ਮੰਤਰੀ ਨੇ ਐਮ.ਪੀ ਸੰਜੀਵ ਅਰੋੜਾ ਨੂੰ ਸਾਈਕਲ ਉਦਯੋਗ ਲਈ ਜੀ.ਐਸ.ਟੀ ‘ਤੇ ਮੁੜ ਵਿਚਾਰ ਕਰਨ ਦਾ ਦਿੱਤਾ ਭਰੋਸਾ

ਲੁਧਿਆਣਾ (ਸਮਾਜ ਵੀਕਲੀ) ( ਕਰਨੈਲ ਸਿੰਘ ਐੱਮ.ਏ.) ਸੰਸਦ ਮੈਂਬਰ (ਰਾਜ ਸਭਾ) ਸੰਜੀਵ ਅਰੋੜਾ ਦੇ ਪੱਤਰ ਦੇ ਜਵਾਬ ਵਿੱਚ, ਕੇਂਦਰੀ ਵਿੱਤ ਰਾਜ ਮੰਤਰੀ ਪੰਕਜ ਚੌਧਰੀ ਨੇ ਆਪਣੇ ਲਿਖਤੀ ਜਵਾਬ ਵਿੱਚ ਐਮ.ਪੀ. ਅਰੋੜਾ ਨੂੰ ਸੂਚਿਤ ਕੀਤਾ ਕਿ ਸਾਈਕਲਾਂ ਅਤੇ ਉਨ੍ਹਾਂ ਦੇ ਪੁਰਜ਼ਿਆਂ ‘ਤੇ ਜੀ.ਐਸ.ਟੀ. ਘਟਾਉਣ ਦੇ ਮੁੱਦੇ ‘ਤੇ ਜੀ.ਐਸ.ਟੀ. ਕੌਂਸਲ ਨੇ ਆਪਣੀਆਂ 31ਵੀਂ ਅਤੇ 37ਵੀਂ ਮੀਟਿੰਗਾਂ ਵਿੱਚ ਚਰਚਾ ਕੀਤੀ ਸੀ। ਮੰਤਰੀ ਨੇ ਐਮ.ਪੀ. ਅਰੋੜਾ ਨੂੰ ਇਹ ਵੀ ਭਰੋਸਾ ਦਿੱਤਾ ਕਿ ਸਾਈਕਲਾਂ ਅਤੇ ਉਨ੍ਹਾਂ ਦੇ ਪੁਰਜ਼ਿਆਂ ‘ਤੇ ਜੀ.ਐਸ.ਟੀ. ਦੇ ਨਾਲ-ਨਾਲ ਇਸ ਸੈਕਟਰ ਵਿੱਚ ਦਰਾਂ ਨੂੰ ਤਰਕਸੰਗਤ ਬਣਾਉਣ ‘ਤੇ ਜੀ.ਐਸ.ਟੀ.ਕੌਂਸਲ ਵੱਲੋਂ ਗਠਿਤ ਮੰਤਰੀ ਸਮੂਹ ਵੱਲੋਂ ਵਿਚਾਰ ਕੀਤਾ ਜਾ ਰਿਹਾ ਹੈ।  ਐਮ.ਪੀ. ਅਰੋੜਾ ਨੇ 29 ਨਵੰਬਰ, 2024 ਨੂੰ ਕੇਂਦਰੀ ਵਿੱਤ ਮੰਤਰੀ ਨੂੰ ਇੱਕ ਪੱਤਰ ਭੇਜਿਆ ਸੀ, ਜਿਸ ਵਿੱਚ ਸਾਈਕਲਾਂ ਅਤੇ ਪੁਰਜ਼ਿਆਂ ‘ਤੇ ਜੀ.ਐਸ.ਟੀ. ਨੂੰ 12% ਤੋਂ ਘਟਾ ਕੇ 5% ਕਰਨ ਦੇ ਨਾਲ ਆਈਟੀਸੀ ਲਾਭਾਂ ਬਾਰੇ ਦੱਸਿਆ ਗਿਆ ਸੀ। ਐਮ.ਪੀ. ਅਰੋੜਾ ਨੇ ਕਈ ਨੁਕਤਿਆਂ ‘ਤੇ ਚਾਨਣਾ ਪਾਇਆ, ਮੰਤਰੀ ਨੂੰ ਆਉਣ ਵਾਲੀ ਜੀ.ਐਸ.ਟੀ. ਕੌਂਸਲ ਦੀ ਮੀਟਿੰਗ ਵਿੱਚ ਇਨ੍ਹਾਂ ਸਿਫ਼ਾਰਸ਼ਾਂ ‘ਤੇ ਵਿਚਾਰ ਕਰਨ ਦੀ ਅਪੀਲ ਕੀਤੀ। ਪਹਿਲਾਂ, ਉਨ੍ਹਾਂ ਨੇ ਟੈਕਸ ਪ੍ਰਸ਼ਾਸਨ ਵਿੱਚ ਜਟਿਲਤਾਵਾਂ ਤੋਂ ਬਚਣ ਅਤੇ ਸਮਾਜਿਕ-ਵਾਤਾਵਰਣਕ ਲਾਭਾਂ ਨੂੰ ਵੱਧ ਤੋਂ ਵੱਧ ਕਰਨ ਲਈ, ਸਾਰੀਆਂ ਸਾਈਕਲਾਂ ਤੱਕ ਜੀ.