ਡਾ. ਸਤਿੰਦਰ ਪਾਲ ਸਿੰਘ
ਮਹਿਕ, ਰੰਗ ਲਈ ਬਾਗ ‘ ਚ ਵੱਖਰਾ ਲੱਗੇ ਫੁੱਲ ਗੁਲਾਬ ਦਾ ।
ਗੁਰੂ ਦਾ ਪਿਆਰਾ ਸਿੱਖ ਤਾਂ ਪੂਰਾ ਵੱਖਰਾ ਦਿੱਸਣਾ ਚਾਹੀਦਾ ।
ਸਬਰ ਸਿੱਖ ਦੀ ਤਾਕਤ, ਸਹਿਜ ‘ ਚ ਰੰਗ ਰਹਿਣਾ ।
ਸੰਜਮ ਦਾ ਹੈ ਤੇਜ , ਗੁਰ ਸ਼ਬਦ ਉਸ ਦਾ ਗਹਿਣਾ ।
ਫਿਰ ਕੀ ਹੈ ਮਸਲਾ ਭਟਕਣ ਕਿਉਂ ਹੈ, ਹੈ ਰੌਲਾ ਕਿਉਂ ?
ਆਪੋ ਆਪਣੇ ਬੁੰਗਿਆਂ ਦਾ ਇਹ ਘੋਲ ਮਚੋਲਾ ਕਿਉਂ ?
ਸਾਰੇ ਹੀ ਕਹਿੰਦੇ ਪਂਥ ਲਈ ਪਰ ਸੁਰ ਨਹੀਂ ਮਿਲਦੇ ।
ਰਾਖੀ ਕਰਨ ਵਾਲਿਆਂ ਤੋਂ ਹੀ ਡਰ ਬਣੇ ਰਹਿੰਦੇ ।
ਅਨਮੋਲ ਸ਼ਹੀਦੀਆਂ ਦੇ ਵਾਰਿਸ ਅੱਜ ਬੋਲ ਬਹਾਦਰ ।
ਕਿਵੇਂ ਕਰੇ ਕੋਈ ਆਸ ਜਿਨ੍ਹਾ ਦੀ ਆਪ ਹੀ ਮੈਲੀ ਚਾਦਰ ।
ਸ਼ਬਦ ਛੱਡ ਲੱਭਣ ਗੁਰੂ ਅੱਜ ਸੂਰਤ, ਮੂਰਤ ਦੇ ਅੰਦਰ ।
ਕਿਰਤ ਕਮਾਈ ਨਹੀਂ ,ਸੁਪਨ ਵਿੱਚ ਬਸ ਕੌਤਕ ਦੇ ਮੰਜਰ।
ਮਨ ਦੀ ਸਿੱਧੀ ਨਹੀਂ ਮੰਨਤ ਬਣ ਗਈ ਕਿਉਂ ਸਿੱਖੀ ?
ਕਿੱਥੇ ਗਏ ਪਿਆਰੇ ਜਿਨ ਧਾਰੀ ਇਹ ਖੰਨਿਉਂ ਤਿੱਖੀ ?
ਸਿਰ ਉੱਚਾ ਕਰ ਰਹੇ ਸਾਰੇ , ਸਿਰ ਤਲੀ ਤੇ ਕਿਸ ਦਾ ਹੈ ?
ਸਾਰੇ ਬਣ ਹਣ ਗਏ ਮਾਲਿਕ , ਗੁਰੂ ਨਾਨਕ ਕਿਸ ਦਾ ਹੈ ?
ਉਹੀ ਰੰਗ , ਉਹੀ ਰਸ ਹੈ ਜੋ ਸੱਭ ਵਿੱਚ ਦਿੱਸੇ ਝੱਲਕਦਾ ।
ਗੁਰੂ ਦਾ ਪਿਆਰਾ ਸਿੱਖ ਤਾਂ ਪੂਰਾ ਵੱਖਰਾ ਦਿੱਸਣਾ ਚਾਹੀਦਾ।
ਡਾ. ਸਤਿੰਦਰ ਪਾਲ ਸਿੰਘ
ਈ ੧੭੧੬, ਰਾਜਾਜੀਪੁਰਮ ਲਖਨਉ -੨੨੬੦੧੭
ਈ ਮੇਲ – [email protected]
