ਗੁਰੂ ਨਾਨਕ ਸਟੇਡੀਅਮ ਵਿੱਚ ਚੱਲ ਰਹੀ ਇੰਡੀਅਨ ਵਿਮੈਨ ਫੁਟਬਾਲ ਲੀਗ ਦੇ ਮੁਕਾਬਲਿਆਂ ’ਚ ਅੱਜ ਦੋ ਮੈਚ ਖੇਡੇ ਗਏ। ਪਹਿਲੇ ਮੈਚ ਵਿੱਚ ਹਾਂਸ ਵਿਮੈਨ ਫੁਟਬਾਲ ਕਲੱਬ ਨੇ ਰਾਈਜ਼ਿੰਗ ਸਟੂਡੈਂਟ ਕਲੱਬ ਨੂੰ 2-1 ਗੋਲਾਂ ਨਾਲ ਮਾਤ ਦਿੱਤੀ। ਦੂਜੇ ਮੈਚ ਵਿੱਚ ਗੋਕੁਲਮ ਕੇਰਲਾ ਨੇ ਪੰਜਮ ਫੁਟਬਾਲਰਜ਼ ਨੂੰ 2-0 ਗੋਲਾਂ ਨਾਲ ਹਾਰਇਆ। ਸਵੇਰੇ ਖੇਡੇ ਗਏ ਪਹਿਲੇ ਮੈਚ ਵਿੱਚ ਹਾਂਸ ਵਿਮੈਨ ਫੁਟਬਾਲ ਕਲੱਬ ਅਤੇ ਰਾਈਜ਼ਿੰਗ ਸਟੂਡੈਂਟ ਕਲੱਬ ਦਾ ਸੰਘਰਸ਼ਪੂਰਨ ਮੁਕਾਬਲਾ ਹੋਇਆ। ਮੈਚ ਦਾ ਪਹਿਲਾ ਅੱਧ ਬਿਨਾਂ ਕਿਸੇ ਗੋਲ ਦੇ ਖ਼ਤਮ ਹੋਇਆ। ਦੂਜੇ ਅੱਧ ਵਿੱਚ ਹਾਂਸ ਟੀਮ ਵੱਲੋਂ ਅਨੁਸ਼ਕਾ ਨੇ 67ਵੇਂ ਅਤੇ ਉਚੇਨਾ ਰੀਟਾ ਨੇ 48ਵੇਂ ਮਿੰਟ ’ਚ ਇੱਕ-ਇੱਕ ਗੋਲ ਕਰਕੇ ਆਪਣੀ ਟੀਮ ਨੂੰ ਦੋ ਗੋਲਾਂ ਨਾਲ ਅੱਗੇ ਕਰ ਦਿੱਤਾ। ਰਾਈਜ਼ਿੰਗ ਟੀਮ ਵੱਲੋਂ ਅਸ਼ਰਿਤਾ ਕੰਗਾੜੀ ਨੇ 90ਵੇਂ ਮਿੰਟ ’ਚ ਇੱਕ ਗੋਲ ਕਰਕੇ ਇਸ ਲੀਡ ਨੂੰ ਘੱਟ ਤਾਂ ਕੀਤਾ ਪਰ ਆਪਣੀ ਟੀਮ ਨੂੰ ਜੇਤੂ ਬਣਾਉਣ ’ਚ ਸਫਲ ਨਹੀਂ ਹੋਈ। ਦੁਪਹਿਰ ਬਾਅਦ ਦੂਜਾ ਮੈਚ ਪੰਜਮ ਫੁੱਟਬਾਲਰਜ਼ ਅਤੇ ਗੋਕੁਲਮ ਕੇਰਲਾ ਦੀਆਂ ਟੀਮਾਂ ਵਿਚਕਾਰ ਖੇਡਿਆ ਗਿਆ। ਇਸ ਮੈਚ ਵਿੱਚ ਗੋਕੁਲਮ ਦੀ ਟੀਮ 2-0 ਗੋਲਾਂ ਨਾਲ ਜੇਤੂ ਰਹੀ। ਜੇਤੂ ਟੀਮ ਵੱਲੋਂ ਪਹਿਲਾ ਗੋਲ ਕਪਤਾਨ ਸੰਜੂ ਨੇ ਮੈਚ ਦੇ 20ਵੇਂ ਮਿੰਟ ’ਚ ਕੀਤਾ ਜਦਕਿ ਦੂਜਾ ਗੋਲ ਅੰਜੂ ਤਾਮੰਗ ਨੇ 79ਵੇਂ ਮਿੰਟ ’ਚ ਦਾਗ਼ਿਆ। ਗੋਕੁਲਮ ਨੇ ਇੱਕ ਗੋਲ ਪਹਿਲੇ ਅਤੇ ਇੱਕ ਗੋਲ ਦੂਜੇ ਅੱਧ ਵਿੱਚ ਕੀਤਾ।
