(ਸਮਾਜ ਵੀਕਲੀ)
ਪ੍ਰਸ਼ਨ ਬਨਾਮ ਉੱਤਰ
ਐਨਾ ਆਸਾਨ ਨਹੀਂ
ਤੇਰੀ ਪੁੱਛ ਦਾ ਸਹੀ ਸਹੀ ਉੱਤਰ ਦੇਣਾ
ਅਲਜਬਰੇ ਦੇ’ ਨਿਰੂਪਣ ‘ਤਰੀਕੇ ਵਾਂਗ l
ਇਹ ਪ੍ਰਸ਼ਨ ਹੈ ਦਿਲਾਂ ਦੀ ਸਾਂਝ ਦਾ
ਦਿਲ ਦੇ ਦਰਦ ਦੇ ਇਲਹਾਮ ਦਾ
ਲੁਕਾਈ ਵੱਲੋਂ ਸਨਮਾਨ ਨੇ ਇਲਜ਼ਾਮ ਦਾ
ਸਾਹਾਂ ਚ ਘੁਲੇ ਸਾਹਾਂ ਦੀ ਮਹਿਕ ਦਾ
ਸਾਂਝੇ ਦਿਲਾਂ ਦੀ ਧੜਕਣ ਦਾ
ਪਾਕ -ਪਵਿੱਤਰ ਪਾਣੀ ਵਰਗੀਆਂ ਮਹੀਨ ਭਾਵਨਾਵਾਂ ਦਾl
ਮੈਂ ਕਿੰਝ ਕਹਾਂ?
ਮੈਂ ਕਿੰਝ ਇਨਕਾਰ ਕਰਾਂ?
ਮੈਂ ਤੇਰੇ ਸਾਹਾਂ ਦੀ ਕਸਤੂਰੀ ਨਹੀਂ ਸੀ ਮੰਗੀ l
ਮੈਂ ਤਾਂ ਮੰਗਿਆ ਸੀ –
ਤੇਰੀ ਸੱਚੀ ਸੁੱਚੀ ਸੋਚ ਦਾ ਸਾਥ
ਜੋ ਤੂੰ ਦੇਣੋ ਇਨਕਾਰੀ ਏਂ
ਮਜ਼ਹਬਾਂ ਦੀਆਂ ਬਣੀਆਂ ਲਕੀਰਾਂ ਕਰਕੇ l
ਮੇਰੇ ਤਪਦੇ -ਠਰਦੇ ਮਾਰੂਥਲ ਵਰਗੇ ਸੋਚਾਂ ਦੇ ਜਿਸਮ ਨੂੰ
ਹਿਮਾਲਾ ‘ਤੇ ਪਰਬਤ ਜੰਮੀਆਂ
ਸਿੱਲੀਆਂ ਤੇ ਠਰੀਆਂ ਬਰਫਾਂ ਵਰਗੀ ਸੋਚ ਦੀ ਲੋੜ ਨਹੀਂ l
ਇਸ ਲਈ-
ਤੈਨੂੰ ਅਲਵਿਦਾ ਕਹਿਣ ਤੋਂ ਪਹਿਲਾਂ
ਮੈਨੂੰ ਕੁਝ ਪਲ ਤਾਂ ਦੇ -ਦੇ
ਤੇਰੀ ਪੁੱਛ ਦਾ ਸਹੀ -ਸਹੀ ਜਵਾਬ ਦੇਣ ਲਈ l
ਸੰਧੂ ਵਰਿਆਣਵੀ
