(ਸਮਾਜ ਵੀਕਲੀ)
ਹਿੰਮਤ ਵਾਲ਼ੇ ਲੋਕ
ਸ਼ਕਲੋਂ ਸੂਰਤੋਂ ਬੰਦਾ ਨਾ ਹੋਵੇ ਸੋਹਣਾ ,
ਸੋਹਣੇ ਹੁੰਦੇ ਨੇ ਬੰਦੇ ਦੇ ਕੰਮ ਬਾਬਾ ।
ਮੁੱਲ ਗੁਣਾਂ ਦਾ ਵਿੱਚ ਸੰਸਾਰ ਪੈਂਦਾ ,
ਚਿੱਟਾ ਵੇਖਦਾ ਕੋਈ ਨਾ ਚੰਮ ਬਾਬਾ ।
ਉਨ੍ਹਾਂ ਦੱਸ ਕੀ ਮੰਜ਼ਿਲਾਂ ਪਾਉਣੀਆਂ ਨੇ,
ਸੁੱਤੇ ਰਹਿਣ ਜੋ ਮੰਨੀਆਂ ਝੰਮ ਬਾਬਾ ।
ਸੱਚ ਕਿਹਾ ਸਿਆਣਿਆਂ ਬੰਦਿਆਂ ਨੇ ,
ਦਿੰਦੇ ਹਿੰਮਤੀ ਨ੍ਹੇਰੀਆਂ ਥੰਮ੍ਹ ਬਾਬਾ ।
ਬੰਦਾ ਅਤੇ ਬੰਦਗੀ
——————–
ਰੰਗ ਰੂਪ ਨਾਲ਼ ਕੋਈ ਨਾ ਫ਼ਰਕ ਪੈਂਦਾ ,
ਭਾਵੇਂ ਹੋਵੇ ਕਾਲ਼ਾ ਤੇ ਭਾਵੇਂ ਹੋਵੇ ਭੂਰਾ ।
ਨਾਓਂ ਨਾਲ਼ ਨੀਂ ਕੋਈ ਵੀ ਫ਼ਰਕ ਪੈਂਦਾ ,
ਭਾਵੇਂ ਹੋਵੇ ਨੂਰੀ ਤੇ ਭਾਵੇਂ ਹੋਵੇ ਨੂਰਾ ।
ਪਿੰਡ ਸ਼ਹਿਰ ਨਾ ਕੋਈ ਨੀਂ ਫ਼ਰਕ ਪੈਂਦਾ,
ਭਾਵੇਂ ਹੋਵੇ ਧੂਰੀ ਤੇ ਭਾਵੇਂ ਹੋਵੇ ਧੂਰਾ ।
ਸੱਚ ਕਿਹਾ ਸਿਆਣਿਆਂ ਬੰਦਿਆਂ ਨੇ ,
ਬੰਦਾ ਓਹੀ ਜੋ ਬੰਦਗੀ ਦਾ ਹੋਵੇ ਪੂਰਾ ।
ਦਾਤੇ ਭਗਤ ਤੇ ਸੂਰਮੇ
———————-
ਬਹੁਤੇ ਯਾਰ ਕੀ ਫੋੜੇ ‘ਤੇ ਰਗੜ ਲਾਉਂਣੇ ,
ਯਾਰ ਓਹੀ ਜੋ ਬੰਦੇ ਦੇ ਕੰਮ ਆਉਂਦੇ ।
ਰੋਂਦੇ ਚਿਹਰਿਆਂ ਨੂੰ ਕੋਈ ਨਾ ਮੂੰਹ ਲਾਵੇ ,
ਮਿਲਣ ਉਨ੍ਹਾਂ ਨੂੰ ਰਹਿਣ ਜੋ ਮੁਸਕਰਾਉਂਦੇ ।
ਅਪਣੇ ਲੋਕਾਂ ਲਈ ਜਿਹੜੇ ਕੁੱਝ ਕਰ ਜਾਂਦੇ ,
ਲੋਕੀਂ ਮਗਰੋਂ ਵੀ ਉਨ੍ਹਾਂ ਦੇ ਗੀਤ ਗਾਉਂਦੇ ।
ਸੱਚ ਕਿਹਾ ਸਿਆਣਿਆਂ ਬੰਦਿਆਂ ਨੇ ,
ਦਾਤਾ ਭਗਤ ਤੇ ਸੂਰਮੇ ਸਦਾ ਜਿਉਂਦੇ ।
( ਕਾਵਿ ਸੰਗ੍ਰਹਿ ” ਪੱਥਰ ‘ਤੇ ਲਕੀਰਾਂ ” ਵਿੱਚੋਂ )
ਮੂਲ ਚੰਦ ਸ਼ਰਮਾ ਪ੍ਰਧਾਨ ,
ਪੰਜਾਬੀ ਸਾਹਿਤ ਸਭਾ ਧੂਰੀ ਜਿਲ੍ਹਾ ਸੰਗਰੂਰ ।
9914836037
