(ਸਮਾਜ ਵੀਕਲੀ)
ਵਿਦੇਸ਼ਾਂ ਦੇ ਵਿੱਚ ਜੋ ਜਾ ਵੱਸਦੇ ਨੇ,
ਪ੍ਰੇਸ਼ਾਨੀ ਵਿੱਚ ਕਦੇ ਕਦਾਈਂ ਹੱਸਦੇ ਨੇ l
ਝੁਕ ਝੁਕ ਕੇ ਕੰਮ ਔਖਾ ਕਰਨਾ ਪੈਂਦਾ,
ਲੱਕ ਵਾਲੀ ਬੈਲਟ ਕਈ ਵਾਰੀ ਕੱਸਦੇ ਨੇ l
ਕਈ ਕੰਮ ਬੈਠ ਜ਼ਮੀਨ ਤੇ ਕਰਨੇ ਪੈਂਦੇ,
ਥੱਲੇ ਆਪਣੇ ਧਰਤੀ ਦੇ ਨਾਲ ਘੱਸਦੇ ਨੇ l
ਦਸ ਮਿੰਟ ਚਾਹ ਪੀਣ ਲਈ ਸਮਾਂ ਮਿਲੇ,
ਤੱਤੀ ਚਾਹ ਪੀ ਦੁਬਾਰਾ ਕੰਮ ਤੇ ਨੱਸਦੇ ਨੇ l
ਗੋਰਾ ਵਾਰ ਵਾਰ ਨਿਗ੍ਹਾ ਰੱਖੇ ਕੰਮ ਉੱਤੇ,
ਕਰਜ਼ੇ ਚੜ੍ਹੇ ਹੋਏ ਸਿਰੋਂ ਨਾ ਸੌਖੇ ਲੱਥਦੇ ਨੇ l
ਮਾਂ ਪਿਓ ਨਹੀਂ ਬਹੁਤਿਆਂ ਦੇ ਕੋਲ ਹੁੰਦੇ,
ਦੁੱਖੜੇ ਇਕੱਲੇ ਹੀ ਗਿਣ ਗਿਣ ਕੱਟਦੇ ਨੇ l
ਤਾਜ਼ੀ ਰੋਟੀ ਇਥੇ ਨਹੀਂ ਨਸੀਬ ਹੁੰਦੀ,
ਸੁਆਦ ਬੇਹੀਆਂ ਦੇ ਅਕਸਰ ਚੱਖਦੇ ਨੇ l
ਭੱਜ ਨੱਠ ਵਿੱਚ ਜਦੋਂ ਨਾ ਵਿਹਲ ਲੱਗੇ,
ਪੀਜ਼ੇ ਬਰਗਰ ਖਾ ਖਾਣੇ ਵਿੱਚ ਹੱਸਦੇ ਨੇ l
ਆਪਣਾ ਆਪਣਾ ਤਾਂ ਸਾਰੇ ਹੀ ਆਖਣ,
ਲੋੜ ਪੈਣ ਤੇ ਵਿਰਲੇ ਹੱਥ ਸਿਰ ਰੱਖਦੇ ਨੇ l
ਅਵਤਾਰ ਪੈਸਾ ਨਾ ਵਿਦੇਸ਼ੋਂ ਪਾ ਸਕਦੇ,
ਖੁਰਦਪੁਰੀਆ ਫੋਟੋਆਂ ਪਾ ਹੀ ਦੱਸਦੇ ਨੇ l
ਤਰਕਸ਼ੀਲਾ ਨੀਂਦ ਚੈਨ ਦੀ ਨਾ ਸੌਣ ਇਹ,
ਗੋਲੀਆਂ ਸੌਣ ਦੀਆਂ ਖਾ ਰਾਤਾਂ ਕੱਟਦੇ ਨੇ l
ਅਵਤਾਰ ਤਰਕਸ਼ੀਲ ਨਿਊਜ਼ੀਲੈਂਡ
ਜੱਦੀ ਪਿੰਡ ਖੁਰਦਪੁਰ (ਜਲੰਧਰ)
006421392147
