ ਵਾਲਾ ਹੈ।” ਇਸਦੇ ਬਾਵਜੂਦ ਸਟਾਰਮਰ ਨੇ ਕਿਹਾ ਹੈ ਕਿ ਉਹ ਅਹੁਦਾ ਨਹੀਂ ਛੱਡਣਗੇ ਅਤੇ ਦੇਸ਼ ਨੂੰ ਅਸਥਿਰਤਾ ਵਿਚ ਨਹੀਂ ਧੱਕਣਗੇ। ਰਿਫਾਰਮ ਯੂ.ਕੇ. ਦੇ ਆਗੂ ਨਾਇਜਲ ਫਰਾਜ ਨੇ ਕਿਹਾ ਹੈ ਕਿ ਇਹ ਬਰਤਾਨੀਆ ਦੀ ਸਿਆਸਤ ਵਿਚ ਇਤਿਹਾਸਕ ਬਦਲਾਅ ਦੀ ਸ਼ੁਰੂਆਤ ਹੈ ਅਤੇ ਲੋਕ ਹੁਣ ਪੁਰਾਣੀਆਂ ਪਾਰਟੀਆਂ ਤੋਂ ਤੰਗ ਆ ਚੁੱਕੇ ਹਨ। ਚੋਣਾਂ ਵਿਚ ਗ੍ਰੀਨ ਪਾਰਟੀ ਅਤੇ ਲਿਬਰਲ ਡੈਮੋਕ੍ਰੈਟਸ ਨੇ ਵੀ ਕਈ ਇਲਾਕਿਆਂ ਵਿਚ ਆਪਣਾ ਪ੍ਰਭਾਵ ਵਧਾਇਆ ਹੈ। ਵਿਸ਼ਲੇਸ਼ਕਾਂ ਦਾ ਕਹਿਣਾ ਹੈ ਕਿ ਇਨ੍ਹਾਂ ਨਤੀਜਿਆਂ ਨੇ ਸਾਫ਼ ਕਰ ਦਿੱਤਾ ਹੈ ਕਿ ਬਰਤਾਨੀਆ ਦੀ ਰਵਾਇਤੀ ਦੋ-ਪਾਰਟੀ ਸਿਆਸਤ ਹੁਣ ਟੁੱਟ ਰਹੀ ਹੈ ਅਤੇ ਦੇਸ਼ ਵਿਚ ਬਹੁਪੱਖੀ ਸਿਆਸੀ ਪ੍ਰਣਾਲੀ ਹੋਰ ਮਜ਼ਬੂਤ ਹੋ ਰਹੀ ਹੈ। ਇਹ ਚੋਣ ਨਤੀਜੇ ਆਉਣ ਵਾਲੀ ਬਰਤਾਨਵੀ ਆਮ ਚੋਣ ਲਈ ਵੀ ਵੱਡਾ ਸੰਕੇਤ ਮੰਨੇ ਜਾ ਰਹੇ ਹਨ।
‘ਸਮਾਜਵੀਕਲੀ’ ਐਪਡਾਊਨਲੋਡਕਰਨਲਈਹੇਠਦਿਤਾਲਿੰਕਕਲਿੱਕਕਰੋ
https://play.google.com/store/apps/details?id=in.yourhost.samajweekly
