ਲੰਡਨ (ਸਮਾਜ ਵੀਕਲੀ): ਆਕਸਫੋਰਡ ਯੂਨੀਵਰਸਿਟੀ ਦੇ ਵਿਗਿਆਨੀਆਂ ਵੱਲੋਂ ਤਿਆਰ ਅਤੇ ਐਸਟਰਾਜ਼ੈਨੇਕਾ ਵੱਲੋਂ ਬਣਾਈ ਗਈ ਕਰੋਨਾਵਾਇਰਸ ਵੈਕਸੀਨ ਨੂੰ ਬਰਤਾਨੀਆ ਦੇ ਆਜ਼ਾਦ ਰੈਗੂਲੇਟਰ ਨੇ ਅੱਜ ਮਨੁੱਖੀ ਵਰਤੋਂ ਦੀ ਪ੍ਰਵਾਨਗੀ ਦੇ ਦਿੱਤੀ ਹੈ। ਮੈਡੀਸਿਨਜ਼ ਐਂਡ ਹੈਲਥਕੇਅਰ ਪ੍ਰੋਡਕਟਸ ਰੈਗੂਲੇਟਰੀ ਏਜੰਸੀ ਵੱਲੋਂ ਪ੍ਰਵਾਨਗੀ ਦਾ ਮਤਲਬ ਹੈ ਕਿ ਵੈਕਸੀਨ ਸੁਰੱਖਿਅਤ ਅਤੇ ਅਸਰਦਾਰ ਹੈ।
ਬਰਤਾਨੀਆ ਦੀ ਕੌਮੀ ਸਿਹਤ ਸੇਵਾ ਨੇ ਮੁਲਕ ’ਚ ਕਰੋਨਾਵਾਇਰਸ ਦੇ ਟੀਕੇ ਲਗਾਉਣ ਲਈ ਪਹਿਲਾਂ ਹੀ ਹਜ਼ਾਰਾਂ ਡਾਕਟਰਾਂ ਅਤੇ ਵਾਲੰਟੀਅਰਾਂ ਨੂੰ ਤਿਆਰ ਕਰ ਲਿਆ ਹੈ। ਬ੍ਰਿਟੇਨ ਨੇ 10 ਕਰੋੜ ਖੁਰਾਕਾਂ ਦਾ ਆਰਡਰ ਦਿੱਤਾ ਹੈ ਜਿਸ ’ਚੋਂ 4 ਕਰੋੜ ਟੀਕੇ ਮਾਰਚ ਦੇ ਅਖੀਰ ਤੱਕ ਉਪਲੱਬਧ ਹੋਣਗੇ। ਐਸਟਰਾਜ਼ੈਨੇਕਾ ਦੇ ਮੁਖੀ ਪਾਸਕਲ ਸੋਰਿਓਟ ਨੇ ਕਿਹਾ ਕਿ ਇਹ ਕਰੋਨਾਵਾਇਰਸ ਦੇ ਨਵੇਂ ਰੂਪ ਖ਼ਿਲਾਫ਼ ਵੀ ਅਸਰਦਾਰ ਹੋਣੀ ਚਾਹੀਦੀ ਹੈ।
