ਵਿਕਟ ਪੈਰੇਜ਼ ਦੇ ਆਖ਼ਰੀ ਪਲਾਂ ਵਿੱਚ ਪੈਨਲਟੀ ’ਤੇ ਦਾਗ਼ੇ ਗੋਲ ਦੀ ਬਦੌਲਤ ਈਸਟ ਬੰਗਾਲ ਨੇ ਆਈ-ਲੀਗ ਫੁਟਬਾਲ ਟੂਰਨਾਮੈਂਟ ਦੇ ਮੁਕਾਬਲੇ ਵਿੱਚ ਅੱਜ ਇੱਥੇ ਮੇਜ਼ਬਾਨ ਰਿਆਲ ਕਸ਼ਮੀਰ ਨੂੰ 1-0 ਨਾਲ ਹਰਾ ਕੇ ਤਿੰਨ ਅੰਕ ਹਾਸਲ ਕਰ ਲਏ।
ਮੈਚ ਦੌਰਾਨ ਦੋਵੇਂ ਟੀਮਾਂ ਦੇ ਖਿਡਾਰੀਆਂ ਨੇ ਇੱਕ-ਦੂਜੇ ਖ਼ਿਲਾਫ਼ ਹਮਲਾਵਰ ਰੁਖ਼ ਅਪਣਾਇਆ, ਜਿਸ ਕਾਰਨ ਰਿਆਲ ਕਸ਼ਮੀਰ ਦੇ ਦੋ ਖਿਡਾਰੀਆਂ ਅਤੇ ਈਸਟ ਬੰਗਾਲ ਦੇ ਇੱਕ ਖਿਡਾਰੀ ਨੂੰ ਲਾਲ ਕਾਰਡ ਦਿਖਾਇਆ ਗਿਆ। ਪੈਰੇਜ਼ ਨੇ 90 ਮਿੰਟ ਦੀ ਖੇਡ ਮਗਰੋਂ ਜੋੜੇ ਗਏ ਵਾਧੂ ਸਮੇਂ ਦੇ ਪੰਜਵੇਂ ਮਿੰਟ ਵਿੱਚ ਪੈਨਲਟੀ ਨੂੰ ਗੋਲ ਵਿੱਚ ਬਦਲ ਕੇ ਟੀਮ ਨੂੰ ਜਿੱਤ ਦਿਵਾਈ। ਰਿਆਲ ਕਸ਼ਮੀਰ ਨੇ ਮੈਚ ਮਗਰੋਂ ਰੈਫਰੀ ’ਤੇ ਪੱਖਪਾਤੀ ਰਵੱਈਆ ਅਪਣਾਉਣ ਦਾ ਦੋਸ਼ ਲਾਉਂਦਿਆਂ ਆਲ ਇੰਡੀਆ ਫੁਟਬਾਲ ਫੈਡਰੇਸ਼ਨ (ਏਆਈਐੱਫਐੱਫ) ਨੂੰ ਇਸ ਦੀ ਸ਼ਿਕਾਇਤ ਕੀਤੀ ਹੈ। ਇਸ ਜਿੱਤ ਮਗਰੋਂ ਈਸਟ ਬੰਗਾਲ ਦੇ 16 ਮੈਚਾਂ ਵਿੱਚ 23 ਅੰਕ ਹੋ ਗਏ ਅਤੇ ਟੀਮ ਸੂਚੀ ਵਿੱਚ ਦੂਜੇ ਸਥਾਨ ’ਤੇ ਪਹੁੰਚ ਗਈ। ਰਿਆਲ ਕਸ਼ਮੀਰ 15 ਮੈਚਾਂ ਵਿੱਚ 22 ਅੰਕ ਲੈ ਕੇ ਚੌਥੇ ਨੰਬਰ ’ਤੇ ਹੈ।
