ਕਿੱਥੇ ਆ ?
ਮੇਰਾ ਸੁਪਨਾ ਮੇਰੀ ਕਹਾਣੀ ਕਿੱਥੇ ਆ ?
ਇੱਕ ਸੀ ਰਾਜਾ ਇੱਕ ਸੀ ਰਾਣੀ ਕਿੱਥੇ ਆ ?
ਮੈਂ ਤਾਂ ਇਥੇ ਸਭ ਸੁਲਝਾਉਣਾ ਚਾਹੁੰਦਾ ਸੀ,
ਕੌਣ ਉਲਝਾ ਗਿਆ ਤਾਣੀ, ਪ੍ਰਾਣੀਂ ਕਿੱਥੇ ਆ ?
ਭਾਵੇਂ ਏ.ਸੀ. ਠੰਡੀਆਂ ‘ਵਾਵਾਂ ਦੇਂਦੇ ਨੇ,
ਪਰ ਬੋਹੜਾਂ ਦੀ ਓਹ ਛਾਂ ਮਾਣੀ ਕਿੱਥੇ ਆ ?
ਨਵੀਆਂ-ਨਵੀਆਂ ਗੱਲਾਂ ਵਿੱਚ ਉਲਝਾਓ ਨਾ,
ਬਾਬੇ ਦੀ ਓਹ ਗੱਲ ਪੁਰਾਣੀ ਕਿੱਥੇ ਆ ?
ਹੁਣ ਤਾਂ ਘੱਟਾ ਮੇਰੇ ਨੇੜੇ ਢੁੱਕਦਾ ਨਹੀਂ,
ਥਾਂ-ਥਾਂ ਜਿਹੜੀ ਮਿੱਟੀ ਛਾਣੀ ਕਿੱਥੇ ਆ ?
ਫਿਲਟਰ ਵਾਲਾ ਵਾਟਰ ਪੀ ਪੀ ਅੱਕ ਗੲੇ ਆਂ
ਖੂਹਾਂ, ਬੰਬੀਆਂ ਵਾਲਾ ਪਾਣੀ ਕਿੱਥੇ ਆ ?
ਨਵੀਆਂ ਸਾਂਝਾ, ਨਵੀਆਂ ਯਾਰੀਆਂ ਵੀ ਨੇ ਪਰ,
ਬਚਪਨ ਵਾਲੇ “ਮੀਤ” ਓਹ ਹਾਣੀ ਕਿੱਥੇ ਆ ?
– ਮਲਕੀਤ ਮੀਤ
