(ਸਮਾਜ ਵੀਕਲੀ)
ਚਿੜਾ : ‘ਸੁਣ ਬੱਲੀਏ’
ਚਿੜੀ : ‘ਹਾਂ ਮੱਖਣਾ’
ਚਿੜਾ : ‘ਚੱਲ ਉੱਡ ਚੱਲੀਏ’
ਚਿੜੀ : ‘ਨਾ ਮੱਖਣਾ’
ਚਿੜਾ : ‘ਲੋਕਾਂ ਦੀਆਂ ਨਜ਼ਰਾਂ ਤੋਂ…
ਆਪਾਂ ਚੋਰੀ-ਚੋਰੀ,
ਚੱਲ ਆਪਣੀ ਹੀ ਦੁਨੀਆਂ ਵਸਾ ਲਈਏ।’
ਚਿੜੀ : ‘ਟਿਕਿਆ ਰਹਿ…
ਛੱਡ ਉੱਡ ਜਾਣ ਦੀਆਂ ਗੱਲਾਂ,
ਚੱਲ ਬਾਤ ਕੋਈ ਮੁਹੱਬਤਾਂ ਦੀ ਪਾ ਲਈਏ।’-੨
ਚਿੜਾ : ‘ ਆਜਾ ਕਰੀਏ ਕਲੋਲ’
ਚਿੜੀ : ‘ਚੱਲ ਸੋਹਣਿਆਂ’
ਚਿੜਾ : ‘ ਭੋਰਾ ਹੋਜਾ ਮੇਰੇ ਕੋਲ’
ਚਿੜੀ : ‘ ਆਹ ਲੈ ਮਨ-ਮੋਹਣਿਆਂ’
ਚਿੜਾ : ‘ਸੱਚ-ਮੁੱਚ ਤੂੰ ਹੈਂ..
ਮੇਰੀ ਖੰਡ-ਮਿਸ਼ਰੀ…
ਤੈਨੂੰ ਇੱਕੋ ਹੀ ਡੀਕ ਵਿੱਚ ਪੀ ਜਾਵਾਂ’
ਚਿੜੀ : ‘ ਸੱਚ-ਮੁੱਚ ਤੂੰ ਵੀ…
ਮੈਨੂੰ ਜਾਨ ਤੋਂ ਪਿਆਰਾ…
ਆਜਾ ਘੁੱਟ ਕੇ ਕਾਲਜੇ ਵੀ ਲਾਵਾਂ ।’-੨
ਚਿੜੀ : ‘ਇੱਕ ਗੱਲ ਮੈਂ ਕਰਾਂ’
ਚਿੜਾ : ‘ਦੱਸ ਅੜੀਏ’
ਚਿੜੀ : ‘ ਇਸ ਜੱਗ ਤੋਂ ਡਰਾਂ’
ਚਿੜਾ : ‘ਬੱਸ ਅੜੀਏ !’
ਚਿੜੀ : ‘ ਲੈ…ਮਾਲਵਿੰਦਰ’ ‘ਜੇ…
ਇਸ ਜੱਗ ‘ਚ ਸ਼ਿਕਾਰੀ…
ਦੋਨੋਂ ਆਪਾਂ ‘ਚ ਜੁਦਾਈਆਂ ਉਹ ਪੁਆ ਦੇਣਗੇ’
ਚਿੜਾ : ‘ਆਪਾਂ ਵੀ ਹਾਂ ਦੋਨੋਂ…
ਇੱਕ ਡਾਲ ਉੱਤੇ ਬੈਠੇ…
ਭਲਾ ਹੋਊ ‘ਕੱਠਿਆਂ ਨੂੰ ਜੇ ਮੁਕਾ ਦੇਣਗੇ ।’-੨
ਚਿੜਾ-ਚਿੜੀ ( ਦੋਨੋਂ) : ‘ਅਸਾਂ ਮਰਕੇ ਵੀ…
ਦੋਹਾਂ ਨੇ ਹੈ ਇੱਕ-ਮਿੱਕ ਰਹਿਣਾ…
ਏਥੇ ਕੀਹਦੀ ਏ ਮਜ਼ਾਲ ਕਿ ਉਡਾ ਦੇਣਗੇ’- ੨
— ਮਾਲਵਿੰਦਰ ਸ਼ਾਇਰ
ਸਮਾਜ ਵੀਕਲੀ’ ਐਪ ਡਾਊਨਲੋਡ ਕਰਨ ਲਈ ਹੇਠ ਦਿਤਾ ਲਿੰਕ ਕਲਿੱਕ ਕਰੋ
https://play.google.com/store/apps/details?id=in.yourhost.samajweekly
