(ਸਮਾਜ ਵੀਕਲੀ)
ਹਿੰਦ ਦੇ ਤਖ਼ਤ ਉੱਤੇ ਬਹਿ ਕੇ ਹਿੰਦੂ ਪੰਡਿਤਾਂ ਨੂੰ,
ਫੜ-ਫੜ ਆਮ ਮਰਵਾਈ ਜਾਵੇ ਬਾਦਸ਼ਾਹ !
ਜ਼ਾਲਮ ਤੇ ਜਾਬਰ, ਮੁਤੱਸਬੀ, ਕਸਾਈ ਭੈੜਾ,
ਐਂਵੇ ਨਿਰਦੋਸ਼ਾਂ ਨੂੰ ਸਤਾਈ ਜਾਵੇ ਬਾਦਸ਼ਾਹ !
ਜਿਹੜਾ ਖੁਸ਼ੀ ਨਾਲ ਜੰਝੂ ਲਾਹ ਕੇ ਗਲੋਂ ਸੁੱਟ ਦੇਵੇ,
ਉਹਨੂੰ ਸਭਾ ਵਿੱਚ ਵਡਿਆਈ ਜਾਵੇ ਬਾਦਸ਼ਾਹ !
ਜਿਹੜਾ ਦੀਨ ਮੰਨਣ ਤੋਂ ਕਰ ਇਨਕਾਰ ਦੇਵੇ,
ਉਨ੍ਹਾਂ ਦਾ ਕਤਲ ਕਰਾਈ ਜਾਵੇ ਬਾਦਸ਼ਾਹ !
ਜ਼ੁਲਮ ਦਾ ਦੌਰ ਚੱਲ ਰਿਹਾ ਦਿੱਲੀ-ਢਿੱਲੀ ਵਿੱਚ,
ਪੰਡਿਤਾਂ ਦੇ ਗਲੋਂ ਜੰਝੂ ਲਾਹੀ ਜਾਵੇ ਬਾਦਸ਼ਾਹ !
ਸ਼ਰ੍ਹਾ ਤਲਵਾਰ ਰੱਖ ਪੰਡਿਤਾਂ ਦੀ ਧੌਣ ਉਤੇ,
ਲਾਹ-ਲਾਹ ਕੇ ਜੰਝੂ ਢੇਰ ਲਾਈ ਜਾਵੇ ਬਾਦਸ਼ਾਹ !
ਕਾਂਸ਼ੀ, ਕਸ਼ਮੀਰ, ਗੰਗਾ, ਗੁਦਾਵਰੀ, ਪਰਾਗ ਵਿੱਚ,
ਪਾਠ-ਪੂਜਾ ਕਰਨੋਂ ਹਟਾਈ ਜਾਵੇ ਬਾਦਸ਼ਾਹ !
ਦੇਵੀਆਂ ਦੇ ਮੰਦਰਾਂ ਨੂੰ ਢਾਹੀ ਜਾਵੇ ਬਾਦਸ਼ਾਹ !
ਉਨ੍ਹਾਂ ਉਤੇ ਮਸਜਿਦਾਂ ਬਣਾਈ ਜਾਵੇ ਬਾਦਸ਼ਾਹ !
ਜੱਗ ਉੱਤੇ ‘ਭੁੱਲੜਾ’ ਮਜ਼੍ਹਬ ਇੱਕ ਕਰ ਦੇਣਾ,
ਧਾਰ ਕੇ ਇਹ ਕਹਿਰ ਕਮਾਈ ਜਾਵੇ ਬਾਦਸ਼ਾਹ !
ਸੁਖਦੇਵ ਸਿੰਘ ਭੁੱਲੜ ਜ਼ੀਰਾ
9417046117
