ਕਪੂਰਥਲਾ (ਸਮਾਜ ਵੀਕਲੀ) (ਕੌੜਾ)- ਪਿਛਲੇ ਲੰਬੇ ਸਮੇਂ ਤੋਂ ਖਾਲੀ ਪਏ ਸਿੱਖਿਆ ਬਲਾਕ ਸੁਲਤਾਨਪੁਰ ਲੋਧੀ – 1 ਦਫਤਰ ਵਿਖੇ ਬੀ ਪੀ ਈ ਓ ਦੇ ਆਹੁਦੇ ਦਾ ਚਾਰਜ ਅੱਜ ਨਵ ਨਿਯੁਕਤ ਬਲਾਕ ਸਿੱਖਿਆ ਅਫਸਰ ਮਨਜਿੰਦਰ ਸਿੰਘ ਨੇ ਸੰਭਾਲ ਲਿਆ। ਸੈਂਟਰ ਹੈੱਡ ਟੀਚਰ ਤੋਂ ਪਦ ਉਨੱਤ ਹੋ ਕੇ ਬਲਾਕ ਸਿੱਖਿਆ ਅਫਸਰ ਬਣੇ ਮਨਜਿੰਦਰ ਸਿੰਘ ਜੋ ਪੱਟੀ ਤਰਨਤਾਰਨ ਜ਼ਿਲ੍ਹੇ ਨਾਲ ਸਬੰਧਤ ਦੱਸੇ ਜਾਂਦੇ ਹਨ ਵੱਲੋਂ ਆਪਣਾ ਆਹੁਦਾ ਸੰਭਾਲਣ ਤੋਂ ਪਹਿਲਾਂ ਸਾਬਕਾ ਬਲਾਕ ਸਿੱਖਿਆ ਅਫਸਰ ਮੈਡਮ ਸਰਬਜੀਤ ਕੌਰ ਪੰਛੀ, ਸੈਂਟਰ ਹੈਡ ਟੀਚਰ ਰਵੀ ਵਾਹੀ, ਸਾਬਕਾ ਸੈਂਟਰ ਹੈਡ ਟੀਚਰ ਸੁਰਿੰਦਰਜੀਤ ਸਿੰਘ ਜੱਬੋਵਾਲ, ਹੈੱਡ ਟੀਚਰ ਰਜਿੰਦਰ ਸਿੰਘ ਭੌਰ, ਮੇਜਰ ਸਿੰਘ ਅਤੇ ਬਨਵਾਰੀ ਲਾਲ ਆਦਿ ਦਫਤਰੀ ਅਮਲੇ ਵੱਲੋਂ ਓਹਨਾ ਨੂੰ ਫੁੱਲਾਂ ਦੇ ਗੁਲਦਸਤੇ ਭੇਂਟ ਕਰਕੇ ਉਨ੍ਹਾਂ ਦਾ ਸਵਾਗਤ ਕੀਤਾ ਗਿਆ। ਨਵ ਨਿਯੁਕਤ ਬਲਾਕ ਸਿੱਖਿਆ ਅਫਸਰ ਮਨਜਿੰਦਰ ਸਿੰਘ ਨੇ ਹਾਜ਼ਰੀਨ ਦਾ ਧੰਨਵਾਦ ਕੀਤਾ ਅਤੇ ਸਿੱਖਿਆ ਵਿਭਾਗ ਪੰਜਾਬ ਵਲੋਂ ਸਕੂਲਾਂ ਵਿਚ ਪੜ੍ਹਦੇ ਵਿਦਿਆਰਥੀਆਂ ਦੇ ਸਿੱਖਿਆ ਪੱਧਰ ਨੂੰ ਉੱਚਾ ਚੁੱਕਣ ਲਈ ਜਾਰੀ ਹੁਕਮਾਂ ਅਨੁਸਾਰ ਕੰਮ ਕਰਨ ਦਾ ਭਰੋਸਾ ਦਵਾਇਆ।
ਜ਼ਿਕਰਯੋਗ ਹੈ ਕਿ ਸਿੱਖਿਆ ਬਲਾਕ ਮਸੀਤਾਂ ਅਤੇ ਸਿੱਖਿਆ ਬਲਾਕ ਸੁਲਤਾਨਪੁਰ ਲੋਧੀ – 1 ਦੇ ਦਫਤਰ ਪਿਛਲੇ ਲੰਬੇ ਸਮੇਂ ਤੋਂ ਖਾਲੀ ਪਏ ਸਨ ਅਤੇ ਦਫਤਰਾਂ ਦਾ ਕੰਮ ਚਲਦਾ ਰੱਖਣ ਲਈ , ਵਾਧੂ ਚਾਰਜ ਬਲਾਕ ਸਿੱਖਿਆ ਅਫਸਰ ਫਗਵਾੜਾ ਮੈਡਮ ਹਰਜਿੰਦਰ ਨੂੰ ਸੌਪਿਆ ਹੋਇਆ ਸੀ, ਅਤੇ ਸਿੱਖਿਆ ਬਲਾਕ ਮਸੀਤਾਂ ਵਿਖੇ ਅਜੇ ਵੀ ਬਲਾਕ ਸਿੱਖਿਆ ਅਫਸਰ ਦਾ ਆਹੁਦਾ ਨਵੇਂ ਬਲਾਕ ਸਿੱਖਿਆ ਅਫਸਰ ਦੀ ਉਡੀਕ ਕਰ ਰਿਹਾ ਹੈ।
‘ਸਮਾਜ ਵੀਕਲੀ’ ਐਪ ਡਾਊਨਲੋਡ ਕਰਨ ਲਈ ਹੇਠ ਦਿਤਾ ਲਿੰਕ ਕਲਿੱਕ ਕਰੋ
https://play.google.com/store/apps/details?id=in.yourhost.samajweekly
