(ਸਮਾਜ ਵੀਕਲੀ)
ਆਮਦ ‘ਤੇ ਤੇਲ ਚੋਣਾਂ;ਹੈ ਦਸਤੂਰ ਭਾਵੇਂ ਤੇਰਾ,
ਡੁੱਬਦੇ ਨੂੰ ਵੀ ਹੁੰਦਾ ਏ,ਝੁਕ ਕੇ ਸਲਾਮ ਮੇਰਾ।
ਭਾਵੇਂ ਆ ਰਿਹੈ ਕਲੰਡਰ,ਲੈ ਉਮੀਦਾਂ ਦੀ ਪੋਟਲੀ ਫਿਰ,
ਰੁਖਸਤ ਹੋ ਰਿਹਾ ਵੀ,ਨਿਭਿਐ;ਮੇਰੇ ਨਾਲ਼ ਹੈ ਬਥੇਰਾ।
ਪੰਨਿਆਂ ਦਾ ਪਰਤ ਜਾਣਾ,ਵੀ ਹੁੰਦੀ ਸਮੇਂ ਦੀ ਨਜ਼ਾਕਤ,
ਕੁਝ ਯਾਦਾਂ ਭੈੜੀਆਂ ਵੀ,ਪਾ ਲੈਂਦੀਆਂ ਨੇ ਡੇਰਾ।
ਦਿੱਤਾ ਸੀ ਹੱਕ ਜਿਸਨੂੰ;ਆਪਣੇ ਅੰਦਰ ਝਾਕਣੇ ਦਾ,
ਉਹ ਵੀ ਘੱਤ ਸਕਿਐ,ਚੁਫੇਰੇ ਹੀ,ਮੇਰੇ,ਘੇਰਾ ।
ਹੁੰਦੇ ਨੇ ਸਿੱਕੇ ਦੇ ਵੀ;ਪਹਿਲੂ ਹਮੇਸ਼ਾਂ ਦੋ ਹੀ,
ਰੁੱਖਾ ਵੀ ਹੁੰਦੈ ਕੋਮਲ;ਥੋੜ੍ਹਾ ਰੱਖਣਾ ਹੈ ਪੈਂਦਾ ਜੇਰਾ।
ਕਰਨੀ ਦੀਪਮਾਲ਼ਾ ਵੀ ਤਾਂ;ਹੈ ਭੁਲੇਖਾ ਹੀ ਖੁਦ ਨੂੰ ਪਾਉਣਾ,
ਬਿਨ ਆਤਿਸ਼ ਅੰਦਰਲੀ ਤੋਂ,ਮਿਟਦਾ ਨਹੀਂ ਹਨੇਰਾ।
ਆਮਦ ‘ਤੇ ਤੇਲ ਚੋਣਾਂ;ਹੈ ਦਸਤੂਰ ਭਾਵੇਂ ਤੇਰਾ,
ਡੁੱਬਦੇ ਨੂੰ ਵੀ ਹੁੰਦਾ ਏ,ਝੁਕ ਕੇ ਸਲਾਮ ਮੇਰਾ।
ਬਲਦੇਵ ਕ੍ਰਿਸ਼ਨ ਸ਼ਰਮਾ