ਐਸ.ਟੀ. ਕਟੌਤੀ ਦਾ ਲਾਭ ਵਧਾਉਣ ਅਤੇ ਸਾਰੀਆਂ ਸਾਈਕਲਾਂ ‘ਤੇ 5% ਜੀ.ਐਸ.ਟੀ. ਦਰ ਲਾਗੂ ਕਰਨ ਦੀ ਸਿਫਾਰਸ਼ ਕੀਤੀ, ਨਾ ਕਿ ਸਿਰਫ਼ 10,000 ਰੁਪਏ ਤੋਂ ਘੱਟ ਕੀਮਤ ਵਾਲੀਆਂ ਸਾਈਕਲਾਂ ‘ਤੇ। ਦੂਜਾ, ਉਨ੍ਹਾਂ ਨੇ ਨਿਰਮਾਤਾਵਾਂ ਲਈ ਇੱਕ ਇੰਵਰਟੇਡ ਡਿਊਟੀ ਸਟਰਕਚਰ ਅਤੇ ਵਧੀਆਂ ਲਾਗਤਾਂ ਨੂੰ ਰੋਕਣ ਲਈ ਸਾਈਕਲ ਦੇ ਪੁਰਜ਼ਿਆਂ ਨੂੰ 5% ਜੀ.ਐਸ.ਟੀ. ਬਰੈਕਟ ਵਿੱਚ ਸ਼ਾਮਲ ਕਰਨ ਦਾ ਸੁਝਾਅ ਦਿੱਤਾ। ਅੰਤ ਵਿੱਚ, ਉਨ੍ਹਾਂ ਨੇ 5% ਜੀ.ਐਸ.ਟੀ. ਦਰ ਦੇ ਨਾਲ ਆਈਟੀਸੀ ਲਾਭਾਂ ਨੂੰ ਯਕੀਨੀ ਬਣਾਉਣ ਦੀ ਮਹੱਤਤਾ ‘ਤੇ ਜ਼ੋਰ ਦਿੱਤਾ ਤਾਂ ਜੋ ਨਿਰਮਾਤਾ “ਮੇਕ ਇਨ ਇੰਡੀਆ” ਪਹਿਲਕਦਮੀ ਦਾ ਸਮਰਥਨ ਕਰਦੇ ਹੋਏ, ਖਪਤਕਾਰਾਂ ਨੂੰ ਪੂਰਾ ਲਾਭ ਦੇ ਸਕਣ। ਇਸ ਨਾਲ ਸਾਈਕਲ ਉਦਯੋਗ ਲਈ ਉਮੀਦ ਦੀ ਕਿਰਨ ਪੈਦਾ ਹੋਈ ਹੈ ਕਿਉਂਕਿ ਸਾਈਕਲ ਬਹੁਤ ਸਾਰੇ ਲੋਕਾਂ ਲਈ ਆਵਾਜਾਈ ਦਾ ਇੱਕ ਮਹੱਤਵਪੂਰਨ ਸਾਧਨ ਹੈ ਅਤੇ ਇਸ ਨਾਲ ਵਾਤਾਵਰਣ ਅਤੇ ਸਿਹਤ ਨੂੰ ਮਹੱਤਵਪੂਰਨ ਲਾਭ ਮਿਲਦੇ ਹਨ। ਐਮ.ਪੀ. ਅਰੋੜਾ ਨੇ ਕਿਹਾ, “ਸਾਈਕਲਾਂ ਅਤੇ ਪੁਰਜ਼ਿਆਂ ‘ਤੇ ਜੀ.ਐਸ.ਟੀ. ਘਟਾਉਣ ਨਾਲ ਉਹ ਵਧੇਰੇ ਕਿਫਾਇਤੀ ਹੋਣਗੇ, ਜੀ.ਐਸ.ਟੀ. ਚੋਰੀ ਨੂੰ ਰੋਕਿਆ ਜਾਵੇਗਾ ਅਤੇ “ਮੇਡ ਇਨ ਇੰਡੀਆ” ਸਾਈਕਲ ਉਦਯੋਗ ਦੇ ਵਿਕਾਸ ਨੂੰ ਮਦਦ ਮਿਲੇਗੀ।”

    ਸੰਸਦ ਮੈਂਬਰ ਅਰੋੜਾ ਨੇ 7 ਫਰਵਰੀ ਨੂੰ ਰਾਜ ਸਭਾ ਦੇ ਬਜਟ ਸੈਸ਼ਨ ਵਿੱਚ ਜ਼ੀਰੋ ਆਵਰ ਦੌਰਾਨ ਵੀ ਇਹ ਮੁੱਦਾ ਉਠਾਇਆ ਸੀ।

ਸਮਾਜ ਵੀਕਲੀ’ ਐਪ ਡਾਊਨਲੋਡ ਕਰਨ ਲਈ ਹੇਠ ਦਿਤਾ ਲਿੰਕ ਕਲਿੱਕ ਕਰੋ
https://play.google.com/store/apps/details?id=in.yourhost.samaj