(ਸਮਾਜ ਵੀਕਲੀ)
ਚਾਰੇ ਪਾਸੇ ਅੰਨਦਾਤੇ ਦੀਆਂ ,
ਗੱਲਾਂ ਹੋਵਣ ਲੱਗੀਆਂ ਨੇ ।
ਤਿੰਨ ‘ਤੇ ਸੱਤਰ ਸਾਲਾਂ ਦੇ ਵਿੱਚ ,
ਕਿਵੇਂ ਮਾਰੀਆਂ ਠੱਗੀਆਂ ਨੇ ।
ਆਖ਼ਰ ਇੱਕ ਦਿਨ ਸਬਰ ਪਿਆਲਾ,
ਉੱਛਲਣਾ ਸੀ ਉੱਛਲ ਗਿਆ ;
ਕੱਖ ਕੰਡਾ ਸਭ ਉਡ ਪੁਡ ਜਾਂਦਾ ,
ਜਦੋਂ ਹਨੇਰੀਆਂ ਵੱਗੀਆਂ ਨੇ ।
2.
ਦੋ ਚਾਰ ਬੰਦੇ ਜਿੱਥੇ ਵੀ ,
ਜੁੜ ਜਾਂਦੇ ਨੇ ।
ਭਾਜਪਾ ਵਾਲ਼ੇ ਗੱਲਾਂ ਸੁਣ ਸੁਣ,
ਕੁੜ੍ ਜਾਂਦੇ ਨੇ ।
ਅੰਨਦਾਤੇ ਇਸ ਵਾਰ ਭੁਲੇਖਾ ,
ਦੂਰ ਕਰਨਗੇ ;
ਕਿ ਰੌਲ਼ਾ ਪਾ ਕੇ ਅਪਣੇ ਘਰ ਨੂੰ,
ਮੁੜ ਜਾਂਦੇ ਨੇ ।
3.
ਘੋਲ਼ ‘ ਚ ਅੰਨਦਾਤੇ ਦੀ ਗਿਣਤੀ ,
ਗਿਣੀ ਨਹੀਂ ਜਾਂਦੀ ।
ਲੋਕ ਏਕਤਾ ਵਾਲ਼ੀ ਸ਼ਕਤੀ ਵੀ ,
ਮਿਣੀ ਨਹੀਂ ਜਾਂਦੀ ।
ਰੁਲਦੂ ਸਿੰਘਾ ਚੰਗੀ ਤਰਾਂ ਨਿਸ਼ਾ ,
ਕਰਨੀ ਪਊਗੀ ਹੁਣ ;
ਵਾਰ ਵਾਰ ਇੰਜ ਇੱਟ ਉੱਤੇ ਇੱਟ,
ਚਿਣੀ ਨਹੀਂ ਜਾਂਦੀ ।
4.
ਜੀਰੀ ਦਾ ਦਸਵੰਧ ਲੈਣ ਲਈ ,
ਟੈਂਪੂ ਲੈ ਕੇ ਆ ਗਏ ਬਾਬੇ ।
ਅੰਨਦਾਤੇ ਨੂੰ ਲੋੜ ਪਈ ਤਾਂ ,
ਅਪਣਾ ਚੰਮ ਬਚਾ ਗਏ ਬਾਬੇ ।
ਜਦ ਮੈਂ ਆਖਿਆ ਬੂਬਨਿਓਂ ਹੁਣ,
ਦਿੱਲੀ ਧਰਨੇ ‘ਤੇ ਵੀ ਜਾਓ ;
ਭਗਤਾ ਭਗਤਾ ਕਹਿ ਕੇ ਅੱਗਿਓਂ ,
ਹੱਸ ਕੇ ਡੰਗ ਟਪਾ ਗਏ ਬਾਬੇ ।
ਮੂਲ ਚੰਦ ਸ਼ਰਮਾ ਪ੍ਰਧਾਨ ,
ਪੰਜਾਬੀ ਸਾਹਿਤ ਸਭਾ ਧੂਰੀ (ਸੰਗਰੂਰ)
ਪੰਜਾਬ 148024
