(ਸਮਾਜ ਵੀਕਲੀ)
ਠੱਗ ਬਹਿਰੂਪੀਏ ਚਾਰ ਚੁਫੇਰੇ
ਰੂਪ ਬਣਾਕੇ ਫਿਰਨ ਘਣੇਰੇ ,
ਆਉਂਦੀ ਨਹੀਂ ਪਛਾਣ ਕਿਸੇ ਦੀ
ਉਜਲੇ ਬਸਤਰ ਬੋਲ ਮਿਠੇਰੇ ।
ਧਰਮ ਕਰਮ ਦੀ ਆੜ ਸੁਨਹਿਰੀ
ਲੋਕਾਂ ਦੇ ਮਨ ਛਾਪ ਹੈ ਗਹਿਰੀ ,
ਲੋਕ-ਪਰਲੋਕ ਸੁਹੇਲਾ ਹੋ ਜਾਏ
ਜੀਵਨ ਚਾਹੇ ਬਣ ਜਾਏ ਜ਼ਹਿਰੀ ।
ਰਾਜਨੀਤੀ ਵਿੱਚ ਸਭ ਤੋਂ ਵੱਧ ਨੇ
ਇਹ ਬਹਿਰੂਪੀਏ ਅੱਧੋ ਅੱਧ ਨੇ ,
ਹੁਣ ਨਹੀਂ ਕੋਈ ਖਾਂਦਾ ਘਾਟਾ
ਹਿੱਸਾ ਲੈਂਦੇ ਪਹਿਲੋਂ ਈ ਕੱਢ ਨੇ ।
ਕਿਸ ਉੱਤੇ ਇਤਬਾਰ ਕਰੋਗੇ
ਜੀਵਨ ਹੀ ਦੁਸ਼ਵਾਰ ਕਰੋਗੇ ,
ਆਸਤੀਨ ਦਾ ਸੱਪ ਹੀ ਨਿੱਕਲੂ਼
ਜਿਸ ਨਾਲ਼ ਅੱਖਾਂ ਚਾਰ ਕਰੋਗੇ ।
ਸਮਾਜ ਸੇਵਾ ਦਾ ਨਵਾਂ ਹੀ ਫੰਡਾ
ਦਫ਼ਤਰ ਛੋਟ ਤੇ ਵੱਡਾ ਝੰਡਾ ,
ਲੱਭਣ ਅੰਨ੍ਹੇ ਗੱਠ ਦੇ ਪੂਰੇ
ਨਾਮ ਦਾਨ ਰੋਜ਼ੀ ਦਾ ਧੰਧਾ ।
ਖੇਤਰ ਸਿਹਤ ਦਾ ਬੜਾ ਨਿਰਾਲਾ
ਐਲੋ ਹੋਮੀਓ ਚਾਹੇ ਦੇਸੀ ਵਾਲ਼ਾ ,
ਸਾਰੇ ਮਿੱਠੀਆਂ ਪੁੜੀਆਂ ਵੰਡਣ
ਆਪਣੀ ਦੱਸਣ ਸਭ ਤੋਂ ਆਹਲਾ ।
ਸ਼ਿੰਦਾ ਬਾਈ
